ಮುಂಬೈ: ಐಪಿಎಲ್ನ ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಆರಂಭಿಕ ಬ್ಯಾಟ್ಸ್ಮನ್ ಪೃಥ್ವಿ ಷಾಗೆ ಮಹಾರಾಷ್ಟ್ರ ಪೊಲೀಸರು ಶುಕ್ರವಾರ ಶಾಕ್ ನೀಡಿದ್ದಾರೆ. ಸದ್ಯ ಐಪಿಎಲ್ ಮುಂದೂಡಿಕೆಯಿಂದಾಗಿ ಬಿಡುವು ಹೊಂದಿರುವ ಪೃಥ್ವಿ ಷಾ, ಗೆಳೆಯರೊಂದಿಗೆ ರಜೆಯ ಮಜಾ ಕಳೆಯಲು ಮುಂಬೈನಿಂದ ಗೋವಾಗೆ ತೆರಳುತ್ತಿದ್ದರು. ಕೋಲ್ಹಾಪುರ ಮಾರ್ಗವಾಗಿ ಗೋವಾಗೆ ತೆರಳಲು ಬಂದ ಪೃಥ್ವಿ ಷಾ ಅವರನ್ನು ಅಂಬೊಲಿ ಎಂಬಲ್ಲಿ ಪೋಲಿಸರು ತಡೆದಿದ್ದಾರೆ. ಈ ವೇಳೆ ಅಂತರ ರಾಜ್ಯ ಗಡಿ ದಾಟಲು ಇ-ಪಾಸ್ ಕೇಳಲಾಗಿದೆ. ಆದರೆ, ಪೃಥ್ವಿ ಷಾ ಬಳಿಕ ಇ-ಪಾಸ್ ಇರಲಿಲ್ಲ. ಬಳಿಕ 21 ವರ್ಷದ ಪೃಥ್ವಿ ಷಾ ಇ-ಪಾಸ್ಗೆ ಸ್ಥಳದಲ್ಲೇ ನಿಂತು ಅರ್ಜಿ ಹಾಕಿದ್ದಾರೆ. ಅರ್ಜಿ ಹಾಕಿದ ಒಂದು ಗಂಟೆಯೊಳಗೆ ಇ-ಪಾಸ್ ದಕ್ಕಿದೆ. ಕೋವಿಡ್-19ರಿಂದಾಗಿ ರಾಜ್ಯದ ಗಡಿ ದಾಟಲು ಮಹಾರಾಷ್ಟ್ರ ಸರ್ಕಾರ ಇ-ಪಾಸ್ ಕಡ್ಡಾಯಗೊಳಿಸಿದೆ.
ಇದನ್ನೂ ಓದಿ: ತುಗೂಯ್ಯಾಲೆಯಲ್ಲಿ ಟೋಕಿಯೊ ಒಲಿಂಪಿಕ್ಸ್ ಭವಿಷ್ಯ,
ಇ-ಪಾಸ್ ಸಿಕ್ಕಿದ ಬಳಿಕವೇ ಪೃಥ್ವಿ ಷಾ ಪ್ರಯಾಣ ಮುಂದವರಿಸಿದ್ದಾರೆ. ಇತ್ತೀಚೆಗೆ ಇಂಗ್ಲೆಂಡ್ ಪ್ರವಾಸಕ್ಕೆ ಪ್ರಕಟಿಸಿದ ಟೀಮ್ ಇಂಡಿಯಾದಲ್ಲಿ ಪೃಥ್ವಿ ಷಾ ಸ್ಥಾನದ ನಿರೀಕ್ಷೆಯಲ್ಲಿದ್ದರು. ಆದರೆ, ಷಾ ಅವರನ್ನು ಆಯ್ಕೆಗೆ ಪರಿಗಣಿಸಿರಲಿಲ್ಲ. ಐಪಿಎಲ್ನಲ್ಲಿ ಉತ್ತಮ ಫಾಮ್ರ್ನಲ್ಲಿದ್ದ ಷಾ, ಇದಕ್ಕೂ ಆಸ್ಟ್ರೆಲಿಯಾ ಪ್ರವಾಸದಲ್ಲಿ ಕಳಪೆ ನಿರ್ವಹಣೆಯಿಂದ ಸಾಕಷ್ಟು ಟೀಕೆಗೆ ಗುರಿಯಾಗಿದ್ದರು. ಅಲ್ಲದೆ, ಆಯ್ಕೆ ಸಮಿತಿಯೇ ಷಾ ಅವರಿಗೆ ತೂಕ ಇಳಿಸುವಂತೆಯೂ ಸೂಚಿಸಲಾಗಿತ್ತು.
ತೂಕ ಕಡಿಮೆ ಮಾಡಿಕೊಳ್ಳುವ ವಿಷಯದಲ್ಲಿ ವಿಕೆಟ್ ಕೀಪರ್ ರಿಷಭ್ ಪಂತ್ ಅವರನ್ನು ನೋಡಿ ಕಲಿಯಿರಿ ಎಂದು ಷಾಗೆ ಆಯ್ಕೆ ಸಮಿತಿ ಖಡಕ್ ಸೂಚನೆ ನೀಡಿತ್ತು. ಆಸೀಸ್ ಪ್ರವಾಸದ ಬಳಿಕ ತವರಿನಲ್ಲಿ ನಡೆದ ಇಂಗ್ಲೆಂಡ್ ವಿರುದ್ಧದ ಸರಣಿಗೆ ತಂಡದಿಂದ ಕೈಬಿಡಲಾಗಿತ್ತು. ಬಳಿಕ ದೇಶೀಯ ಏಕದಿನ ಕ್ರಿಕೆಟ್ ಟೂರ್ನಿ ವಿಜಯ್ ಹಜಾರೆ ಟ್ರೋಫಿಯಲ್ಲಿ ಭರ್ಜರಿ ಫಾರ್ಮ್ ಕಂಡುಕೊಂಡಿದ್ದರು. ಬಳಿಕ ಐಪಿಎಲ್ನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ಪರ ಗಮನಾರ್ಹ ನಿರ್ವಹಣೆ ತೋರಿದ್ದರು.