ಮುಂಬೈ: ಬಾಲಿವುಡ್ನ ಹಿರಿಯ ನಟ ಮತ್ತು ನಿರ್ದೇಶಕ ಸತೀಶ್ ಕೌಶಿಕ್, ಬುಧವಾರ ಮಧ್ಯರಾತ್ರಿ ಹೃದಯಾಘಾತದಿಂದ ನಿಧನರಾಗಿದ್ದಾರೆ. 67 ವರ್ಷ ವಯಸ್ಸಿನ ಸತೀಶ್ ಕೌಶಿಕ್, ಪತ್ನಿ ಮತ್ತು ಪುತ್ರಿಯನ್ನು ಅಗಲಿದ್ದಾರೆ.
ಇದನ್ನೂ ಓದಿ: ‘ಬೊಂಬೆ ಹೇಳುತೈತೆ’ ಮೂಲಕ ಹೊಸ ದಾಖಲೆ ಬರೆದ ಯತಿರಾಜ್
ನಾಸಿರುದ್ದೀನ್ ಷಾ ಅಭಿನಯದ ‘ಜಾನೇ ಭಿ ದೋ ಯಾರೋ’ ಚಿತ್ರದ ಮೂಲಕ ಹಿಂದಿ ಚಿತ್ರರಂಗಕ್ಕೆ ಎಂಟ್ರಿ ಕೊಟ್ಟ ಸತೀಶ್ ಕೌಶಿಕ್, ‘ಮಿಸ್ಟರ್ ಇಂಡಿಯಾ’ ಚಿತ್ರದ ಕ್ಯಾಲೆಂಡರ್ ಪಾತ್ರದಿಂದ ಬಹಳ ಜನಪ್ರಿಯರಾಗಿದ್ದರು. ‘ರಾಮ್ ಲಖನ್’, ‘ಸಾಜನ್ ಚಲೇ ಸಸುರಾಲ್’, ‘ದೀವಾನಾ ಮಸ್ತಾನಾ’, ‘ಬಡೆ ಮಿಯಾ ಚೋಟೆ ಮಿಯಾ’, ‘ಘರ್ವಾಲಿ ಬಹಾರ್ವಾಲಿ’, ‘ಹಮ್ ಕಿಸೀ ಸೆ ಕಮ್ ನಹೀ’ ಮತ್ತು ಇತ್ತೀಚೆಗೆ ಬಿಡುಗಡೆಯಾದ ‘ಛತ್ರಿವಾಲಿ’ ಸೇರಿದಂತೆ 100ಕ್ಕೂ ಹೆಚ್ಚು ಚಿತ್ರಗಳಲ್ಲಿ ನಟಿಸಿದ್ದರು. ಸತೀಶ್ ಅಭಿನಯದ ‘ಎಮರ್ಜೆನ್ಸಿ’ ಚಿತ್ರ ಇನ್ನೂ ಬಿಡುಗಡೆಯಾಗಬೇಕಿದೆ. ಕಾಮಿಡಿ ಚಿತ್ರಗಳಿಗೆ ಹೆಚ್ಚು ಜನಪ್ರಿಯರಾಗಿದ್ದ ಸತೀಶ್, ಗೋವಿಂದ ಅಭಿನಯದ ಹಲವು ಚಿತ್ರಗಳಲ್ಲಿ ನಟಿಸಿದ್ದಾರೆ.
ಬರೀ ನಟನಾಗಿಯಷ್ಟೇ ಅಲ್ಲ, ಅನಿಲ್ ಕಪೂರ್ ಮತ್ತು ಶ್ರೀದೇವಿ ಅಭಿನಯದ ‘ರೂಪ್ ಕಿ ರಾನಿ ಚೋರೋನ್ ಕಾ ರಾಜ’ ಮೂಲಕ ನಿರ್ದೇಶಕರೂ ಆದ ಸತೀಶ್, ‘ಪ್ರೇಮ್’, ‘ಹಮ್ ಆಪ್ಕೆ ದಿಲ್ ಮೆ ರೆಹ್ತೆ ಹೈ’, ‘ಹಮಾರೆ ದಿಲ್ ಆಪ್ಕೆ ಪಾಸ್ ಹೈ’, ‘ತೇರೆ ನಾಮ್’, ‘ಕರ್ಜ್’, ಢೋಲ್’ ಮುಂತಾದ ಚಿತ್ರಗಳನ್ನೂ ಅವರು ನಿರ್ದೇಶಿಸಿದ್ದರು.
ಬುಧವಾರ ಗುರ್ಗಾಂವ್ನಲ್ಲಿ ತಮ್ಮ ಸ್ನೇಹಿತನ ಮನೆಗೆ ಹೋಗಿದ್ದ ಸಂದರ್ಭದಲ್ಲಿ ಸತೀಶ್ ಕೌಶಿಕ್ ಅವರಿಗೆ ಎದೆ ನೋವು ಉಂಟಾಯಿತಂತೆ. ತಕ್ಷಣವೇ ತಮ್ಮನ್ನು ಆಸ್ಪತ್ರೆಗೆ ಕರೆದುಕೊಂಡು ಹೋಗುವುದಕ್ಕೆ ಅವರು ತಮ್ಮ ಡ್ರೈವರ್ಗೆ ಹೇಳಿದರಂತೆ. ಆದರೆ, ಮಧ್ಯರಾತ್ರಿ ಒಂದು ಗಂಟೆಯ ಹೊತ್ತಿಗೆ ಅವರು ಕೊನೆಯುಸಿರೆಳೆದಿದ್ದಾರೆ ಎಂದು ಸತೀಶ್ ಕೌಶಿಕ್ ಅವರ ಆಪ್ತರೂ ಆಗಿರುವ ಅನುಪಂ ಖೇರ್ ಹೇಳಿಕೊಂಡಿದ್ದಾರೆ.
ಇದನ್ನೂ ಓದಿ: ಚಳಿ, ಕೇಕ್ ಮತ್ತು ಮುದ್ದಾಟ; ವಿದೇಶದಲ್ಲಿ ಬರ್ತಡೇ ಆಚರಿಸಿಕೊಂಡ ರಾಧಿಕಾ ಪಂಡಿತ್
ಸತೀಶ್ ಕೌಶಿಕ್ ನಿಧನಕ್ಕೆ ಕಂಗನಾ ರಣಾವತ್, ಮನೋಜ್ ಬಾಜ್ಪೇಯಿ ಸೇರಿದಂತೆ ಹಲವರು ಕಂಬನಿ ಮಿಡಿದಿದ್ದಾರೆ.