''ಕಾಣದಂತೆ ಆಕ್ರಮಿಸಿದೆ ವೈರಿ ಕರೊನಾ, ಅದಕೆ ಈಗ ನಾವೇ ದಾರಿ ಆಗದಿರೋಣ. ಕಾಲ ಬುಡಕೆ ಬರುವತನಕ ಕಾಯದಿರೋಣ.. ಕಾಲ ಬುಡಕೆ ಬರುವ ತನಕ ಕಾಯದಿರೋಣ... ನಾವೇ ಇಂದು ನಮಗೊಂದು ಅವಕಾಶ ಕೊಡೋಣ.. '' ಎಂದು ಎಸ್ಪಿಬಿ ಹಾಡಿರುವ ಈ ಹಾಡನ್ನು ಒಮ್ಮೆ ಕೇಳಿದರೆ ನಮ್ಮ ಬದುಕು ಎತ್ತ ಸಾಗುತ್ತಿದೆ? ಏತಕ್ಕಾಗಿ ಈ ಜಂಜಾಟ, ಮಾನವೀಯ ನೆಲೆಗಟ್ಟು-ಮನುಷ್ಯತ್ವದ ಬಗ್ಗೆ ನಮ್ಮನ್ನು ನಾವೇ ಪ್ರಶ್ನೆ ಮಾಡಿಕೊಳ್ಳುವಂತೆ ಮಾಡಲಿದೆ. ಮತ್ತೆ ಮತ್ತೆ ಈ ಹಾಡನ್ನು ಕೇಳಬೇಕು ಅನ್ನಿಸದೆ ಇರದು. ಎಸ್ಬಿಪಿ ಕನ್ನಡದಲ್ಲಿ ಹಾಡಿದ ಕೊನೆಯ ಹಾಡು ಕೂಡ ಇದೇ. ಇದು ಸಿನಿಮೇತರ ಹಾಡು. ಮಾಯಾಬಜಾರ್ ಚಿತ್ರಕ್ಕಾಗಿ ಹಾಡಿದ ಹಾಡು ಕನ್ನಡ ಸಿನಿಮಾಕ್ಕಾಗಿ ಹಾಡಿದ್ದ ಕೊನೆಯ ಹಾಡು. ಎಸ್ಪಿಬಿ ಅವರಿಗೂ ಕರೊನಾ ಸೋಂಕು ತಗುಲಿತ್ತು. ಬಳಿಕ ಗುಣಮುಖರಾಗಿದ್ದರು. ಮತ್ತೆ ಆರೋಗ್ಯ ಹದಗೆಟ್ಟಿತ್ತು. ಚಿಕಿತ್ಸೆ ಫಲಿಸದೆ ಶುಕ್ರವಾರ ನಿಧನರಾದರು.
