ಕರಾಚಿ: ಪಾಕಿಸ್ತಾನದ ಪ್ರತ್ಯೇಕತಾವಾದಿ ಗುಂಪಿಗೆ ಸೇರಿದ ಮಹಿಳಾ ಆತ್ಮಾಹುತಿ ಬಾಂಬರ್ ದಾಳಿಗೆ ಮೂವರು ಚೀನಾ ಪ್ರಜೆಗಳು ಸೇರಿದಂತೆ ನಾಲ್ವರು ಮೃತಪಟ್ಟಿರುವ ಘಟನೆ ಕರಾಚಿಯಲ್ಲಿ ನಿನ್ನೆ (ಏ.26) ನಡೆದಿದೆ. ಇದೇ ಮೊದಲ ಬಾರಿಗೆ ಮಹಿಳಾ ಸೂಸೈಡ್ ಬಾಂಬರ್ ಅನ್ನು ಬಳಲಾಗಿದ್ದು, ಆತ್ಮಾಹುತಿ ದಾಳಿ ನಡೆಸಿದ ಮಹಿಳೆ ಸಾಮಾನ್ಯ ಮಹಿಳೆಯಲ್ಲ, ಆಕೆ ಉನ್ನತ ಶಿಕ್ಷಣ ಪಡೆದಿದ್ದಳು.
ಸೂಸೈಡ್ ಬಾಂಬರ್ ಹೆಸರು ಶಾರಿ ಬಲೂಚ್ (30). ಈಕೆ ಬಲೂಚಿಸ್ತಾನದ ಟರ್ಬ್ಯಾಟ್ನಲ್ಲಿರುವ ನೈಜಾರ್ ಅಬಾದ್ ಮೂಲದವಳು. ಪ್ರಾಣಿಶಾಸ್ತ್ರ ವಿಭಾಗದಲ್ಲಿ ಎಂಎಸ್ಸಿ ಪೂರ್ಣಗೊಳಿಸಿ, ವೈದ್ಯೆರೊಬ್ಬರನ್ನು ಮದುವೆ ಆಗಿದ್ದಳು. ದಂಪತಿ ಇಬ್ಬರು ಮಕ್ಕಳು ಸಹ ಇದ್ದಾರೆ.
ಅಫ್ಘಾನಿಸ್ತಾನದ ಮೂಲದ ಉಗ್ರ ಸಂಘಟನೆ ಬಲೂಚಿಸ್ತಾನ್ ಲಿಬರೇಷನ್ ಆರ್ಮಿ (ಬಿಎಲ್ಎ) ದಾಳಿಯ ಹೊಣೆ ಹೊತ್ತುಕೊಂಡಿದೆ. ಮಹಿಳೆಯ ಬಗ್ಗೆ ಅದೇ ಸಂಘಟನೆ ಮಾಹಿತಿ ನೀಡಿದ್ದು, ಎಂಫಿಲ್ ಮುಗಿಸಿದ್ದ ಶಾರಿ ಬಲೂಚ್, ವಿಜ್ಞಾನ ಶಿಕ್ಷಕಿಯಾಗಿ ಕೆಲಸ ಮಾಡುತ್ತಿದ್ದಳು. ಬಿಎಲ್ಎ ಸಂಘಟನೆ ವಿಶೇಷ ಆತ್ಮಾಹುತಿ ದಳ ಮಜೀದ್ ಬ್ರಿಗೇಡ್ಗೆ ಎರಡು ವರ್ಷಗಳ ಹಿಂದೆ ಸೇರಿಕೊಂಡಿದ್ದಳು. ತನ್ನ ಇಬ್ಬರು ಚಿಕ್ಕ ಮಕ್ಕಳ ಕಾರಣದಿಂದ ತಂಡದಿಂದ ಹೊರಗುಳಿಯುವ ಆಯ್ಕೆಯನ್ನು ಆಕೆಗೆ ನೀಡಲಾಗಿತ್ತು. ಆದರೂ ಅದನ್ನು ನಿರಾಕರಿಸಿ ಆತ್ಮಾಹುತಿ ದಾಳಿಗೆ ಒಪ್ಪಿಕೊಂಡಳು ಎಂದು ಬಿಎಲ್ಎ ಹೇಳಿದೆ.
ಬಲೂಚಿಸ್ತಾನ ಮತ್ತು ಪಾಕಿಸ್ತಾನದಲ್ಲಿ ಚೀನಾದ ಹಿತಾಸಕ್ತಿಗಳನ್ನು ಗುರಿಯಾಗಿಸುವ ಬೆದರಿಕೆಯನ್ನು ಮಜೀದ್ ಬ್ರಿಗೇಡ್ ಹಾಕಿದೆ. ಕರಾಚಿ ವಿಶ್ವವಿದ್ಯಾಲಯದೊಂದಿಗೆ ಸಂಯೋಜನೆಗೊಂಡಿರುವ ಚೀನಾದ ಕನ್ಫ್ಯೂಷಿಯಸ್ ಇನ್ಸ್ಟಿಟ್ಯೂಟ್ಗೆ ಸಂಬಂಧಿಸಿದ ಸಿಬ್ಬಂದಿ ವಾಹನದ ಮೇಲೆ ಗುರಿಯಾಗಿಸಿ ಮಹಿಳಾ ಬಾಂಬರ್ ಶಾರಿ ಬಲೂಚ್ ನಿನ್ನೆ ದಾಳಿ ಮಾಡಿದ್ದಾಳೆ. ಈ ಘಟನೆಯಲ್ಲಿ ಚೀನಾದ ಮೂವರು ಅಧಿಕಾರಿಗಳಾದ ಹುವಾಂಗ್ ಗಿಪಿಂಗ್, ದಿಂಗ್ ಮಫಂಗ್ ಮತ್ತು ಚೆನ್ ಸಾಯ್ ಮೃತಪಟ್ಟಿದ್ದಾರೆ.
ಘಟನೆಯ ಬೆನ್ನಲ್ಲೇ ದಾಳಿ ಹೊಣೆ ಹೊತ್ತುಕೊಂಡ ಬಿಎಲ್ಎ, ಇಂದಿನ ಕಾರ್ಯಾಚರಣೆಯನ್ನು ಮಜೀದ್ ಬ್ರಿಗೇಡ್ನ ಫಿದಾಯೀನ್ ಶಾರಿ ಬಲೋಚ್ ಅಲಿಯಾಸ್ ಬ್ರಾಮ್ಶ್ ಯಶಸ್ವಿಯಾಗಿ ನಿರ್ವಹಿಸಿದ್ದಾರೆ ಎಂದು ಹೇಳಿದೆ. ವಿದ್ಯಾರ್ಥಿನಿಯಾಗಿದ್ದಾಗ ಶಾರಿ ಬಲೂಚ್ ವಿದ್ಯಾರ್ಥಿಗಳ ಸಂಘಟನೆಯ ಸದಸ್ಯರಾಗಿದ್ದರು ಮತ್ತು ಬಲೂಚ್ ನರಮೇಧ ಮತ್ತು ಬಲೂಚಿಸ್ತಾನದ ಆಕ್ರಮಣದ ಬಗ್ಗೆ ತಿಳಿದಿದ್ದರು ಎಂದು ಬಿಎಲ್ಎ ಪ್ರಕಟಣೆಯಲ್ಲಿ ತಿಳಿಸಿದೆ.
ಬಲುಚಿಸ್ತಾನ್ ಪ್ರಾಂತ್ಯದಲ್ಲಿ ಚೀನಾದ ಮೇಲೆ ಪ್ರತ್ಯೇಕತಾವಾದಿಗಳು ನಿಯಮಿತವಾಗಿ ದಾಳಿ ಮಾಡುತ್ತಿರುತ್ತಾರೆ. ಚೀನಾ ಸರ್ಕಾರವೂ ತನ್ನ ಬೆಲ್ಟ್ ಮತ್ತು ರೋಡ್ ಯೋಜನೆಯ ಭಾಗವಾಗಿ ಬೃಹತ್ ಮೂಲಸೌಕರ್ಯ ಯೋಜನೆಗಳಲ್ಲಿ ತೊಡಗಿಸಿಕೊಂಡಿರುವುದು ಬಲುಚಿಸ್ತಾನ್ ಪ್ರತ್ಯೇಕತವಾದಿ ಗುಂಪಿಗೆ ಇಷ್ಟವಿಲ್ಲ. ಅದನ್ನು ವಿರೋಧಿಸುತ್ತಲೇ ಬರುತ್ತಿದ್ದು, ಅದರ ಭಾಗವಾಗಿ ಇಂದು ಬಾಂಬ್ ದಾಳಿ ನಡೆದಿದೆ ಎಂದು ಹೇಳಲಾಗಿದೆ.
ಬಲೂಚಿಸ್ತಾನ್ ಪ್ರದೇಶದಲ್ಲಿ ಲಾಭದಾಯಕ ಗಣಿಗಾರಿಕೆ ಮತ್ತು ಇಂಧನ ಯೋಜನೆಗಳ ವಿರುದ್ಧ ಪ್ರತ್ಯೇಕತಾವಾದಿಗಳು ದೀರ್ಘಕಾಲದಿಂದ ಅಸಮಾಧಾನವನ್ನು ಹೊಂದಿದ್ದಾರೆ, ಸ್ಥಳೀಯರು ಇದರ ಪ್ರಯೋಜನಗಳನ್ನು ಅನುಭವಿಸುವುದಿಲ್ಲ ಎಂಬುದೇ ಅವರ ಅಸಮಾಧಾನಕ್ಕೆ ಕಾರಣ ಎಂದು ತಿಳಿದುಬಂದಿದೆ. (ಏಜೆನ್ಸೀಸ್)
ಮಹಿಳಾ ಸೂಸೈಡ್ ಬಾಂಬರ್ ದಾಳಿಗೆ ಚೀನಿಯರು ಸೇರಿ ನಾಲ್ವರ ಸಾವು: ಸಿಸಿಟಿವಿಯಲ್ಲಿ ಭಯಾನಕ ದೃಶ್ಯ ಸೆರೆ
ಆಂಗ್ ಸಾನ್ ಸೂಕಿಗೆ 5 ವರ್ಷ ಜೈಲುಶಿಕ್ಷೆ ವಿಧಿಸಿದ ಮ್ಯಾನ್ಮಾರ್ ನ್ಯಾಯಾಲಯ