ಪ್ಯಾನ್ ಇಂಡಿಯಾ ಸ್ಟಾರ್ಗಿರಿ ಪಟ್ಟ ಗಿಟ್ಟಿಸಿಕೊಂಡಿರುವ ಟಾಲಿವುಡ್ ನಟ ಪ್ರಭಾಸ್ ಹಲವು ಸಿನಿಮಾ ಪ್ರಾಜೆಕ್ಟ್ಗಳಲ್ಲಿ ತೊಡಗಿಸಿಕೊಂಡಿದ್ದಾರೆ. ಸದ್ಯ ಒಪ್ಪಿಕೊಂಡಿರುವ ಮೂರ್ನಾಲ್ಕು ಸಿನಿಮಾಗಳು ಬಹುಭಾಷೆಯಲ್ಲಿ ಸಿದ್ಧವಾಗುತ್ತಿದ್ದು, ಆ ಪೈಕಿ ಪ್ರಭಾಸ್ ಅವರ 20ನೇ ಸಿನಿಮಾದ ಫಸ್ಟ್ ಲುಕ್ ನಾಳೆ (ಜು. 10) ಬೆಳಗ್ಗೆ 10ಕ್ಕೆ ಬಿಡುಗಡೆ ಆಗಲಿದೆ. ತೆಲುಗಿನ ಜತೆಗೆ ತಮಿಳು, ಹಿಂದಿ, ಮಲಯಾಳಂನಲ್ಲಿ ಲುಕ್ ಬಿಡುಗಡೆ ಮಾಡಲು ತಂಡ ನಿರ್ಧರಿಸಿದೆ. ಆದರೆ, ಕನ್ನಡದಲ್ಲಿ ಮಾತ್ರ ಈ ಸಿನಿಮಾದ ಫಸ್ಟ್ ಲುಕ್ ರಿಲೀಸ್ ಆಗುತ್ತಿಲ್ಲ. ಚಿತ್ರತಂಡದ ಈ ನಡೆ ಸದ್ಯ ಕನ್ನಡ ಸಿನಿಮಾ ಪ್ರೇಮಿಗಳ ಆಕ್ರೋಶಕ್ಕೆ ಕಾರಣವಾಗಿದೆ.
ಇದನ್ನೂ ಓದಿ: ಈ ಒಂದು ಕಾರಣಕ್ಕಾ ಸುಶೀಲ್ ಗೌಡ ಆತ್ಮಹತ್ಯೆ ಮಾಡಿಕೊಂಡಿದ್ದು
ದಕ್ಷಿಣದಲ್ಲಿ ಸಿದ್ಧವಾಗುತ್ತಿರುವ ಬಹುತೇಕ ಬಿಗ್ ಬಜೆಟ್ ಸಿನಿಮಾಗಳು ಕನ್ನಡದಲ್ಲೂ ಡಬ್ ಆಗುತ್ತಿವೆ. ಈಗಾಗಲೇ ಸಾಕಷ್ಟು ಸಿನಿಮಾಗಳು ಕನ್ನಡಕ್ಕೆ ಡಬ್ ಆಗಿ ತೆರೆಕಂಡಿದ್ದೂ ಉಂಟು. ಇನ್ನೂ ಅನೇಕ ಸಿನಿಮಾಗಳು ಆ ಹಾದಿಯಲ್ಲಿವೆ. ಆದರೆ, ಪ್ರಭಾಸ್ ನಟನೆಯ ಸಾಹೋ ಆವತ್ತೂ ಕನ್ನಡದಲ್ಲಿ ಬಿಡುಗಡೆಯಾಗಿರಲಿಲ್ಲ. ಈಗ ಹೊಸ ಪ್ರಾಜೆಕ್ಟ್ನಲ್ಲೂ ಕನ್ನಡ ಕಾಣುತ್ತಿಲ್ಲ. ಅಷ್ಟಕ್ಕೂ ಕನ್ನಡದಲ್ಲಿ ಡಬ್ ಮಾಡಿ ತೆರೆಗೆ ತರದಿರಲು ಕಾರಣ ಏನಿರಬಹುದು?
ಇದನ್ನೂ ಓದಿ: ರೋಗ ನಿರೋಧಕ ಶಕ್ತಿ ವಿಚಾರಕ್ಕೆ ಅಜಯ್ ದೇವಗನ್ ಟ್ರೋಲ್
ಈಗಾಗಲೇ ಪ್ರಭಾಸ್ಗೆ ಕರ್ನಾಟಕದಲ್ಲೂ ಅಭಿಮಾನಿಗಳಿದ್ದಾರೆ. ತೆಲುಗು ಸಿನಿಮಾವನ್ನೇ ಮುಗಿಬಿದ್ದು ನೋಡುವ ವರ್ಗವಿದೆ. ಆ ಒಂದೇ ಒಂದು ಕಾರಣಕ್ಕೆ ಪ್ರಭಾಸ್ ಅವರ ಸಿನಿಮಾಗಳು ಡಬ್ ಆಗದೆ, ಮೂಲ ತೆಲುಗಿನಲ್ಲಿ ಕರ್ನಾಟಕದಲ್ಲಿ ತೆರೆಕಂಡು ಒಳ್ಳೇ ಕಲೆಕ್ಷನ್ ಮಾಡಿಕೊಳ್ಳುತ್ತಿವೆ. ಹಾಗಾಗಿ ನಿರ್ಮಾಪಕರೂ ಕನ್ನಡದ ಡಬ್ಬಿಂಗ್ ಸಹವಾಸಕ್ಕೆ ಹೋಗಿಲ್ಲ ಎಂಬ ಮಾತು ಕೇಳಿಬರುತ್ತಿದೆ. ಆದರೂ ಪ್ರಸ್ತುತ ದಕ್ಷಿಣದ ಎಲ್ಲ ಸಿನಿಮಾಗಳು ದಕ್ಷಿಣದ ಎಲ್ಲ ಭಾಷೆಗಳಿಗೆ ಡಬ್ ಆಗಿ ತೆರೆಕಾಣುತ್ತಿರುವುದರಿಂದ, ಪ್ರಭಾಸ್ ಅವರ ಈ ಚಿತ್ರವೂ ಕನ್ನಡಕ್ಕೆ ಡಬ್ ಆಗಬೇಕಿತ್ತು ಎಂಬುದು ಅಭಿಮಾನಿ ವಲಯದ ಬೇಡಿಕೆ. (ಏಜೆನ್ಸೀಸ್)