ನವದೆಹಲಿ: ಮೇಲ್ನೋಟಕ್ಕೆ ಯಾವುದೇ ಉಲ್ಲಂಘನೆ ಕಂಡುಬಂದಿಲ್ಲ ಎಂಬ ವರದಿ ನೀಡುವ ಮೂಲಕ ಹಿಂಡನ್ಬರ್ಗ್ ವರದಿ ಪ್ರಕರಣದಲ್ಲಿ ಅದಾನಿ ಗ್ರೂಪ್ಗೆ ಸುಪ್ರೀಂಕೋರ್ಟ್ ಸಮಿತಿ ಕ್ಲೀನ್ಚಿಟ್ ನೀಡಿದೆ.
ಸೆಬಿ (SEBI) ಮಾರುಕಟ್ಟೆ ನಿಯಂತ್ರಕ ವ್ಯವಸ್ಥೆಯ ಭಾಗವಾಗಿ ಯಾವುದೇ ನಿಯಮಗಳನ್ನು ಅನುಸರಿಸುವಲ್ಲಿ ಅದಾನಿ ಗ್ರೂಪ್ ವಿಫಲವಾಗಿದೆ ಎಂಬ ತೀರ್ಮಾನಕ್ಕೆ ಬರಲು ಸಾಧ್ಯವಿಲ್ಲ ಎಂದು ಸುಪ್ರೀಂಕೋರ್ಟ್ ನೇಮಿಸಿರುವ ತಜ್ಞರ ಸಮಿತಿ ವರದಿ ನೀಡಿದ್ದು, ಅದಾನಿ ಗ್ರೂಪ್ಗೆ ಕ್ಲೀನ್ಚಿಟ್ ನೀಡಿದೆ.
ಅದಾನಿ ಗ್ರೂಪ್ ಕಡೆಯಿಂದ ಬೆಲೆಯಲ್ಲೂ ಯಾವುದೇ ವಂಚನೆ ನಡೆದಿಲ್ಲ. ತನ್ನ ಚಿಲ್ಲರೆ ಹೂಡಿಕೆದಾರರ ಸುರಕ್ಷತೆಗಾಗಿ ಅಗತ್ಯವಾದ ಕ್ರಮವನ್ನು ತೆಗೆದುಕೊಂಡಿದೆ. ಅಲ್ಲದೆ, ಆರ್ಥಿಕ ಅಪಾಯವನ್ನು ತಗ್ಗಿಸಲು ಅದಾನಿ ಗ್ರೂಪ್ ತೆಗೆದುಕೊಂಡ ಕ್ರಮಗಳು ಸ್ಟಾಕ್ ಮೇಲಿನ ನಂಬಿಕೆಯನ್ನು ಗಳಿಸಲು ನೆರವಾಗಿದೆ. ಅದಾನಿ ಗ್ರೂಪ್ ಸ್ಟಾಕ್ಗಳು ಇದೀಗ ಸ್ಥಿರವಾಗಿವೆ ಎಂದು ಸಮಿತಿ ತಿಳಿಸಿದೆ.
ಸುಪ್ರೀಂಕೋರ್ಟ್ಗೆ ಸಮಿತಿ ಸಲ್ಲಿಸಿರುವ ವರದಿಯ ಪ್ರಮುಖಾಂಶಗಳು
* ಒಂದೇ ಪಾರ್ಟಿಗಳ ನಡುವೆ ಅನೇಕ ಬಾರಿ ಕೃತಕ ವ್ಯಾಪಾರ ಅಥವಾ ಯಾವುದೇ ವಾಶ್ ಟ್ರೇಡಿಂಗ್ ಮಾದರಿ ಕಂಡುಬಂದಿಲ್ಲ.
* ಅಬ್ಯುಸಿವ್ ಟ್ರೇಡಿಂಗ್ (ನೋಂದಾಯಿತ ತೆರೆದ ಷೇರುಗಳ ಖರೀದಿ ಅಥವಾ ಮಾರಾಟದ ಮೇಲೆ ಪರಿಣಾಮ ಬೀರುವುದು) ನಲ್ಲಿ ಯಾವುದೇ ಸುಸಂಬದ್ಧ ಮಾದರಿ ಬೆಳಕಿಗೆ ಬಂದಿಲ್ಲ.
* ಕನಿಷ್ಠ ಸಾರ್ವಜನಿಕ ಷೇರುದಾರರು, ಹೂಡಿಕೆಗಳ ಮೇಲೆ ಸಂಬಂಧಿತ ಪಕ್ಷಗಳಿಂದ ಯಾವುದೇ ಉಲ್ಲಂಘನೆ ಕಂಡುಬಂದಿಲ್ಲ.
* ಕನಿಷ್ಠ ಸಾರ್ವಜನಿಕ ಷೇರುಗಳಿಗೆ ಸಂಬಂಧಿಸಿದಂತೆ ಯಾವುದೇ ನಿಯಂತ್ರಕ ವೈಫಲ್ಯ ಕಂಡುಬಂದಿಲ್ಲ.
ಗೌತಮ್ ಅದಾನಿ ಒಡೆತನದ ಅದಾನಿ ಸಮೂಹದ ಷೇರುಪೇಟೆ ಅಕ್ರಮ ಮತ್ತು ತೆರಿಗೆ ವಂಚನೆ ಕುರಿತು ಅಮೆರಿಕದ ಸಂಶೋಧನಾ ಸಂಸ್ಥೆ ಹಿಂಡನ್ರ್ಬಗ್ ವರದಿ ಮಾಡಿದ ಬಳಿಕ ಅದಾನಿ ಗ್ರೂಪ್ ವಿವಾದದ ಸುಳಿಗೆ ಸಿಲುಕಿಕೊಂಡಿತು. (ಏಜೆನ್ಸೀಸ್)