ಅಹಮದಾಬಾದ್: ಆಟಗಾರರ ಹರಾಜಿನಲ್ಲಿ ಉಂಟಾಗಿದ್ದ ಹೆಸರಿನ ಗೊಂದಲದಿಂದಾಗಿ ಬೇರೊಬ್ಬ ಆಟಗಾರನ ಬದಲಾಗಿ ಪಂಜಾಬ್ ಕಿಂಗ್ಸ್ ತಂಡಕ್ಕೆ ಸೇರ್ಪಡೆಯಾಗಿದ್ದ ಛತ್ತೀಸ್ಗಢದ ಬ್ಯಾಟರ್ ಶಶಾಂಕ್ ಸಿಂಗ್ ಇದೀಗ ಐಪಿಎಲ್-17ರಲ್ಲಿ ಗೆಲುವಿನ ರೂವಾರಿಯಾಗಿ ಹೊರಹೊಮ್ಮಿದ್ದಾರೆ. ಶಶಾಂಕ್ ಸಿಂಗ್ (61*ರನ್, 29 ಎಸೆತ, 6 ಬೌಂಡರಿ, 4 ಸಿಕ್ಸರ್) ಸ್ಫೋಟಕ ಬ್ಯಾಟಿಂಗ್ ನಿರ್ವಹಣೆಯ ಬಲದಿಂದ ಪಂಜಾಬ್ ಕಿಂಗ್ಸ್ ತಂಡ ಆತಿಥೇಯ ಗುಜರಾತ್ ಟೈಟಾನ್ಸ್ ತಂಡವನ್ನು 3 ವಿಕೆಟ್ಗಳಿಂದ ಮಣಿಸಿದೆ. ಈ ಮೂಲಕ ಶಿಖರ್ ಧವನ್ ಬಳಗ ಅಂಕಪಟ್ಟಿಯಲ್ಲಿ 5ನೇ ಸ್ಥಾನಕ್ಕೇರಿದೆ. ಗುಜರಾತ್ ತಂಡ ತವರು ಅಂಗಣದಲ್ಲಿ ಮೊದಲ ಸೋಲು ಅನುಭವಿಸಿತು.
ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ಗುರುವಾರ ನಡೆದ ಕಾದಾಟದಲ್ಲಿ ಟಾಸ್ ಸೋತು ಮೊದಲು ಬ್ಯಾಟಿಂಗ್ಗೆ ಇಳಿದ ಗುಜರಾತ್ ತಂಡ, ಇನಿಂಗ್ಸ್ ಪೂರ್ತಿ ನಿಂತು ಆಸರೆಯಾದ ನಾಯಕ ಶುಭಮಾನ್ ಗಿಲ್ (89*ರನ್, 48 ಎಸೆತ, 6 ಬೌಂಡರಿ, 4 ಸಿಕ್ಸರ್) ಆಟ ಮತ್ತು ಇತರ ಬ್ಯಾಟರ್ಗಳ ಬೆಂಬಲದಿಂದ 4 ವಿಕೆಟ್ಗೆ 199 ರನ್ ಪೇರಿಸಿತು. ಪ್ರತಿಯಾಗಿ ಪಂಜಾಬ್ ತಂಡ ಮೊದಲ 9 ಓವರ್ನೊಳಗೆ ಅಗ್ರ 4 ವಿಕೆಟ್ ಕಳೆದುಕೊಂಡರೂ, ಶಶಾಂಕ್ ಸಿಂಗ್ ವೀರೋಚಿತ ಸಾಹಸದಿಂದ 19.5 ಓವರ್ಗಳಲ್ಲಿ 7 ವಿಕೆಟ್ಗೆ 200 ರನ್ ಸೇರಿಸಿ ರೋಚಕ ಗೆಲುವು ಒಲಿಸಿಕೊಂಡಿತು.
ಪಂಜಾಬ್ಗೆ ಆರಂಭಿಕ ಆಘಾತ: ಬೃಹತ್ ಮೊತ್ತದ ಚೇಸಿಂಗ್ಗೆ ನಿಂತ ಪಂಜಾಬ್, ನಾಯಕ ಶಿಖರ್ ಧವನ್ (1) ವಿಕೆಟ್ಅನ್ನು 2ನೇ ಓವರ್ನಲ್ಲೇ ಕಳೆದುಕೊಂಡಿತು. ಉಮೇಶ್ ಯಾದವ್ ಎಸೆತದಲ್ಲಿ ಧವನ್ ಬೌಲ್ಡ್ ಆದರು. ಬಳಿಕ ಜಾನಿ ಬೇರ್ಸ್ಟೋ (22) ಮತ್ತು ಪ್ರಭ್ಸಿಮ್ರನ್ ಸಿಂಗ್ (35) 2ನೇ ವಿಕೆಟ್ಗೆ 24 ಎಸೆತಗಳಲ್ಲಿ 35 ರನ್ ಗಳಿಸಿ ಪಂಜಾಬ್ಗೆ ಚೇತರಿಕೆ ಒದಗಿಸಿದರು. ಈ ವೇಳೆ ದಾಳಿಗಿಳಿದ ಯುವ ಸ್ಪಿನ್ನರ್ ನೂರ್ ಅಹ್ಮದ್ (32ಕ್ಕೆ 2) ಸತತ 2 ಓವರ್ಗಳಲ್ಲಿ ಇಬ್ಬರಿಗೂ ಡಗೌಟ್ ದಾರಿ ತೋರಿಸಿದರು. ಬೆನ್ನಲ್ಲೇ ಆಲ್ರೌಂಡರ್ ಸ್ಯಾಮ್ ಕರನ್ (5) ಕೂಡ ಔಟ್ ಆಗುವುದರೊಂದಿಗೆ ಪಂಜಾಬ್ 70 ರನ್ಗಳಿಗೆ 4 ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತು.
ಶಶಾಂಕ್ ಸ್ಫೋಟಕ ಆಟ: ಆರನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ಗೆ ಇಳಿದ ಶಶಾಂಕ್ ಸಿಂಗ್ ಸ್ಫೋಟಕ ಬ್ಯಾಟಿಂಗ್ ಮೂಲಕ ಪಂಜಾಬ್ ಗೆಲುವಿನಾಸೆಗೆ ಮರುಜೀವ ತುಂಬಿದರು. 5ನೇ ವಿಕೆಟ್ಗೆ ಸಿಕಂದರ್ ರಾಜಾ (12) ಜತೆ 22 ಎಸೆತಗಳಲ್ಲಿ 41, 6ನೇ ವಿಕೆಟ್ಗೆ ಜಿತೇಶ್ ಶರ್ಮ (16) ಜತೆ 19 ಎಸೆತಗಳಲ್ಲಿ 39 ಮತ್ತು 7ನೇ ವಿಕೆಟ್ಗೆ ಇಂಪ್ಯಾಕ್ಟ್ ಆಟಗಾರ ಆಶುತೋಷ್ ಶರ್ಮ (31) 22 ಎಸೆತಗಳಲ್ಲಿ 43 ರನ್ ಸಿಡಿಸಿ ತಂಡವನ್ನು ಗೆಲುವಿನತ್ತ ಮುನ್ನಡೆಸಿದರು.
ಕೊನೇ ಓವರ್ನಲ್ಲಿ 7 ರನ್ ಬೇಕಿದ್ದಾಗ ಯುವ ಬೌಲರ್ ದರ್ಶನ್ ನಲ್ಕಂಡೆ ದಾಳಿಗಿಳಿದರು. ಮೊದಲ ಎಸೆತದಲ್ಲೇ ಆಶುತೋಷ್ ಔಟಾದರೂ, ಶಶಾಂಕ್ ಇನ್ನೊಂದು ಎಸೆತ ಬಾಕಿ ಇರುವಂತೆಯೇ ತಂಡವನ್ನು ಗೆಲುವಿನ ದಡ ಸೇರಿಸುವಲ್ಲಿ ಯಶಸ್ವಿಯಾದರು.