ಬೆಂಗಳೂರು: ಮುಂಬರುವ ಐಪಿಎಲ್ 13ನೇ ಆವೃತ್ತಿಗೆ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ನೂತನ ಸಮವಸ್ತ್ರವನ್ನು ಸೋಮವಾರ ಅನಾವರಣಗೊಳಿಸಲಾಗಿದೆ. ಈಗಾಗಲೆ ‘ಈ ಸಲ ಕಪ್ ನಮ್ದೇ’ ಎಂದು ಮತ್ತೊಮ್ಮೆ ಘೋಷವಾಕ್ಯ ಆರಂಭಿಸಿರುವ ಆರ್ಸಿಬಿ ಅಭಿಮಾನಿಗಳು ಈ ಹೊಸ ಜೆರ್ಸಿಯಿಂದಲಾದರೂ ಪ್ರಶಸ್ತಿ ಗೆಲುವಿನ ಅದೃಷ್ಟ ಒಲಿಯುವ ನಿರೀಕ್ಷೆಯಲ್ಲಿದ್ದಾರೆ.
ಕೆಂಪು ಮತ್ತು ಕಪ್ಪು ಬಣ್ಣದ ಹೊಸ ಜೆರ್ಸಿಯ ವಿನ್ಯಾಸವನ್ನು ಆರ್ಸಿಬಿ ತಂಡ ಸೋಮವಾರ ಟ್ವಿಟರ್ನಲ್ಲಿ ಬಿಡುಗಡೆಗೊಳಿಸಿದೆ. ತಂಡದ ನಾಯಕ ವಿರಾಟ್ ಕೊಹ್ಲಿ, ಎಬಿ ಡಿವಿಲಿಯರ್ಸ್, ಪಾರ್ಥಿವ್ ಪಟೇಲ್, ಯಜುವೇಂದ್ರ ಚಾಹಲ್ ಮತ್ತು ಉಮೇಶ್ ಯಾದವ್ ಹೊಸ ಜೆರ್ಸಿ ತೊಟ್ಟು ಪೋಸ್ ನೀಡಿದ್ದಾರೆ.
ಜೆರ್ಸಿಯ ತೋಳಿನ ತುದಿಯಲ್ಲಿ ಈ ಬಾರಿ ಚಿನ್ನದ ಬಣ್ಣದ ಪಟ್ಟಿ ಇದೆ. ತಂಡದ ಹೊಸ ಲಾಂಛನವನ್ನು ಹೊಟ್ಟೆಯ ಭಾಗದಲ್ಲಿ ತೆಳುವಾಗಿ ಚಿತ್ರಿಸಲಾಗಿದೆ.
ಇದನ್ನೂ ಓದಿ: ಐಪಿಎಲ್ ಉದ್ಘಾಟನಾ ಪಂದ್ಯದಲ್ಲಿ ಸಿಎಸ್ಕೆ ಬದಲು ಕಣಕ್ಕಿಳಿಯಲಿದೆ ಆರ್ಸಿಬಿ?
‘ಇದು ಕೆಂಪು ಮತ್ತು ಗೋಲ್ಡ್ ಬಣ್ಣದ ಜೆರ್ಸಿ ಹಾಕುವ ಸಮಯ. ಸವಾಲುಗಳನ್ನು ಎದುರಿಸಿ ದಿಟ್ಟವಾಗಿ ಆಡಿ. ನಮ್ಮ ಎಲ್ಲ ಆಟಗಾರರೊಂದಿಗೆ ಕಣಕ್ಕಿಳಿಯಲು ಸಜ್ಜಾಗಿದ್ದೇವೆ’ ಎಂದು ಆರ್ಸಿಬಿ ತಂಡ ಟ್ವಿಟರ್ನಲ್ಲಿ ಬರೆದುಕೊಂಡು ಹೊಸ ಜೆರ್ಸಿ ಅನಾವರಣಗೊಳಿಸಿದೆ.