ನವದೆಹಲಿ: ಸೆಮಿಫೈನಲ್ವರೆಗಿನ ಹತ್ತೂ ಪಂದ್ಯಗಳಲ್ಲಿ ಒಂದೇ ಒಂದು ಸೋಲು ಕಾಣದ ಭಾರತ, ಫೈನಲ್ ಪಂದ್ಯದಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಮುಗ್ಗರಿಸಿ ಟ್ರೋಫಿ ಕಳೆದುಕೊಂಡ ನೋವು ಅಸಂಖ್ಯಾತ ಭಾರತೀಯರ ಮನದಲ್ಲಿ ಇನ್ನೂ ಹಸಿಯಾಗಿದೆ. ನಾಯಕ ರೋಹಿತ್ ಶರ್ಮರಂತೂ ದುಃಖ ಸಾಗರದಲ್ಲಿ ಮುಳುಗಿದ್ದಾರೆ. ಹೀಗಾಗಿ ಟೂರ್ನಿಯ ಬಳಿಕ ಎಲ್ಲೂ ಕಾಣಿಸಿಕೊಳ್ಳದೆ ಮಾಧ್ಯಮದವರಿಂದ ಅಂತರ ಕಾಯ್ದುಕೊಂಡಿದ್ದಾರೆ.
ಫೈನಲ್ ಸೋತ ಬೆನ್ನಲ್ಲೇ ನಾವಿಂದು ಉತ್ತಮವಾಗಿ ಆಡಲಿಲ್ಲ ಎಂದು ಸ್ವತಃ ರೋಹಿತ್ ಶರ್ಮ ಹೇಳಿಕೊಂಡರು. ಅದೇ ನೋವಿನಲ್ಲಿ ಹೊರಗಡೆ ಬಾರದ ರೋಹಿತ್, ಚಿಂತೆಯಲ್ಲೇ ಮುಳುಗಿರುವ ಈ ಸಮಯದಲ್ಲಿ ಅವರ ಐದು ವರ್ಷದ ಮಗಳು ಸಮೈರಾ ಮಾತನಾಡಿರುವ ಹಳೆಯ ವಿಡಿಯೋವೊಂದು ಸಾಮಾಜಿಕ ಜಾಲತಾಣದಲ್ಲಿ ಮತ್ತೆ ವೈರಲ್ ಆಗುತ್ತಿದ್ದು, ಪ್ರಸ್ತುತ ಸನ್ನಿವೇಶಕ್ಕೂ ವಿಡಿಯೋದಲ್ಲಿ ರೋಹಿತ್ ಪುತ್ರಿ ಹೇಳಿರುವ ಮಾತಿಗೂ ಹೊಂದಾಣಿಕೆಯಾಗುತ್ತಿದೆ.
ವಿಡಿಯೋದಲ್ಲಿ ಏನಿದೆ?
ತಾಯಿ ರಿತಿಕಾ ಸಾಜ್ದೇಹ್ ಜತೆ ಕಟ್ಟಡವೊಂದರಿಂದ ಹೊರಗೆ ಬರುವ ಸಮೈರಾ, ಮಾಧ್ಯಮದವರನ್ನು ನೋಡಿ ತನ್ನ ಪುಟ್ಟ ಕೈಗಳಿಂದ ಕೈ ಬೀಸುತ್ತಾರೆ. ಸುದ್ದಿಗಾರರು ಕೂಡ ಸಮೈರಾ ಕಡೆ ಕೈಬೀಸುತ್ತಾರೆ. ಸ್ವಲ್ಪ ದೂರ ಹೋಗಿ ನಿಲ್ಲುವ ಸಮೈರಾ, ಮಾಧ್ಯಮದವರ ಮುಂದೆ ತನ್ನ ತಂದೆ ರೋಹಿತ್ ಬಗ್ಗೆ ಮಾತನಾಡುತ್ತಾರೆ. ಸಮೈರಾ ಮತ್ತು ವರದಿಗಾರನ ನಡುವೆ ಸಂಭಾಷಣೆ ಈ ಕೆಳಕಂಡಂತಿದೆ.
ವರದಿಗಾರ: ನಿಮ್ಮ ತಂದೆ ಎಲ್ಲಿ?
ಸಮೈರಾ: ಅವರ ಕೋಣೆಯಲ್ಲಿದ್ದಾರೆ.
ವರದಿಗಾರ: ಅವರು ಹುಶಾರಾಗಿದ್ದಾರೆಯೇ?
ಸಮೈರಾ: ಅವರು ಬಹುತೇಕ ಪಾಸಿಟಿವ್ ಆಗಿದ್ದಾರೆ… ಆದರೆ ಇನ್ನೂ ಒಂದೇ ತಿಂಗಳಲ್ಲಿ ಅವರು ನಗುತ್ತಾರೆ.
ಹಳೆಯ ವಿಡಿಯೋ?
ಸದ್ಯ ವೈರಲ್ ಆಗಿರುವ ರೋಹಿತ್ ಪುತ್ರಿಯ ವಿಡಿಯೋ ಹಳೆಯದು. ರೋಹಿತ್ಗೆ ಕೋವಿಡ್ ಪಾಸಿಟಿವ್ ಆಗಿದ್ದ ಸಂದರ್ಭದಲ್ಲಿ ಅವರನ್ನು ನೋಡಲೆಂದು ಅವರ ಕುಟುಂಬ ಯುನೈಟೆಡ್ ಕಿಂಗ್ಡಮ್ಗೆ ತೆರಳಿತ್ತು. ಈ ವೇಳೆ ಮಾಧ್ಯಮದವರ ಮುಂದೆ ಸಮೈರಾ, ತಮ್ಮ ತಂದೆಯ ಆರೋಗ್ಯ ಸ್ಥಿತಿಯ ಬಗ್ಗೆ ಮಾತನಾಡಿದ್ದರು. ಇಷ್ಟು ಚಿಕ್ಕ ವಯಸ್ಸಿನಲ್ಲಿ ಮುಗ್ಧತೆ ಮತ್ತು ಆತ್ಮವಿಶ್ವಾಸದೊಂದಿಗೆ ಏಕಾಂಗಿಯಾಗಿ ಮಾಧ್ಯಮವನ್ನು ಆಕೆ ಎದುರಿಸಿದ ರೀತಿ ಎಲ್ಲೆಡೆ ಮೆಚ್ಚುಗೆಗೆ ಪಾತ್ರವಾಗಿದೆ.
ಅಂದಹಾಗೆ ವಿಶ್ವಕಪ್ ಫೈನಲ್ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಭಾರತ ಸೋತರೂ ರೋಹಿತ್ ಶರ್ಮರ ನಿರ್ಭೀತ ಬ್ಯಾಟಿಂಗ್ ಮತ್ತು ಮಾದರಿ ನಾಯಕತ್ವವು ಜಗತ್ತಿನ ಎಲ್ಲ ಮೂಲೆಗಳಿಂದ ತುಂಬಾ ಪ್ರಶಂಸೆಯನ್ನು ಗಳಿಸಿತು. 11 ಪಂದ್ಯಗಳಲ್ಲಿ ಒಂದು ಶತಕ ಮತ್ತು ಮೂರು ಅರ್ಧಶತಕಗಳು ಸೇರಿದಂತೆ 54.27 ರನ್ ಸರಾಸರಿಯಲ್ಲಿ 597 ರನ್ ಗಳಿಸುವ ಮೂಲಕ ಪಂದ್ಯಾವಳಿಯಲ್ಲಿ ಎರಡನೇ ಅತಿ ಹೆಚ್ಚು ರನ್ ಗಳಿಸಿದ ಆಟಗಾರನಾಗಿ ವಿಶ್ವಕಪ್ ಅಭಿಯಾನ ಮುಗಿಸಿದರು.
ಪಂದ್ಯದ ವಿಚಾರಕ್ಕೆ ಬರುವುದಾದರೆ, ನಿನ್ನೆ ಅಹಮಾಬಾದ್ನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ನಡೆದ ವಿಶ್ವಕಪ್ ಟೂರ್ನಿಯ ಮಹತ್ವದ ಫೈನಲ್ ಪಂದ್ಯದಲ್ಲಿ ಭಾರತ ನೀಡಿದ 241 ರನ್ಗಳ ಸಾಧಾರಣ ಗುರಿ ಬೆನ್ನತ್ತಿದ ಆಸಿಸ್ ಕೇವಲ 43 ಓವರ್ಗಳಲ್ಲಿ 4 ವಿಕೆಟ್ ನಷ್ಟಕ್ಕೆ 241 ರನ್ ಗಳಿಸುವ ಮೂಲಕ ಸುಲಭವಾಗಿ ಗುರಿ ಮುಟ್ಟಿತು. ಕೇವಲ 47 ರನ್ಗಳಿಗೆ ಪ್ರಮುಖ 3 ವಿಕೆಟ್ ಕಳೆದುಕೊಂಡ ಸಂಕಷ್ಟಕ್ಕೆ ಸಿಲುಕಿದ ಆಸಿಸ್ಗೆ ಟ್ರಾವಿಸ್ ಹೆಡ್ ಆಪತ್ಭಾಂದವರಾದರು. ನಿರ್ಣಾಯಕ ಪಂದ್ಯದಲ್ಲಿ ಅಮೋಘ ಶತಕ ಸಿಡಿಸಿದ ಹೆಡ್ ( 137 ರನ್ 120 ಎಸೆತ 15 ಬೌಂಡರಿ, 4ಸಿಕ್ಸರ್) , ಆಸಿಸ್ಗೆ ಸುಲಭ ಗೆಲುವು ತಂದುಕೊಟ್ಟರು. ಹೆಡ್ ಜತೆಗೆ ಮಾರ್ನಸ್ ಲಬುಶೇನ್ ಉತ್ತಮ ಸಾಥ್ ನೀಡಿದರು. ಈ ಜೋಡಿ ನಿರ್ಣಾಯಕ ಪಂದ್ಯದಲ್ಲಿ 192 ರನ್ಗಳ ಅಮೋಘ ಜತೆಯಾಟವಾಡಿದರು. ತಾಳ್ಮೆಯ ಆಟವಾಡಿದ ಲಬುಶೇನ್ 110 ಎಸೆತಗಳಲ್ಲಿ 4 ಬೌಂಡರಿಯೊಂದಿಗೆ 58 ರನ್ಗಳ ಅರ್ಧಶತಕ ಸಿಡಿಸಿ ಮಿಂಚಿದರು. (ಏಜೆನ್ಸೀಸ್)
ವಿಶ್ವಕಪ್ ಫೈನಲ್ನಲ್ಲಿ ಭಾರತ ಹೀನಾಯ ಸೋಲು: ರೋಹಿತ್ ಶರ್ಮ ಕೊಟ್ಟ ಕಾರಣ ಹೀಗಿದೆ…
ಕೊನೇ ಎಸೆತದಲ್ಲಿ ರಿಂಕು ಸಿಂಗ್ ಸಿಡಿಸಿದ ಸಿಕ್ಸರ್ ವ್ಯರ್ಥವಾಗಿದ್ದೇಕೆ? ಗೆಲುವಿನ ಸಿಕ್ಸರ್ಗೆ “ನೋ” ಎಂದ ಅಂಪೈರ್!