ಬೆಂಗಳೂರು: ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಕೆಜಿಎಫ್ ಚಾಪ್ಟರ್-2 ಸಿನಿಮಾ ಬಾಕ್ಸ್ಆಫೀಸ್ನಲ್ಲಿ ಧೂಳೆಬ್ಬಿಸಿದೆ. ಸಾವಿರ ಕೋಟಿ ರೂಪಾಯಿ ದಾಟಿದ ಕನ್ನಡದ ಮೊದಲ ಹಾಗೂ ಭಾರತದ ನಾಲ್ಕನೇ ಸಿನಿಮಾ ಎಂಬ ಹೆಗ್ಗಳಿಕೆ ಪಾತ್ರವಾಗಿದೆ. ಇದೀಗ ಅಭಿಮಾನಿಗಳ ಗಮನ ಕೆಜಿಎಫ್ ಚಾಪ್ಟರ್ 3 ಕಡೆಗಿದೆ. ಕೆಜಿಎಫ್-2ನಲ್ಲಿ ಮೂರನೇ ಭಾಗದ ಸುಳಿವು ನೀಡಿದ್ದು, ಅಭಿಮಾನಿಗಳ ಖುಷಿಗೆ ಪಾರವೇ ಇಲ್ಲದಂತಾಗಿದೆ. ಆದರೆ, ಕೆಜಿಎಫ್ 3 ಯಾವಾಗ ಆರಂಭವಾಗುತ್ತದೆ? ಮತ್ತು ಯಾವಾಗ ಬಿಡುಗಡೆಯಾಗಲಿದೆ? ಎಂಬ ಪ್ರಶ್ನೆಯು ಹುಟ್ಟಿಕೊಂಡಿದ್ದು, ಅದಕ್ಕೆ ಉತ್ತರ ಇಲ್ಲಿದೆ.
ಬೇಸರದ ವಿಚಾರ ಏನೆಂದರೆ, ಕೆಜಿಎಫ್ 3 ಸದ್ಯಕ್ಕಂತೂ ಬರುವುದಿಲ್ಲ. ಕೆಜಿಎಫ್-2ಗೆ ಕಾದಿದ್ದಷ್ಟೇ ಸಮಯವನ್ನು ಅಮೂರನೇ ಭಾಗಕ್ಕೂ ಕಾಯಬೇಕಾಗುತ್ತದೆ. ಚಿತ್ರತಂಡ ಕೆಜಿಎಫ್ 3 ಕುರಿತ ಕೆಲವೊಂದಿಷ್ಟು ಸುಳಿವು ಬಿಟ್ಟರೆ, ಹೆಚ್ಚೇನು ಹೇಳಿಲ್ಲ. ಯಶ್ ಸೇರಿದಂತೆ ಕೆಜಿಎಫ್ 2 ಚಿತ್ರದ ಕಲಾವಿದರು ಹೇಳಿರುವ ಪ್ರಕಾರ ಕೆಜಿಎಫ್ 3 ಬರುವುದು ಗ್ಯಾರೆಂಟಿ. ಆದರೆ, ಯಾವಾಗ ಬರುತ್ತದೆ? ಶೂಟಿಂಗ್ ಆರಂಭ ಯಾವಾಗ? ಯಾವ ವರ್ಷ ಬಿಡುಗಡೆಯಾಗಬಹುದು ಎಂಬಿತ್ಯಾದಿ ಪ್ರಶ್ನೆಗಳಿಗೆ ಉತ್ತರ ಮುಂದಿದೆ ಓದಿ.
ಎಲ್ಲವೂ ಅಂದುಕೊಂಡಂತೆ ನಡೆದರೆ, ಕೆಜಿಎಫ್-3 ಚಿತ್ರದ ಶೂಟಿಂಗ್ 2023ರ ಅಂತ್ಯದಲ್ಲಿ ಪ್ರಾರಂಭವಾಗಲಿದೆ. ನಟ ಯಶ್ 2024ಕ್ಕೆ ಶೂಟಿಂಗ್ನಲ್ಲಿ ತೊಡಗಿಕೊಳ್ಳುವ ಸಾಧ್ಯತೆ ಇದೆ. ಎಡಿಟಿಂಗ್ ಮತ್ತು ವಿಎಫ್ಎಕ್ಷ್ ಎಲ್ಲ ಪ್ರಕ್ರಿಯೆಗಳನ್ನು ಮುಗಿಸಿಕೊಂಡು 2025ನೇ ವರ್ಷಕ್ಕೆ ಚಿತ್ರಮಂದಿರಗಳಿಗೆ ಲಗ್ಗೆ ಇಡುವ ಸಾಧ್ಯತೆ ಇದೆ ಎಂಬ ಮಾತುಗಳು ಟಾಲಿವುಡ್ ಗಲ್ಲಿಯಿಂದ ಕೇಳಿಬರುತ್ತದೆ. ಏಕೆಂದರೆ, ಸದ್ಯ ಪ್ರಶಾಂತ್ ನೀಲ್ ತೆಲುಗಿನಲ್ಲಿ ಬೀಡುಬಿಟ್ಟಿರುವುದರಿಂದ ಪ್ರಶಾಂತ್ ಕುರಿತ ಸುದ್ದಿಗಳು ಟಾಲಿವುಡ್ನಲ್ಲಿ ಹೆಚ್ಚು ಪ್ರಕಟವಾಗುತ್ತಿವೆ.
ಸದ್ಯ ನಿರ್ದೇಶಕ ಪ್ರಶಾಂತ್ ನೀಲ್ ಪ್ರಭಾಸ್ ನಟನೆಯ ಸಲಾರ್ ಚಿತ್ರದ ಮೇಲೆ ಸಂಪೂರ್ಣ ಗಮನ ಹರಿಸಿದ್ದಾರೆ. ಕೆಜಿಎಫ್-2 ಬಿಡುಗಡೆಗೆ ಕೊಂಚ ಸಮಯ ತೆಗೆದುಕೊಂಡಿದ್ದ ಪ್ರಶಾಂತ್ ಇದೀಗ ಮತ್ತೆ ಸಲಾರ್ ಶೂಟಿಂಗ್ನಲ್ಲಿ ತೊಡಗಿಸಿಕೊಂಡಿದ್ದಾರೆ. ಈ ಚಿತ್ರ ಮುಗಿಯಲು ಒಂದು ವರ್ಷಕ್ಕೂ ಅಧಿಕ ಸಮಯ ತೆಗೆದುಕೊಳ್ಳಲಿದೆ. ಸಲಾರ್ ಪೂರ್ಣಗೊಂಡ ಬಳಿಕ ಜೂ.ಎನ್ಟಿಆರ್ ಅವರ ಮತ್ತೊಂದು ಚಿತ್ರವನ್ನು ಕೈಗೆತ್ತಿಕೊಳ್ಳಲಿದ್ದಾರೆ. ಆ ಚಿತ್ರ ಮುಗಿಯಲು ಮತ್ತೆ ಒಂದು ವರ್ಷ ಆಗಬಹುದು. ಇದಾದ ಬಳಿಕ ಕೆಜಿಎಫ್ 3 ಕೈಗೆತ್ತಿಕೊಂಡರು ಒಂದು ವರ್ಷ ಶೂಟಿಂಗ್ ಅಂತಾ ಲೆಕ್ಕ ಹಾಕಿದರೂ ಕನಿಷ್ಟ ಅಂದ್ರು ಇನ್ನು 3 ವರ್ಷ ಆಗುತ್ತದೆ.
ಮತ್ತೊಮ್ಮೆ ಕೆಜಿಎಫ್ ಚಿತ್ರತಂಡದ ದೃಶ್ಯ ವೈಭವ ಹಾಗೂ ಪವರ್ಫುಲ್ ಆ್ಯಕ್ಷನ್ ಚಿತ್ರವನ್ನು ನೋಡಲು ಇನ್ನಷ್ಟು ವರ್ಷಗಳು ಕಾಯಬೇಕಾಗಿರುವುದು ಒಂದು ಮಟ್ಟಿಗೆ ಬೇಸರ ಉಂಟು ಮಾಡಿರುವುದಂತೂ ಸತ್ಯ. ಆದರೂ ಕಾದಷ್ಟು ಮತ್ತೊಂದು ಒಳ್ಳೆಯ ಸಿನಿಮಾ ಸಿಗಲಿದೆ ಎಂಬುದೇ ಸಮಾಧಾನಕರ ಸಂಗತಿಯು ಆಗಿದೆ. ಮುಂದಿನ ದಿನಗಳಲ್ಲಿ ಯಾವ ಅಪ್ಡೇಟ್ಗಳು ಈ ಸಿನಿಮಾ ಬಗ್ಗೆ ಬರಲಿವೆ ಎಂದು ಕಾದು ನೋಡಬೇಕಿದೆ. ಈ ಮೇಲಿನ ಮಾಹಿತಿ ಸಿನಿ ಮೂಲಗಳಿಂದ ಬಂದದ್ದಾಗಿದೆ. ಆದರೆ, ಚಿತ್ರತಂಡ ಏನನ್ನೂ ಹೇಳಿಲ್ಲ. ಮುಂದಿನ ದಿನಗಳಲ್ಲಿ ಚಿತ್ರತಂಡ ಏನು ಹೇಳಲಿದೆ ಎಂಬುದೇ ಕುತೂಹಲಕಾರಿಯಾಗಿದೆ. (ಏಜೆನ್ಸೀಸ್)
ಕಾಸರಗೋಡಿನ ನಟಿ-ರೂಪದರ್ಶಿ ಸಂಶಯಾಸ್ಪದ ಸಾವು: ಮೃತಳ ಮನೆಯಲ್ಲಿ ಪತ್ತೆಯಾಯ್ತು ಅಪಾಯಕಾರಿ ವಸ್ತು!
ಆ್ಯಸಿಡ್ ದಾಳಿ ಪ್ರಕರಣ: ಎಸ್ಕೇಪ್ ಆಗಲು ಹೈಡ್ರಾಮ ಮಾಡಿದ ಆರೋಪಿ ನಾಗೇಶ್ ಕಾಲಿಗೆ ಗುಂಡೇಟು