ಬೆಂಗಳೂರು: ಅಮೇಜಾನ್ ಪ್ರೈಮ್ನಲ್ಲಿ ‘ಫ್ರೆಂಚ್ ಬಿರಯಾನಿ’ ಬಿಡುಗಡೆಯಾಗಿ ಐದು ತಿಂಗಳುಗಳಾಗಿವೆ. ಈ ಐದು ತಿಂಗಳುಗಳಲ್ಲಿ ಆ ಚಿತ್ರದಲ್ಲಿ ನಾಯಕನಾಗಿ ನಟಿಸಿದ್ದ ದಾನಿಶ್, ಬೇರೆ ಯಾವ ಚಿತ್ರದಲ್ಲೂ ನಟಿಸಿರಲಿಲ್ಲ. ಈಗ ದಾನಿಶ್, ‘ಒನ್ ಕಟ್ ಟೂ ಕಟ್’ ಎಂಬ ಹೊಸ ಚಿತ್ರವನ್ನು ಒಪ್ಪಿಕೊಂಡಿದ್ದಾರೆ.
ಇದನ್ನೂ ಓದಿ:ಏಪ್ರಿಲ್ಗೆ ಯುವರತ್ನ ಸಿನಿಮಾ ಬಿಡುಗಡೆ
‘ಒನ್ ಕಟ್ ಟೂ ಕಟ್’ ಚಿತ್ರವನ್ನು ವಂಸಿಧರ್ ಭೋಗರಾಜು ಎನ್ನುವವರು ನಿರ್ದೇಶನ ಮಾಡುತ್ತಿದ್ದು, ಈ ಚಿತ್ರದಲ್ಲಿ ಗೋಪಿ ಎಂಬ ಇಂಗ್ಲೀಷ್ ಮೇಷ್ಟ್ರಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ ದಾನಿಶ್. ಹೊಸ ವರ್ಷದ ಅಂಗವಾಗಿ ಚಿತ್ರದ ಫಸ್ಟ್ ಲುಕ್ ಪೋಸ್ಟರ್ ಬಿಡುಗಡೆಯಾಗಿದೆ.
ವಿಶೇಷವೆಂದರೆ, ಈ ಚಿತ್ರವನ್ನು ಪುನೀತ್ ರಾಜಕುಮಾರ್ ನಿರ್ಮಿಸುತ್ತಿದ್ದಾರೆ. ಈ ಹಿಂದೆ, ದಾನಿಶ್ ಅಭಿನಯದಲ್ಲಿ ‘ಫ್ರೆಂಚ್ ಬಿರಿಯಾನಿ’ ಚಿತ್ರವನ್ನು ನಿರ್ಮಿಸಿದ್ದರು. ಈಗ ದಾನಿಶ್ ಅಭಿನಯದ ಇನ್ನೊಂದು ಚಿತ್ರವನ್ನು ಪುನೀತ್ ತಮ್ಮ ಪಿಆರ್ಕೆ ಪ್ರೊಡಕ್ಷನ್ಸ್ ಬ್ಯಾನರ್ನಡಿ ನಿರ್ಮಿಸುತ್ತಿದ್ದಾರೆ. ಈ ಚಿತ್ರ ಸಹ ಚಿತ್ರಮಂದಿರಗಳಿಗಿಂತ ಓವರ್ ದಿ ಟಾಪ್ನಲ್ಲೇ (ಓಟಿಟಿ) ಬಿಡುಗಡೆಯಾಗುವ ಸಾಧ್ಯತೆ ಇದೆ.
ಇದನ್ನೂ ಓದಿ: ಸಿನಿಮಾ ವಿಮರ್ಶೆ | ಆಂತರಿಕ ಯುದ್ಧದಲ್ಲಿ ಚದುರಂಗದಾಟ
ಈ ಚಿತ್ರದ ಪೋಸ್ಟರ್ನ್ನು ಸೋಷಿಯಲ್ ಮೀಡಿಯಾ ಮೂಲಕ ಬಿಡುಗಡೆ ಮಾಡಿರುವ ಪುನೀತ್, ‘ಒನ್ ಕಟ್ ಟೂ ಕಟ್’ ಒಂದು ಪಕ್ಕಾ ಕಾಮಿಡಿ ಚಿತ್ರ ಎಂದು ಹೇಳಿದ್ದಾರೆ. ಚಿತ್ರೀಕರಣ ಫೆಬ್ರವರಿಯಿಂದ ಪ್ರಾರಂಭವಾಲಿದ್ದು, ಅಷ್ಟರಲ್ಲಿ ಚಿತ್ರದ ಕುರಿತು ಇನ್ನಷ್ಟು ಮಾಹಿತಿ ಸಿಗುವ ನಿರೀಕ್ಷೆ ಇದೆ.