ಪಲಕ್ಕಾಡ್: ಅಪಾಯಕಾರಿ ರೀತಿಯಲ್ಲಿ ಓವರ್ಟೇಕ್ ಮಾಡಿದ್ದಕ್ಕೆ ಆಕ್ರೋಶಗೊಂಡ ಮಹಿಳೆಯೊಬ್ಬರು ತಮ್ಮ ಸ್ಕೂಟರ್ನಲ್ಲಿ ಬಸ್ ಅನ್ನು ಬೆನ್ನಟ್ಟಿ ಹೋಗಿ ತಡೆದು, ನಡುರಸ್ತೆಯಲ್ಲಿ ಚಾಲಕನಿಗೆ ಹಿಗ್ಗಾಮುಗ್ಗಾ ತರಾಟೆಗೆ ತೆಗೆದುಕೊಂಡ ಘಟನೆ ಕೇರಳದ ಪೆರುಮನ್ನೂರಿನ ಕೂಟ್ಟನಾಡ್ ಬಳಿ ನಡೆದಿರುವುದಾಗಿ ಮಂಗಳವಾರ (ಸೆ.6) ವರದಿಯಾಗಿದೆ.
ಪೆರಮನ್ನೂರಿನ ನಿವಾಸಿ ಸಾಂದ್ರಾ ಎಂಬಾಕೆ ಬಸ್ ತಡೆದು ನಡುರಸ್ತೆಯಲ್ಲೇ ಚಾಲಕನಿಗೆ ಕ್ಲಾಸ್ ತೆಗೆದುಕೊಂಡ ವಿಡಿಯೋ ಸದ್ಯ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದೆ.
ಘಟನೆಯ ವಿವರಣೆಗೆ ಬರುವುದಾದರೆ, ಪಲಕ್ಕಾಡ್ ಮತ್ತು ಗುರುವಾಯೂರ್ ನಡುವೆ ಸಂಚರಿಸುವ ರಾಜಪ್ರಭ ಹೆಸರಿನ ಬಸ್, ಮಹಿಳೆಯ ಸ್ಕೂಟರ್ ಅನ್ನು ಅಪಾಯಕಾರಿ ರೀತಿಯಲ್ಲಿ ಓವರ್ಟೇಕ್ ಮಾಡಿದೆ ಎಂದು ಆರೋಪ ಕೇಳಿಬಂದಿದೆ. ಇನ್ನೇನು ಬಸ್ ಸ್ಕೂಟರ್ಗೆ ಡಿಕ್ಕಿ ಹೊಡೆಯಿತು ಎನ್ನುವಷ್ಟರಲ್ಲಿ ಬಹುದೊಡ್ಡ ಅಪಘಾತದಿಂದ ಅದೃಷ್ಟವಶಾತ್ ಪಾರಾಗಿದ್ದೇನೆ ಎಂದು ಸಾಂದ್ರಾ ಹೇಳಿಕೊಂಡಿದ್ದಾರೆ.
ಬಸ್ ಚೇಸ್ ಮಾಡಿದ ರೀತಿಯಿಂದ ಆಕ್ರೋಶಗೊಂಡ ಸಾಂದ್ರಾ, ಕೂಡಲೇ ತಮ್ಮ ಸ್ಕೂಟರ್ ಮೂಲಕ ಮುಂದಿನ ನಿಲ್ದಾಣದಲ್ಲಿ ಬಸ್ ತಡೆದಿದ್ದಾರೆ. ಸ್ಕೂಟರ್ ಅನ್ನು ಬಸ್ ಮುಂದೆಯೇ ಪಾರ್ಕ್ ಮಾಡಿ ಪ್ರತಿಭಟಿಸಿದ್ದಾರೆ. ಅವರು ಬಸ್ ತಡೆದ ಸಮಯದಲ್ಲಿ ಚಾಲಕನ ಕಿವಿಯಲ್ಲಿ ಇಯರ್ ಫೋನ್ ಇತ್ತೆಂದು ಆರೋಪ ಮಾಡಿದ್ದಾರೆ.
ಸದ್ಯ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗುತ್ತಿದ್ದು, ಮಹಿಳೆಯ ದಿಟ್ಟತನಕ್ಕೆ ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ ಮತ್ತು ಚಾಲಕನ ನಿರ್ಲಕ್ಷ್ಯದ ವಿರುದ್ಧ ನೆಟ್ಟಿಗರು ಕಿಡಿಕಾರಿದ್ದು, ಕಠಿಣ ಕ್ರಮಕ್ಕೆ ಆಗ್ರಹಿಸುತ್ತಿದ್ದಾರೆ. (ಏಜೆನ್ಸೀಸ್)
(ವಿಡಿಯೋ ಕೃಪೆ: ಮಾತೃಭೂಮಿ ಕೇರಳ)
ಮೈಸೂರು ಪಾಲಿಕೆ ಚುನಾವಣೆ: ಬಿಜೆಪಿಯ ಶಿವಕುಮಾರ್ ನೂತನ ಮೇಯರ್, JDS ಎಡವಟ್ಟು, ಕಾಂಗ್ರೆಸ್ ಸಂಭ್ರಮ
ಸೈರಸ್ ಮಿಸ್ತ್ರಿ ಸಾವು: ಅಪಘಾತಕ್ಕೀಡಾದ ಕಾರಿನ ವೇಗ ಎಷ್ಟಿತ್ತು? ಮರಣೋತ್ತರ ಪರೀಕ್ಷಾ ವರದಿಯಲ್ಲಿ ಏನಿದೆ?