ಮುಂಬೈ: ಬಾಂಬೆ ಸ್ಟಾಕ್ ಎಕ್ಸ್ಚೇಂಜ್(ಬಿಎಸ್ಇ) ಸೂಚ್ಯಂಕ ಸೆನ್ಸೆಕ್ಸ್ ಎರಡನೇ ದಿನವೂ ಏರಿಕೆ ತೋರಿದ್ದು, ಬುಧವಾರದ ವಹಿವಾಟಿನಲ್ಲಿ 350 ಅಂಶ ಏರಿಕೆ ದಾಖಲಿಸಿದೆ. ಇದೇ ವೇಳೆ, ನ್ಯಾಷನಲ್ ಸ್ಟಾಕ್ ಎಕ್ಸ್ಚೇಂಜ್ (ನಿಫ್ಟಿ) ಕೂಡ 93 ಅಂಶ ಏರಿಕೆ ದಾಖಲಿಸಿದೆ. ಸೆನ್ಸೆಕ್ಟ್ ಪಟ್ಟಿಯನ್ನು ಎಚ್ಯುಎಲ್, ಐಸಿಐಸಿಐ ಬ್ಯಾಂಕು, ಕೊಟಾಕ್ ಬ್ಯಾಂಕು, ಆರ್ಐಎಲ್, ಎಚ್ಡಿಎಫ್ಸಿ ಬ್ಯಾಂಕು ಷೇರುಗಳು ಲಾಭಾಂಶದತ್ತ ಮುನ್ನಡೆಸಿದವು. ಜಾಗತಿಕ ಮಟ್ಟದಲ್ಲೂ ಪಾಸೆಟಿವ್ ಟ್ರೆಂಡ್ ಕಂಡುಬಂದಿತ್ತು.
ಬುಧವಾರದ ವಹಿವಾಟು ಅಂತ್ಯಗೊಳ್ಳುವ ವೇಳೆಗೆ ಸೆನ್ಸೆಕ್ಸ್ 349.76 ಅಂಶ ಏರಿದ್ದು 41,565.90 ರಲ್ಲೂ, ನಿಫ್ಟಿ 93.30 ಅಂಶ ಏರಿಕೆಯೊಂದಿಗೆ 12,201.20 ರಲ್ಲೂ ಕಾಣಿಸಿಕೊಂಡಿತ್ತು. ಸೆನ್ಸೆಕ್ಸ್ ಪಟ್ಟಿಯಲ್ಲಿ ಎಚ್ಯುಎಲ್ ಗರಿಷ್ಠ ಶೇಕಡ 5 ಲಾಭಾಂಶ ಬಾಚಿದರೆ, ಕೊಟಾಕ್ ಬ್ಯಾಂಕು, ನೆಸ್ಟ್ಲೆ ಇಂಡಿಯಾ, ಐಸಿಐಸಿಐ ಬ್ಯಾಂಕು, ಮಹೀಂದ್ರಾ ಆ್ಯಂಡ್ ಮಹೀಂದ್ರಾ, ಏಷ್ಯನ್ ಪೇಂಟ್ಸ್ ಮತ್ತು ಆರ್ಐಎಲ್ ಷೇರುಗಳು ಕೂಡ ಲಾಭಾಂಶ ದಾಖಲಿಸಿವೆ.
ಇನ್ನೊಂದೆಡೆ, ಎಸ್ಬಿಐ, ಇಂಡಸ್ಇಂಡ್ ಬ್ಯಾಂಕು, ಸನ್ ಫಾರ್ಮಾ, ಅಲ್ಟ್ರಾಟೆಕ್ ಸಿಮೆಂಟ್, ಪವರ್ಗ್ರಿಡ್, ಎನ್ಟಿಪಿಸಿ ಷೇರುಗಳು ಶೇಕಡ 1.34ರಷ್ಟು ನಷ್ಟ ಅನುಭವಿಸಿವೆ. ಜಾಗತಿಕ ಮಾರುಕಟ್ಟೆಯ ಧನಾತ್ಮಕ ಟ್ರೆಂಡ್ನಿಂದ ಪ್ರೇರರಣೆ ಪಡೆದ ದೇಶೀಯ ಮಾರುಕಟ್ಟೆ, ಕೊರೊನಾ ವೈರಸ್ ಆತಂಕದ ನಡುವೆಯೂ ಲಾಭ ಮಾಡಿಕೊಂಡಿವೆ. (ಏಜೆನ್ಸೀಸ್)