ನವದೆಹಲಿ: ಡಿಸೆಂಬರ್ ತ್ರೈಮಾಸಿಕದಲ್ಲಿ ಟಾಟಾ ಮೋಟಾರ್ಸ್ ಲಿಮಿಟೆಡ್ (Tata Motors Ltd.) ನಿವ್ವಳ ಲಾಭದಲ್ಲಿ ಎರಡು ಪಟ್ಟು ಏರಿಕೆಯಾಗಿ 7,100 ಕೋಟಿ ರೂಪಾಯಿಗಳಿಗೆ ತಲುಪಿದೆ. ಈ ಹಿನ್ನೆಲೆಯಲ್ಲಿ ಸೋಮವಾರ, ಫೆ. 5ರಂದು ಟಾಟಾ ಮೋಟಾರ್ಸ್ ಷೇರುಗಳ ಬೆಲೆ ಅಂದಾಜು ಶೇಕಡಾ 6 ರಷ್ಟು ಏರಿಕೆಯಾಗಿದೆ.
ಸೋಮವಾರದ ಕೊನೆಯಲ್ಲಿ ಈ ಷೇರು 5.47 ರಷ್ಟು ಏರಿಕೆ ಕಂಡು ಬಿಎಸ್ಇಯಲ್ಲಿ 926.80 ರೂ. ತಲುಪಿತು.
ಇಂಟ್ರಾ ಡೇ ವಹಿವಾಟಿನಲ್ಲಿ ಇದು ಶೇಕಡಾ 8 ರಷ್ಟು ಹೆಚ್ಚಳವಾಗಿ ದಾಖಲೆಯ ಗರಿಷ್ಠ ಬೆಲೆಯಾದ 949.60 ರೂಪಾಯಿ ತಲುಪಿತ್ತು. ಎನ್ಎಸ್ಇಯಲ್ಲಿ ಶೇ.5.80ರಷ್ಟು ಏರಿಕೆ ಕಂಡು 929.75 ರೂ. ತಲುಪಿತು.
ಕಂಪನಿಯ ಮಾರುಕಟ್ಟೆ ಬಂಡವಾಳೀಕರಣ (ಎಂಕ್ಯಾಪ್) 15,949.67 ಕೋಟಿ ರೂ.ಗಳಿಂದ 3,07,961.47 ಕೋಟಿ ರೂ.ಗೆ ಏರಿಕೆಯಾಗಿದೆ. ಈ ಕಂಪನಿಯು ಹಿಂದಿನ ವರ್ಷದ ಡಿಸೆಂಬರ್ ತ್ರೈಮಾಸಿಕ ಅವಧಿಗೆ ರೂ 3,043 ಕೋಟಿ ನಿವ್ವಳ ಲಾಭವನ್ನು ದಾಖಲಿಸಿತ್ತು,
ಪ್ರಸಕ್ತ ಹಣಕಾಸು ವರ್ಷದ ಮೂರನೇ ತ್ರೈಮಾಸಿಕದಲ್ಲಿ ಆದಾಯವು ವರ್ಷದಿಂದ ವರ್ಷಕ್ಕೆ ಶೇ 25 ರಷ್ಟು ಏರಿಕೆಯಾಗಿ 1,10,600 ಕೋಟಿ ರೂಪಾಯಿಗಳಿಗೆ ತಲುಪಿದೆ ಎಂದು ಕಂಪನಿಯು ಶುಕ್ರವಾರ ಹೇಳಿಕೆಯಲ್ಲಿ ತಿಳಿಸಿದೆ.
“ನಾವು ಎಲ್ಲಾ ವ್ಯವಹಾರಗಳಲ್ಲಿ ಬೆಳವಣಿಗೆ ದಾಖಲಿಸಿದ್ದೇವೆ. Q4 (ಮಾರ್ಚ್ ತ್ರೈಮಾಸಿಕ) ನಲ್ಲಿ ಕಾರ್ಯಕ್ಷಮತೆಯು ಇನ್ನಷ್ಟು ಸುಧಾರಿಸುತ್ತದೆ ಎಂದು ನಾವು ನಿರೀಕ್ಷಿಸುತ್ತೇವೆ. ಡಿಸೆಂಬರ್ ತ್ರೈಮಾಸಿಕದಲ್ಲಿ ನಾವು ರೂ 9,500 ಕೋಟಿ ನಿವ್ವಳ ಸಾಲ ಕಡಿತವನ್ನು ಸಾಧಿಸಿದ್ದೇವೆ” ಎಂದು ಟಾಟಾ ಮೋಟಾರ್ಸ್ ಹೇಳಿಕೆಯಲ್ಲಿ ತಿಳಿಸಿದೆ.