ತಿರುವನಂತಪುರಂ: ಇಂಧನ ದರ ಏರಿಕೆಯಿಂದ ತತ್ತರಿಸಿ ಹೋಗಿರುವ ಜನರು ಇಂದಲ್ಲ ನಾಳೆ ಪೆಟ್ರೋಲ್-ಡೀಸೆಲ್ ಬೆಲೆ ಕಡಿಮೆ ಆಗುತ್ತದೆ ಎಂಬ ಆಸೆಗಣ್ಣಿನಿಂದ ಎದುರು ನೋಡುತ್ತಿದ್ದಾರೆ. ಆದರೆ, ಬೆಲೆ ಇಳಿಯುವ ಲಕ್ಷಣಗಳು ಕಾಣಿಸುತ್ತಿಲ್ಲ. ಈಗಾಗಲೇ ಪೆಟ್ರೋಲ್ ಬೆಲೆ ನೂರರ ಗಡಿ ದಾಟಿದ್ದು, ಇದೇ ಮೊದಲ ಬಾರಿಗೆ ಕೇರಳದಲ್ಲಿ ಡೀಸೆಲ್ ಬೆಲೆ ನೂರರ ಗಡಿ ಮುಟ್ಟಿದೆ.
ವೀಕೆಂಡ್ ಮೋಜಿಗಾಗಿ ಹೊರಗಡೆ ಹೋಗಲು ಪ್ಲಾನ್ ಹಾಕಿಕೊಂಡಿದ್ದವರ ಜೇಬಿಗೆ ಪೆಟ್ರೋಲ್-ಡೀಸೆಲ್ ದರ ಭಾರವಾಗಿದೆ. ಕೇರಳದಲ್ಲಿ ಭಾನುವಾರ ಡೀಸೆಲ್ ದರ ಪ್ರತಿ ಲೀಟರ್ 100.11 ರೂಪಾಯಿಗೆ ತಲುಪಿದೆ. ಕೇರಳ ರಾಜಧಾನಿ ತಿರುವನಂತಪುರದ ಪರಸ್ಸಾಲಾ ದಾಖಲೆ ಬೆಲೆ ಏರಿಕೆಗೆ ಸಾಕ್ಷಿಯಾಗಿದೆ.
ಪೆಟ್ರೋಲಿಯಂ ಕಂಪನಿಗಳು ನಿರಂತರವಾಗಿ ಇಂಧನ ದರ ಏರಿಸುತ್ತಿರುವ ಪರಿಣಾಮ ಜನರ ಸಂಕಷ್ಟಕ್ಕೆ ಸಿಲುಕಿ ಪರದಾಡುವಂತಾಗಿದೆ. ಆಯಿಲ್ ಕಂಪನಿಗಳು ಭಾನುವಾರ ಪೆಟ್ರೋಲ್ ಬೆಲೆಯಲ್ಲಿ 32 ಪೈಸೆ ಮತ್ತು ಡೀಸೆಲ್ ಬೆಲೆಯಲ್ಲಿ 38 ಪೈಸೆ ಏರಿಕೆ ಮಾಡಿವೆ. ಕಳೆದ 17 ದಿನಗಳಲ್ಲಿ ಪ್ರತಿ ಲೀಟರ್ ಡೀಸೆಲ್ಗೆ 4.55 ರೂ. ಮತ್ತು ಪೆಟ್ರೋಲ್ಗೆ 2.99 ರೂಪಾಯಿ ಹೆಚ್ಚಳವಾಗಿದೆ.
ಕೊಚ್ಚಿಯಲ್ಲಿ ಪ್ರತಿ ಲೀಟರ್ ಪೆಟ್ರೋಲ್ ಬೆಲೆ 104.57 ರೂಪಾಯಿಗೆ ಏರಿಕೆಯಾದರೆ, ಡೀಸೆಲ್ 98.14 ರೂ.ಗೆ ಹೆಚ್ಚಾಗಿದ್ದು, ಶತಕದ ಹೊಸ್ತಿಲಲ್ಲಿ ಬಂದು ನಿಂತಿದೆ. ಬೆಲೆ ಏರಿಕೆ ಹೀಗೆ ಮುಂದುವರಿದರೆ ಮುಂದಿನ ದಿನಗಳಲ್ಲಿ ದೇಶಾದ್ಯಂತ ಡೀಸೆಲ್ ಬೆಲೆಯು 100ರ ಗಡಿ ದಾಟುವುದರಲ್ಲಿ ಯಾವುದೇ ಸಂಶಯವೇ ಇಲ್ಲ.
ಇನ್ನು ಆಘಾತಕಾರಿ ಅಂಶವೆಂದರೆ, 2016 ಜನವರಿಯಿಂದ ಕೇವಲ ಐದೇ ವರ್ಷದಲ್ಲಿ ಡೀಸೆಲ್ ದರ ದುಪ್ಪಟ್ಟಾಗಿದೆ. ಸುಮಾರು 50 ರೂಪಾಯಿ ಹೆಚ್ಚಾಗಿದೆ. ದಿನೇದಿನೆ ಬೆಲೆ ಏರಿಕೆಯಿಂದ ದೇಶದ ಜನರು ಸಂಕಷ್ಟಕ್ಕೆ ಸಿಲುಕಿರುವುದರಿಂದ ಮುಂದಿನ ದಿನಗಳಲ್ಲಿ ಪ್ರತಿಪಕ್ಷಗಳು ಬೃಹತ್ ಪ್ರತಿಭಟನೆಗಳಿ ಸಜ್ಜಾಗಿವೆ. (ಏಜೆನ್ಸೀಸ್)
ಹಿರಿಯ ನಟ ಸತ್ಯಜಿತ್ ಸಾವಿನ ಬಗ್ಗೆ ಪುತ್ರನ ನೋವಿನ ಮಾತು: ಸಾಮಾಜಿಕ ಜಾಲತಾಣದ ಮೇಲೆ ಬೇಸರ..!
Lakhimpur Kheri Case: ಕೇಂದ್ರ ಸಚಿವರ ಪುತ್ರ ಆಶಿಶ್ ಮಿಶ್ರಾ ಬಂಧನಕ್ಕೆ ಕಾರಣವಾದ ಪ್ರಮುಖ 3 ಅಂಶಗಳಿವು..!