ಸ್ಯಾನ್ಫ್ರಾನ್ಸಿಸ್ಕೋ: ಟೆಸ್ಲಾ ಕಂಪನಿಯ ಸಂಸ್ಥಾಪಕ ಮತ್ತು ವಿಶ್ವದ ಅತ್ಯಂತ ಶ್ರೀಮಂತ ವ್ಯಕ್ತಿ ಎನಿಸಿಕೊಂಡಿರುವ ಎಲಾನ್ ಮಸ್ಕ್ ಅವರು ಟೆಕ್ ದೈತ್ಯ ಟ್ವಿಟರ್ ಕಂಪನಿಗೆ ಶುಕ್ರವಾರ ಶಾಕ್ ನೀಡಿದ್ದಾರೆ. ಟ್ವಿಟರ್ ಖರೀದಿಸುವ 44 ಬಿಲಿಯನ್ ಡಾಲರ್ ಒಪ್ಪಂದವನ್ನು ಮಸ್ಕ್, ದಿಢೀರನೇ ಮುರಿದುಕೊಂಡಿದ್ದಾರೆ.
ನಕಲಿ ಖಾತೆಗಳ ಬಗ್ಗೆ ಮಾಹಿತಿ ನೀಡುವಂತೆ ಮನವಿ ಮಾಡಿದರೂ ಮಾಹಿತಿ ನೀಡದ್ದಕ್ಕೆ ಒಪ್ಪಂದವನ್ನು ಮುರಿದುಕೊಂಡಿರುವುದಾಗಿ ಮಸ್ಕ್ ಸ್ಪಷ್ಟನೆ ನೀಡಿದ್ದಾರೆ. ಮಸ್ಕ್ ಅವರ ಈ ದಿಢೀರ್ ನಿರ್ಧಾರದಿಂದ ಜಾಗತಿಕ ಷೇರು ಮಾರುಕಟ್ಟೆಯಲ್ಲಿ ಟ್ವಿಟರ್ ಷೇರುಗಳು 7 ರಷ್ಟು ಕುಸಿತಕಂಡಿದೆ. ಮಸ್ಕ್ ಅವರು ಕಳೆದ ಏಪ್ರಿಲ್ನಲ್ಲಿ ಟ್ವಿಟರ್ನ ಪ್ರತಿ ಷೇರಿಗೆ 54.20 ಡಾಲರ್ ಆಫರ್ ಮಾಡಿದ್ದರು.
ಮಸ್ಕ್ ನಿರ್ಧಾರದ ಬೆನ್ನಲ್ಲೇ ಟ್ವೀಟ್ ಮಾಡಿರುವ ಟ್ವಿಟರ್ ಮುಖ್ಯಸ್ಥ ಬ್ರೆಟ್ ಟಯ್ಲೋ, ವಿಲೀನ ಒಪ್ಪಂದವನ್ನು ಜಾರಿಗೊಳಿಸಲು ಕಾನೂನು ಕ್ರಮ ಕೈಗೊಳ್ಳುವುದಾಗಿ ಟ್ವಿಟರ್ ಮಂಡಳಿ ಯೋಜಿಸಿದೆ ಎಂದಿದ್ದಾರೆ. ಅಲ್ಲದೆ, ಮಸ್ಕ್ ಜತೆಗಿನ ಒಪ್ಪಂದದ ಬೆಲೆ ಮತ್ತು ಷರತ್ತುಗಳ ಮೇಲೆ ವಹಿವಾಟನ್ನು ಮುಚ್ಚಲು ಟ್ವಿಟರ್ ಮಂಡಳಿ ಬದ್ಧವಾಗಿದೆ ಎಂದು ಬ್ರೆಟ್ ಟಯ್ಲೋ ತಿಳಿಸಿದ್ದಾರೆ.
ಎಲನ್ ಮಸ್ಕ್ ಪರ ವಕೀಲರು ಈ ಸಂಬಂಧ ಸ್ಪಷ್ಟನೆ ನೀಡಿದ್ದಾರೆ. ಸಾಕಷ್ಟು ಬಾರಿ ಮನವಿ ಮಾಡಿದರು ನಕಲಿ ಅಥವಾ ಸ್ಪ್ಯಾಮ್ ಖಾತೆಗಳ ಬಗ್ಗೆ ಪ್ರತಿಕ್ರಿಯಿಸಲು ಟ್ವಿಟರ್ ನಿರಾಕರಿಸಿದೆ. ಈ ಮಾಹಿತಿಯುಇದು ಕಂಪನಿಯ ವ್ಯವಹಾರ ಕಾರ್ಯಕ್ಷಮತೆಗೆ ಮೂಲಭೂತವಾಗಿದೆ ಎಂದು ಹೇಳಿದ್ದಾರೆ.
ಒಪ್ಪಂದಕ್ಕೆ ಸಂಬಂಧಿಸಿದಂತೆ ಟ್ವಿಟರ್ನಿಂದ ಹಲವು ಬಾರಿ ನಿಯಮಗಳ ಉಲ್ಲಂಘನೆಯಾಗಿದೆ. ವಿಲೀನ ಒಪ್ಪಂದಕ್ಕೆ ಮಸ್ಕ್ ಪ್ರವೇಶಿಸುವಾಗ ತಪ್ಪು ಮತ್ತು ತಪ್ಪುದಾರಿಗೆಳೆಯುವ ಪ್ರಾತಿನಿಧ್ಯಗಳನ್ನು ಮಾಡಿದೆ ಎಂದು ಗೋಚರಿಸುತ್ತಿದೆ ಎಂದು ಮಸ್ಕ್ ಲಾಯರ್ ವಿವರಣೆ ನೀಡಿದ್ದಾರೆ.
ಇನ್ನು ಒಪ್ಪಂದದ ನಿಯಮಗಳ ಪ್ರಕಾರ ಮಸ್ಕ್ ಅವರು ವಹಿವಾಟನ್ನು ಪೂರ್ಣಗೊಳಿಸದಿದ್ದರೆ 1 ಬಿಲಿಯನ್ ಡಾಲರ್ ಬ್ರೇಕ್-ಅಪ್ ಶುಲ್ಕವನ್ನು ಪಾವತಿಸಬೇಕಾಗುತ್ತದೆ.
ಸಾಮಾಜಿಕ ಜಾಲತಾ ಸೇವೆಯಲ್ಲಿ ಜಾಹೀರಾತುಗಳನ್ನು ನೋಡುವ ಬಳಕೆದಾರರಲ್ಲಿ ಸ್ಪ್ಯಾಮ್ ಮತ್ತು ಬೋಟ್ ಖಾತೆಗಳು 5% ಕ್ಕಿಂತ ಕಡಿಮೆ ಇವೆ ಎಂದು ಕಂಪನಿಯು ಪುರಾವೆಗಳನ್ನು ತೋರಿಸದ ಹೊರತು ಒಪ್ಪಂದವನ್ನು ನಿಲ್ಲಿಸುವುದಾಗಿ ಈ ಹಿಂದೆಯೇ ಮಸ್ಕ್ ಬೆದರಿಕೆ ಹಾಕಿದ್ದರು.
ಇದೀಗ ಟ್ವಿಟರ್ ಒಪ್ಪಂದವನ್ನು ಮಸ್ಕ್ ಮುರಿದುಕೊಂಡಿರುವುದರಿಂದ ಬಿಲಿಯನೇರ್ ಮತ್ತು ಸ್ಯಾನ್ ಫ್ರಾನ್ಸಿಸ್ಕೋ ಮೂಲದ ಟ್ವಿಟರ್ ಕಂಪನಿಯ ನಡುವೆ ಸುದೀರ್ಘ ಕಾನೂನು ಜಗಳಕ್ಕೆ ಕಾರಣವಾಗುವ ಸಾಧ್ಯತೆಯಿದೆ. (ಏಜೆನ್ಸೀಸ್)
ಭಾರತದಲ್ಲಿ ಮುಂದಿನ 5 ವರ್ಷದಲ್ಲಿ ಪೆಟ್ರೋಲ್ ಬಳಕೆಯೇ ಇರುವುದಿಲ್ಲ: ಸಚಿವ ನಿತಿನ್ ಗಡ್ಕರಿ
ಹೆಣ್ಣು ಮಕ್ಕಳೇ ಹುಷಾರ್… ಯುವ ನಿರ್ಮಾಪಕರಿಬ್ಬರ ಕರಾಳ ಮುಖ ಬಯಲು ಮಾಡಿದ ನಟಿ ಚಾರ್ಮಿಳಾ