ಹೈದರಾಬಾದ್: ಸ್ಟಾರ್ ಬ್ಯಾಟರ್ ವಿರಾಟ್ ಕೊಹ್ಲಿ (100 ರನ್, 63 ಎಸೆತ,12 ಬೌಂಡರಿ, 4 ಸಿಕ್ಸರ್) ವಿಶ್ವದ ಶ್ರೀಮಂತ ಟಿ20 ಲೀಗ್ನಲ್ಲಿ 4 ವರ್ಷಗಳ ಬಳಿಕ ಸಿಡಿಸಿದ ಆಕರ್ಷಕ ಶತಕ ಹಾಗೂ ನಾಯಕ ಫಾಫ್ ಡು ಪ್ಲೆಸಿಸ್ (71 ರನ್, 47 ಎಸೆತ, 7 ಬೌಂಡರಿ, 2 ಸಿಕ್ಸರ್) ಜತೆಗಿನ ಭರ್ಜರಿ ಜತೆಯಾಟದ ನೆರವಿನಿಂದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಐಪಿಎಲ್&16ರಲ್ಲಿ ಸನ್ರೈಸರ್ಸ್ ಹೈದರಾಬಾದ್ ಎದುರು 8 ವಿಕೆಟ್ಗಳಿಂದ ಗೆಲುವು ದಾಖಲಿಸಿದೆ. ಇದರೊಂದಿಗೆ ಅಂಕಪಟ್ಟಿಯಲ್ಲಿ 4ನೇ ಸ್ಥಾನಕ್ಕೇರಿದ ಫಾಫ್ ಡು ಪ್ಲೆಸಿಸ್ ಬಳಗ ಪ್ಲೇಆಫ್ ಅವಕಾಶ ವೃದ್ಧಿಸಿಕೊಂಡಿದೆ.
ರಾಜೀವ್ ಗಾಂಧಿ ಕ್ರೀಡಾಂಗಣದಲ್ಲಿ ಗುರುವಾರ ನಡೆದ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟಿಂಗ್ ನಡೆಸಿದ ಸನ್ರೈಸರ್ಸ್ ತಂಡ ವಿಕೆಟ್ ಕೀಪರ್&ಬ್ಯಾಟರ್ ಹೆನ್ರಿಕ್ ಕ್ಲಾಸೆನ್ (104 ರನ್, 51 ಎಸೆತ, 8 ಬೌಂಡರಿ, 6 ಸಿಕ್ಸರ್) ಶತಕದ ನೆರವಿನಿಂದ 5 ವಿಕೆಟ್ಗೆ 186 ರನ್ ಕಲೆಹಾಕಿತು. ಪ್ರತಿಯಾಗಿ ಆರ್ಸಿಬಿ ತಂಡ ಕೊಹ್ಲಿ& ಪ್ಲೆಸಿಸ್ ಜೋಡಿಯ ಭರ್ಜರಿ ಮೊದಲ ವಿಕೆಟ್ ಜತೆಯಾಟದ ನೆರವಿನಿಂದ 19.2 ಓವರ್ಗಳಲ್ಲಿ 2 ವಿಕೆಟ್ಗೆ 187 ರನ್ ಪೇರಿಸಿ ಗೆಲುವಿನ ಕೇಕೇ ಹಾಕಿತು.
ವಿರಾಟ್-ಪ್ಲೆಸಿಸ್ ಭರ್ಜರಿ ಆಟ
ಆಕರ್ಷಕ ಕವರ್ ಡ್ರೈವ್ ಮೂಲಕ ಬೌಂಡರಿ ಸಿಡಿಸಿ ಚೇಸಿಂಗ್ ಆರಂಭಿಸಿದ ಕೊಹ್ಲಿ ಜತೆ ಪ್ಲೆಸಿಸ್ ಭರ್ಜರಿ ಬ್ಯಾಟಿಂಗ್ ನಡೆಸಿದರು. ಈ ಜೋಡಿ ಪವರ್ಪ್ಲೇನಲ್ಲಿ ಸ್ಫೋಟಕ ಬ್ಯಾಟಿಂಗ್ ಮೂಲಕ 64 ರನ್ ದೋಚಿತು. ಕೊಹ್ಲಿ ಹಾಗೂ ಪ್ಲೆಸಿಸ್ ಜೋಡಿ ಮೊದಲ ವಿಕೆಟ್ಗೆ 108 ಎಸೆತಗಳಲ್ಲಿ 172 ರನ್ಗಳ ಜತೆಯಾಟವಾಡಿತು. ಪ್ಲೆಸಿಸ್ 34 ಎಸೆತದಲ್ಲಿ ಸತತ ಮೂರನೇ ಹಾಗೂ ಟೂರ್ನಿಯಲ್ಲಿ 8ನೇ ಅರ್ಧಶತಕ ಪೂರೈಸಿದರು. 35 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿದ ಬಳಿಕ ಬಿರುಸಿನಾಟ ನಡೆಸಿದ ಕೊಹ್ಲಿಗೆ ಮತ್ತೊಂದು ಬದಿಯಿಂದ ಪ್ಲೆಸಿಸ್ ಉತ್ತಮ ಬೆಂಬಲ ಒದಗಿಸಿದರು. 18ನೇ ಓವರ್ನಲ್ಲಿ ಸಿಕ್ಸರ್ ಸಿಡಿಸಿದ ಕೊಹ್ಲಿ 62 ಎಸೆತಗಳಲ್ಲಿ ಶತಕ ಪೂರೈಸಿ ಮರು ಎಸೆತದಲ್ಲಿ ವಿಕೆಟ್ ಒಪ್ಪಿಸಿದರು. ನಂತರ 4 ಎಸೆತದ ಅಂತರದಲ್ಲಿ ಪ್ಲೆಸಿಸ್ ಸಹ ಡಗೌಟ್ ಸೇರಿದರು. ಅಂತಿಮ ಓವರ್ನಲ್ಲಿ 3 ರನ್ ಅವಶ್ಯವಿದ್ದಾಗ ಮ್ಯಾಕ್ಸ್ವೆಲ್ (5*) ಹಾಗೂ ಮೈಕೆಲ್ ಬ್ರೇಸ್ವೆಲ್ (4*) 4 ಎಸೆತ ಬಾಕಿಯಿರುವಂತೆ ಆರ್ಸಿಬಿ ತಂಡವನ್ನು ಗೆಲುವಿನ ದಡ ಸೇರಿಸಿದರು.