ಕಿಯೆವ್/ಮಾಸ್ಕೋ: ರಷ್ಯಾ ಮತ್ತು ಯೂಕ್ರೇನ್ ನಡುವಿನ ಯುದ್ಧ ಮೂರನೇ ದಿನವು ಮುಂದುವರಿದಿದೆ. ಈಗಾಗಲೇ ರಷ್ಯಾ ಪಡೆಗಳು ಅನೇಕ ನಗರಗಳನ್ನು ತಮ್ಮ ವಶಕ್ಕೆ ಪಡೆದುಕೊಂಡಿದ್ದು, ಇಡೀ ಯೂಕ್ರೇನ್ ಅನ್ನು ಆಕ್ರಮಿಸಿಕೊಳ್ಳುವತ್ತ ಮುನ್ನುಗುತ್ತಿದೆ. ರಷ್ಯಾ ವಿರುದ್ಧ ಯೂಕ್ರೇನ್ ಯೋಧರು ತೊಡೆ ತಟ್ಟಿ ನಿಂತಿದ್ದರೂ ರಷ್ಯಾ ಸೈನಿಕರ ಸಂಖ್ಯೆಗಿಂತ ಯೂಕ್ರೇನ್ ಸೈನಿಕರ ಸಂಖ್ಯೆ ಕಡಿಮೆ ಇರುವುದರಿಂದ ತಮ್ಮ ದೇಶವನ್ನು ಉಳಿಸಿಕೊಳ್ಳಲು ಅಲ್ಲಿನ ನಾಗರಿಕರು ಕೂಡ ಸಾಥ್ ನೀಡಿದ್ದು, ಗನ್ ಹಿಡಿದು ರಣಾಂಗಕ್ಕೆ ಇಳಿದಿದ್ದಾರೆ.
ಯೂಕ್ರೇನ್ನ ಸಂಸದೆ ಹಾಗೂ ಅಮೇಜಾನ್ ಒಡೆತನದ ರಿಂಗ್ ಯೂಕ್ರೇನ್ ಕಂಪನಿಯ ಮಾಜಿ ಸಿಇಒ ಕೈರಾ ರುಡಿಕ್ ಕೂಡ ಗನ್ ಹಿಡಿದು ಯುದ್ಧಭೂಮಿಗೆ ಇಳಿದಿದ್ದಾರೆ. ಗನ್ ಹಿಡಿದಿರುವ ಫೋಟೋವನ್ನು ಟ್ವಿಟರ್ನಲ್ಲಿ ಶೇರ್ ಮಾಡಿಕೊಂಡಿರುವ ಕೈರಾ, ಮಹಿಳೆಯು ಕೂಡ ತಮ್ಮ ತಾಯ್ನಾಡನ್ನು ಉಳಿಸಿಕೊಳ್ಳುತ್ತಾರೆ ಎಂದಿದ್ದಾರೆ.
ಸಾಮಾನ್ಯಾ ಜನರು ಮಾತ್ರವಲ್ಲದೆ, ಹಿರಿಯ ನಾಗರಿಕರು, ಅಥ್ಲೆಟಿಗಳು ಕೂಡ ತಾಯ್ನಾಡನ್ನು ರಷ್ಯಾದಿಂದ ಉಳಿಸಿಕೊಳ್ಳಲು ಹೋರಾಟಕ್ಕೆ ಇಳಿದಿದ್ದಾರೆ. ಮಹಿಳೆಯರು ಕೂಡ ಯೂಕ್ರೇನ್ ಸೇನೆಗೆ ಸಾಥ್ ನೀಡಿದ್ದಾರೆ. ಯೂಕ್ರೇನ್ ಮಾಜಿ ಅಧ್ಯಕ್ಷ ಪಿಟ್ರೋ ಪೊರೊಶೆಂಕೋ ಕೂಡ ಈಗಾಗಲೇ ಗನ್ ಹಿಡಿದು ಯುದ್ಧಕ್ಕೆ ಇಳಿದಿದ್ದಾರೆ. ಜನರಿಗೆ ಸ್ಫೂರ್ತಿ ತುಂಬಲು ಹಾಲಿ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿ ಸೇನಾ ಸಮವಸ್ತ್ರವನ್ನು ಧರಿಸಿದ್ದಾರೆ.
ಇದೀಗ ಸಂಸದೆ ಕೈರಾ ಅವರ ಪೋಸ್ಟ್ಗೆ ಟ್ವಿಟರ್ನಲ್ಲಿ ಉತ್ತಮ ಪ್ರತಿಕ್ರಿಯೆಗಳು ಬರುತ್ತಿವೆ. ಅವರ ಧೈರ್ಯಕ್ಕೆ ಎಲ್ಲರು ಮೆಚ್ಚು ವ್ಯಕ್ತಪಡಿಸಿದ್ದಾರೆ. ಗನ್ ಬಳಸುವಾಗ ಒಂದೂ ಗುಂಡು ವ್ಯರ್ಥವಾಗದಂತೆ ಹುಷಾರಾಗಿ ಬಳಸುವಂತೆ ಸಲಹೆ ನೀಡಿದ್ದಾರೆ. ಸಾಕಷ್ಟು ಯೂಕ್ರೇನಿಯನ್ನರು ಹೋರಾಟಕ್ಕಾಗಿ ಬೀದಿಗೆ ಇಳಿದಿರುವುದನ್ನು ನೋಡಿ ಸ್ಪೂರ್ತಿಗೊಂಡು ಅನೇಕರು ರಣಾಂಗಣಕ್ಕೆ ಇಳಿಯುತ್ತಿದ್ದು, ರಷ್ಯಾದಿಂದ ತಮ್ಮ ದೇಶವನ್ನು ಕಾಪಾಡಿಕೊಳ್ಳಲು ಪ್ರಯತ್ನಿಸುತ್ತಿದ್ದಾರೆ.
ರಷ್ಯಾ ದಾಳಿಗೆ ಈಗಾಗಲೇ ಯೂಕ್ರೇನ್ ನಲುಗಿ ಹೋಗಿದೆ. ನೂರಾರು ಜನರ ಪ್ರಾಣ ಹೋಗಿದ್ದು, ಸಾಕಷ್ಟು ಆಸ್ತಿ-ಪಾಸ್ತಿ ನಷ್ಟವಾಗಿದೆ. ಶಸ್ತ್ರಾಸ್ತ್ರ ತ್ಯಜಿಸಿ ಸಂಧಾನಕ್ಕೆ ಬರುವುದಾದರೆ ಮಾತುಕತೆಗೆ ಸಿದ್ಧ ಎಂದು ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುತಿನ್ ಹೇಳಿದ್ದಾರೆ. ಇತ್ತ ವಿಶ್ವಸಂಸ್ಥೆ ಭದ್ರತಾ ಮಂಡಳಿಯ ರಷ್ಯಾ ವಿರುದ್ಧ ಮಂಡಿಸಿರುವ ಕರಡು ನಿರ್ಣಯಕ್ಕೆ 11 ರಾಷ್ಟ್ರಗಳು ಬೆಂಬಲ ಸೂಚಿಸಿದ್ದು, ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯಲ್ಲಿ ಈ ವಿಚಾರ ಚರ್ಚೆಯಾಗಲಿದೆ. ಸದ್ಯ ಯುದ್ಧ ಮುಂದುವರಿದಿರುವುದುರಿಂದ ಇನ್ನಷ್ಟು ಹಾನಿಗಳು ಸಂಭವಿಸುವ ಸಾಧ್ಯತೆ ಇದೆ. (ಏಜೆನ್ಸೀಸ್)
2016ರಲ್ಲಿ ರದ್ದಾದ ನೋಟನ್ನು ಬದಲಾಯಿಸಲು ಇವರಿಗೆ ಈಗ ಹೈಕೋರ್ಟ್ ನೀಡಿತು ಅನುಮತಿ…
ಅಕ್ರಮ ಸಂಬಂಧ ಮುಂದುವರಿಸಲು ಪತಿಯ ವಿರುದ್ಧ ಸಂಚು ರೂಪಸಿದ ಪತ್ನಿಗೆ ಮರುಕ್ಷಣದಲ್ಲೇ ಬಿಗ್ ಶಾಕ್!