ಬೆಂಗಳೂರು: ರಾಜಸ್ಥಾನ್ ರಾಯಲ್ಸ್ ತಂಡವು ಇತ್ತೀಚೆಗೆ ಭಾರಿ ಜನಪ್ರಿಯತೆ ಗಳಿಸುತ್ತಿದ್ದು, ಟಿವಿ ವೀಕ್ಷಣೆಯ ಪೀಕ್ ಕನ್ಕರೆನ್ಸಿ ಪಟ್ಟಿಯಲ್ಲಿ ಇದೇ ಮೊದಲ ಸಲ ಟಾಪ್-10 ಸ್ಥಾನಕ್ಕೆ ಪ್ರವೇಶ ಮಾಡಿದೆ. ಸ್ಟಾರ್ಸ್ಪೋರ್ಟ್ಸ್ನಲ್ಲಿ ಪ್ರಸಾರವಾದ ರಾಜಸ್ಥಾನ್ ರಾಯಲ್ಸ್ ಮತ್ತು ಮುಂಬೈ ಇಂಡಿಯನ್ಸ್ ನಡುವಿನ ಪಂದ್ಯದ ಮೂಲಕ ಇದು ಇಂಥದ್ದೊಂದು ಹೆಗ್ಗಳಿಕೆಗೆ ಪಾತ್ರವಾಗಿದೆ.
ಒಟ್ಟು 48 ಪಂದ್ಯಗಳ ಪೈಕಿ 29 ಪಂದ್ಯಗಳು ಟಿವಿ ವೀಕ್ಷಣೆಯಲ್ಲಿ 3 ಕೋಟಿಗೂ ಅಧಿಕ ಪೀಕ್ ಕನ್ಕರೆನ್ಸಿ ಹೊಂದಿದ್ದು, ಆ ಪೈಕಿ ಚೆನ್ನೈ ಸೂಪರ್ ಕಿಂಗ್ಸ್-ಪಂಜಾಬ್ ಕಿಂಗ್ಸ್, ರಾಜಸ್ಥಾನ ರಾಯಲ್ಸ್- ಮುಂಬೈ ಇಂಡಿಯನ್ಸ್ ಮತ್ತು ಪಂಜಾಬ್ ಕಿಂಗ್ಸ್-ಮುಂಬೈ ಇಂಡಿಯನ್ಸ್ ನಡುವಿನ ಪಂದ್ಯಗಳೂ ಸೇರಿದ್ದು, ಪ್ರಮುಖ ಎನಿಸಿಕೊಂಡಿವೆ.
ಏಪ್ರಿಲ್ 30ರಂದು ನಡೆದ ಚೆನ್ನೈ ಸೂಪರ್ ಕಿಂಗ್ಸ್ ವರ್ಸಸ್ ಪಂಜಾಬ್ ಕಿಂಗ್ಸ್ ಪಂದ್ಯದ ಪೀಕ್ ಕನ್ಕರೆನ್ಸಿ 3.5 ಕೋಟಿ ಆಗಿತ್ತು. ಅದೇ ದಿನ ನಡೆದಿದ್ದ ರಾಜಸ್ಥಾನ್ ರಾಯಲ್ಸ್ ವರ್ಸಸ್ ಮುಂಬೈ ಇಂಡಿಯನ್ಸ್ ಪಂದ್ಯದ ಪೀಕ್ ಕನ್ಕರೆನ್ಸಿ 4 ಕೋಟಿ ದಾಖಲಾಗಿತ್ತು. ಇನ್ನು ಮೇ 3ರಂದು ನಡೆದಿದ್ದ ಪಂಜಾಬ್ ಕಿಂಗ್ಸ್ ವರ್ಸಸ್ ಮುಂಬೈ ಇಂಡಿಯನ್ಸ್ ನಡುವೆ ನಡೆದ ಪಂದ್ಯದ ಪೀಕ್ ಕನ್ಕರೆನ್ಸಿ ಕೂಡ 3.5 ಕೋಟಿ ಆಗಿತ್ತು.
ಮುಂಬೈ ಇಂಡಿಯನ್ಸ್ ಜತೆಗೆ ರಾಜಸ್ಥಾನ್ ರಾಯಲ್ಸ್ ಟಾಪ್-10 ಲಿಸ್ಟ್ಗೆ ಪ್ರವೇಶ ಮಾಡಿದ್ದರೆ, ಸಿಎಸ್ಕೆ ಬಳಿಕದ ಅತಿ ಹೆಚ್ಚು ಪಂದ್ಯಗಳಲ್ಲಿ ಕಾಣಿಸಿದ ತಂಡವಾಗುವಲ್ಲಿ ಮುಂಬೈ ಇಂಡಿಯನ್ಸ್ ಮತ್ತು ಆರ್ಸಿಬಿ ನಡುವೆ ಪೈಪೋಟಿ ಕಂಡಿದೆ. ಟಾಪ್-10 ಅತಿ ಹೆಚ್ಚು ವೀಕ್ಷಣೆ ಪಡೆದ ಪಂದ್ಯಗಳಲ್ಲಿ ನಾಲ್ಕು ಬಾರಿ ಆರ್ಸಿಬಿ ತಂಡ ಕಾಣಿಸಿಕೊಂಡಿದ್ದು ಸದ್ಯ ಎರಡನೇ ಸ್ಥಾನದಲ್ಲಿದೆ. ಇನ್ನು ಮುಂಬೈ ಇಂಡಿಯನ್ಸ್ ತಂಡ ಎರಡು ಸಲ ಟಾಪ್-10 ಅತಿ ಹೆಚ್ಚು ವೀಕ್ಷಿತ ಪಂದ್ಯಗಳ ಪಟ್ಟಿಯಲ್ಲಿ ಕಾಣಿಸಿಕೊಂಡಿದೆ.
