ಕುಂದಗೋಳ: ತಾಲೂಕಿನ ಅಲ್ಲಾಪೂರ ಗ್ರಾಮದಲ್ಲಿನ ಓವರ್ಹೆಡ್ ಟ್ಯಾಂಕ್ ಸ್ವಚ್ಛಗೊಳಿಸುವಾಗ ಅದರಲ್ಲಿ ಹಾವೊಂದು ಪ್ರತ್ಯಕ್ಷವಾಗಿದೆ. ಅದನ್ನು ಕಂಡ ಗ್ರಾಪಂನ ಸ್ವಚ್ಛತೆ ಸಿಬ್ಬಂದಿ ಭಯಭೀತರಾದ ಘಟನೆ ಬುಧವಾರ ಸಂಜೆ ನಡೆದಿದೆ.
ಕಳೆದ ಮೂರು ವರ್ಷಗಳ ಹಿಂದೆ ನಿರ್ವಿುಸಲಾಗಿದ್ದ ಓವರ್ಹೆಡ್ ಟ್ಯಾಂಕ್ ಸ್ವಚ್ಛಗೊಳಿಸದೆ ಬಹಳ ದಿನಗಳಾಗಿದ್ದವು. ಬೇಸಿಗೆ ಹೆಚ್ಚಾಗಿದ್ದರಿಂದ ನೀರಿನ ಸಮಸ್ಯೆ ಬಗೆಹರಿಸಲು ಗ್ರಾಪಂ ಸದಸ್ಯರಾದ ಮಲ್ಲಿಕಾರ್ಜುನ ರಡ್ಡೇರ ಹಾಗೂ ಚಿದಾನಂದ ಪೂಜಾರ ಅವರು ಗ್ರಾಪಂ ಸಿಬ್ಬಂದಿಯೊಂದಿಗೆ ಸೇರಿ ಟ್ಯಾಂಕ್ಗೆ ಮೋಟರ್ ಅಳವಡಿಸಿ ಸ್ವಚ್ಛಗೊಳಿಸುವಲ್ಲಿ ನಿರತರಾಗಿದ್ದರು. ಆಗ ಟ್ಯಾಂಕ್ನಲ್ಲಿ ಇಳಿದ ಸ್ವಚ್ಛತಾ ಸಿಬ್ಬಂದಿ ಒಳಗೆ ಹಾವನ್ನು ಕಂಡು ಭಯಭೀತರಾಗಿ ಎದ್ನೋ ಬಿದ್ನೋ ಎಂದು ಲಘುಬಗೆಯಿಂದ ಮೇಲೇರಿ ಬಂದಿದ್ದಾರೆ. ಆಗ ಅಲ್ಲಿದ್ದವರ ಮೂಲಕ ಹುಬ್ಬಳ್ಳಿಯ ಹಾವು ಹಿಡಿಯುವ ವಸಂತ ಎಂಬುವರಿಗೆ ಫೋನಾಯಿಸಿ ಕರೆಯಿಸಿದ್ದಾರೆ. ಆಗ ಅವರು ೕವರ್ ಹೆಡ್ ಟ್ಯಾಂಕ್ನಲ್ಲಿದ್ದ ಹಾವನ್ನು ಹಿಡಿದು ಸುರಕ್ಷತವಾಗಿ ಬೇರೆಡೆ ಸ್ಥಳಾಂತರಿಸಿದ್ದಾರೆ. ಬಳಿಕ ಟ್ಯಾಂಕ್ ಅನ್ನು ಸ್ವಚ್ಛಗೊಳಿಸಿ ಇಡೀ ಗ್ರಾಮಕ್ಕೆ ಕುಡಿಯುವ ನೀರು ಪೂರೈಸಲಾಯಿತು.