ಒರಿಸ್ಸಾ: ಒರಿಸ್ಸಾದ ಜಗತ್‌ಸಿಂಗ್‌ಪುರ ಜಿಲ್ಲೆಯ ಪಾರಾದೀಪ್ ಕರಾವಳಿಯಲ್ಲಿ ಮೀನುಗಾರಿಕಾ ದೋಣಿಯಿಂದ ಕ್ಯಾಮೆರಾ ಮತ್ತು ಮೈಕ್ರೋಚಿಪ್‌ನಂತೆ ಕಾಣುವ ಸಾಧನಗಳನ್ನು ಅಳವಡಿಸಲಾಗಿರುವ ಪಾರಿವಾಳವನ್ನು ಹಿಡಿಯಲಾಗಿದ್ದು, ಪಕ್ಷಿಯನ್ನು ಬೇಹುಗಾರಿಕೆಗೆ ಬಳಸಲಾಗುತ್ತಿದೆ ಎಂದು ಪೊಲೀಸರು ಶಂಕಿಸಿದ್ದಾರೆ.
ಕೆಲವು ಮೀನುಗಾರರು ಕೆಲವು ದಿನಗಳ ಹಿಂದೆ ಸಮುದ್ರದಲ್ಲಿ ಮೀನುಗಾರಿಕೆ ನಡೆಸುತ್ತಿದ್ದಾಗ ತಮ್ಮ ಟ್ರಾಲರ್‌ನಲ್ಲಿ ಈ ಪಾರಿವಾಳವನ್ನು ಹಿಡಿದಿದ್ದರು. ಈ ಪಕ್ಷಿ ಸಿಗುತ್ತಿದ್ದಂತೆಯೇ (ಬುಧವಾರ) ಇಲ್ಲಿನ ಮರೀನ್ ಪೊಲೀಸರಿಗೆ ಒಪ್ಪಿಸಿದ್ದಾರೆ.
ಇದನ್ನೂ ಓದಿ: ಚೀನಾ ಗೂಢಚರ್ಯೆ ಬಗ್ಗೆ ಎಚ್ಚರ!: ಆ ಕ್ಷಣ ಅಂಕಣ..
‘ನಮ್ಮ ಪಶುವೈದ್ಯರು ಪಕ್ಷಿಯನ್ನು ಪರೀಕ್ಷಿಸಿದ್ದು ಅದರ ಕಾಲುಗಳಿಗೆ ಜೋಡಿಸಲಾದ ಸಾಧನಗಳನ್ನು ಪರೀಕ್ಷಿಸಲು ನಾವು ರಾಜ್ಯ ವಿಧಿ ವಿಜ್ಞಾನ ಪ್ರಯೋಗಾಲಯದ ಸಹಾಯವನ್ನು ಪಡೆಯುತ್ತೇವೆ. ಸಾಧನಗಳು ಕ್ಯಾಮೆರಾ ಮತ್ತು ಮೈಕ್ರೋಚಿಪ್ ಎಂದು ತೋರುತ್ತಿವೆ’ ಎಂದು ಜಗತ್‌ಸಿಂಗ್‌ಪುರ ಪೊಲೀಸ್‌ ವರಿಷ್ಠಾಧಿಕಾರಿ ರಾಹುಲ್ ಪಿಆರ್ ತಿಳಿಸಿದ್ದಾರೆ.
ಹಕ್ಕಿಯ ರೆಕ್ಕೆಗಳ ಮೇಲೆ ಸ್ಥಳೀಯ ಪೊಲೀಸರಿಗೆ ತಿಳಿಯದ ಭಾಷೆಯಲ್ಲಿ ಬರೆಯಲಾಗಿದ್ದು ಏನು ಬರೆಯಲಾಗಿದೆ ಎಂಬುದನ್ನು ಕಂಡುಹಿಡಿಯಲು ತಜ್ಞರ ಸಹಾಯವನ್ನು ಸಹ ಪಡೆಯಲಾಗುವುದು’ ಎಂದು ಎಸ್ಪಿ ಹೇಳಿದರು.
ಇದನ್ನೂ ಓದಿ: ‘ಪಶ್ಚಿಮ ಬಂಗಾಳ’ ಬೇಡ ಎಂದ ಮಮತಾ ಬ್ಯಾನರ್ಜಿ: ಹೆಸರು ಬದಲಿಸಲು ಪ್ರಧಾನಿಗೆ ಮನವಿ
‘ಸಾರಥಿ’ ಎಂಬ ಮೀನುಗಾರಿಕಾ ಟ್ರಾಲರ್‌ನ ಉದ್ಯೋಗಿ ಪಿತಾಂಬರ ಬೆಹೆರಾ ಅವರು ಪಾರಿವಾಳವನ್ನು ದೋಣಿಯ ಮೇಲೆ ಕುಳಿತಿರುವುದನ್ನು ನೋಡಿರುವುದಾಗಿ ಹೇಳಿದರು. “ಹಕ್ಕಿಯ ಕಾಲುಗಳಿಗೆ ಏನನ್ನೋ ಜೋಡಿಸಿರುವುದನ್ನು ನಾನು ಇದ್ದಕ್ಕಿದ್ದಂತೆ ಗಮನಿಸಿದೆ. ಅದರ ರೆಕ್ಕೆಗಳ ಮೇಲೆ ಏನೋ ಬರೆದಿರುವುದನ್ನು ಕೂಡ ನೋಡಿದೆ. ಅದು ಒಡಿಯಾ ಅಲ್ಲ ಎಂದು ತಿಳಿಯಿತು’ ಎಂದು ಬೆಹೆರಾ ಹೇಳಿದರು. ಹಕ್ಕಿ ಹತ್ತಿರ ಬಂದ ನಂತರ ಪಾರಿವಾಳವನ್ನು ಕರೆದು ಹಿಡಿದರು. ಬೆಹೆರಾ ನಂತರ ಟ್ರಾಲರ್‌ನ ಮಾಲೀಕರಿಗೆ ಘಟನೆಯನ್ನು ತಿಳಿಸಿದ್ದು. ಸುಮಾರು 10 ದಿನಗಳ ಹಿಂದೆ ಕೋನಾರ್ಕ್‌ನಿಂದ ಕರಾವಳಿಯಿಂದ 35 ಕಿಲೋಮೀಟರ್ ದೂರದಲ್ಲಿ ಲಂಗರು ಹಾಕಿದಾಗ ಟ್ರಾಲರ್‌ನಲ್ಲಿ ಪಾರಿವಾಳ ಪತ್ತೆಯಾಗಿದೆ. ಬೆಹೆರಾ ಅವರು ಕಳೆದ ಹಲವು ದಿನಗಳಿಂದ ಒಡೆದ ಅನ್ನವನ್ನು ತಿನ್ನಿಸುತ್ತಿದ್ದರು. (ಏಜೆನ್ಸೀಸ್)