ನವದೆಹಲಿ: ಭಾರತ ಮತ್ತು ಚೀನಾ ನಡುವೆ ತಣ್ಣಗೆ ನಡೆಯುತ್ತಿರುವ ಜಟಾಪಟಿ ಎಲ್ಲರಿಗೂ ಗೊತ್ತೇ ಇದೆ. ಆದರೂ ಭಾರತೀಯ ಸಂಗೀತಕ್ಕೆ ಫಿದಾ ಆಗಿ ಚೀನಿ ಜನರು ಬಪ್ಪಿ ಲಾಹಿರಿಯ ‘ಜಿಮ್ಮಿ ಜಿಮ್ಮಿ’ ಹಾಡಿಗೆ ಸಾಮಾಜಿಕ ಜಾಲತಾಣಗಳಲ್ಲಿ ಖಾಲಿ ಪಾತ್ರೆ ಹಿಡಿದು ಸಕತ್ ಸ್ಟೆಪ್ ಹಾಕುತ್ತಿದ್ದಾರೆ. ಇದು ಮೇಲ್ನೋಟಕ್ಕೆ ಕಾಣುವ ಸಂಗತಿ. ಇದರ ಅಸಲಿಯತ್ತು ಬೇರೆಯೇ ಇದೆ!
ಭಾರತದಲ್ಲಿ ಇಂದು ಜನರು ಕರೊನಾಗೆ ಕ್ಯಾರೇ ಅನ್ನದೇ ಓಡಾಡುತ್ತಿರುವುದು ಎಷ್ಟು ಸತ್ಯವೋ, ಚೀನಾದಲ್ಲಿ ಜನರು ಇನ್ನೂ ಸಂಪೂರ್ಣವಾಗಿ ಲಾಕ್ಡೌನ್ನಿಂದ ಹೊರಗೆ ಬಂದಿಲ್ಲ ಎನ್ನುವುದೂ ಅಷ್ಟೇ ಸತ್ಯ. ಹೌದು, ಚೀನಾದಲ್ಲಿ ಕರೊನಾ ಇನ್ನೂ ತಾಂಡವ ಆಡುತ್ತಿದೆ. ಅಲ್ಲಿ ಕರೊನಾ ಪೀಡಿತ ಪ್ರದೇಶಗಳಲ್ಲಿ ನಿರ್ದಾಕ್ಷಿಣ್ಯವಾಗಿ ಲಾಕ್ಡೌನ್ ಹೇರಲಾಗುತ್ತಿದೆ. ಈಗ ಅಲ್ಲಿರುವ ಜನರು ಊಟ ತಿಂಡಿಗೂ ಪರದಾಡುತ್ತಿದ್ದಾರೆ.
ಜಿಮ್ಮಿ ಜಿಮ್ಮಿ ಹಾಡಿಗೂ ಚೀನಾದಲ್ಲಿ ಜನರು ಹಸಿವಿನಿಂದ ಪರದಾಡುವುದಕ್ಕೂ ಏನು ಸಂಬಂಧ ಎಂದು ಕೇಳುತ್ತೀರಾ? ಮ್ಯಾಂಡರಿನ್ (ಚೀನಿ) ಭಾಷೆಯಲ್ಲಿ ‘ಜಿ-ಮಿ’ ಅಂದರೆ ‘ಅನ್ನ ಕೊಡು’ ಎಂದರ್ಥ. ಈಗ ಜನರು ಖಾಲಿ ಪಾತ್ರೆಯನ್ನು ಹಿಡಿದು ನೃತ್ಯ ಮಾಡುತ್ತಿದ್ದಾರೆ. ಸರ್ಕಾರ ‘ಇದೇನು’ ಎಂದು ಕೇಳಿದರೆ ಸೋಷಿಯಲ್ ಮೀಡಿಯಾ ಟ್ರೆಂಡ್. ಆದರೆ ಇದು ಪ್ರತಿಭಟನೆಯ ಒಂದು ರೂಪ.
ಚೀನಾದಲ್ಲಿ ಇರುವ ಕಮ್ಯುನಿಷ್ಟ್ ಪಕ್ಷವನ್ನು ವಿರೋಧಿಸಿದವರಿಗೆ ಉಳಿಗಾಲವಿಲ್ಲ. ಇರುವ ಏಕೈಕ ಪಕ್ಷವನ್ನು ಪ್ರಶ್ನಿಸಿದ ವ್ಯಕ್ತಿಯೇ ನಾಪತ್ತೆ ಆಗಿಬಿಡುತ್ತಾರೆ. ಈ ಪರಿಸ್ಥಿತಿಯಲ್ಲಿ ಇರುವ ಚೀನಾ ಜನರು ತಮ್ಮ ಅಸಮಾಧಾನವನ್ನು ಹೊರಹಾಕಲು ‘ಜಿಮ್ಮಿ’ ದಾರಿಯನ್ನು ಹಿಡಿದಿದ್ದಾರೆ. ಇದು ಚೀನಾ ದೇಶದ ಕರಾಳ ಮುಖವನ್ನು ತೋರಿಸುತ್ತಿದೆ.(ಏಜೆನ್ಸೀಸ್)