ಮುಂಬೈ: ‘ಮೂರು ವರ್ಷಗಳಿಂದ ಪಠಾಣ್ ಬಗ್ಗೆ ಯಾವುದೇ ಸುಳಿವಿಲ್ಲ. ಅವನು ಬದುಕಿದ್ದಾನೋ, ಇಲ್ಲವೋ ಗೊತ್ತಿಲ್ಲ …’ ಎಂಬ ಮಾತು ಕೇಳಿಬರುತ್ತಿದ್ದಂತೆಯೇ, ಪಠಾಣ್ ಧ್ವನಿ ಕೇಳುತ್ತದೆ. ‘ಪಠಾಣ್ ಜಿಂದಾ ಹೈ …’ ಎಂಬ ಮುಗಿಯುತ್ತಿದ್ದಂತೆಯೇ ಶಾರೂಖ್ ಖಾನ್ ಸಖತ್ ಫೂಟ್ ಮಾಡುತ್ತಾರೆ. ಮೇಲಿನಿಂದ ಹಾರಿ ಬಂದ ಗನ್ ಹಿಡಿದು, ಎದುರಿಗಿರುವವರನ್ನು ಶೂಟ್ ಮಾಡುತ್ತಾರೆ.
ಇದನ್ನೂ ಓದಿ: ನವೆಂಬರ್ನಲ್ಲಿ ಸಿನಿಮಾ ಹಬ್ಬ; 20ಕ್ಕೂ ಹೆಚ್ಚು ಕನ್ನಡ ಚಿತ್ರಗಳ ಬಿಡುಗಡೆ!
ಹೀಗೆ ಪ್ರಾರಂಭವಾಗುತ್ತದೆ ಶಾರೂಖ್ ಖಾನ್ ಅಭಿನಯದ ‘ಪಠಾಣ್’ ಚಿತ್ರದ ಟೀಸರ್. ‘ಪಠಾಣ್’ ಚಿತ್ರದ ಬಗ್ಗೆ ಕೆಲವು ವರ್ಷಗಳಿಂದ ಸುದ್ದಿಗಳು ಬರುತ್ತಲೇ ಇದ್ದವು. ಆದರೆ, ಚಿತ್ರ ಹೇಗಿರುತ್ತದೆ ಎಂಬ ಮಾಹಿತಿ ಯಾರಿಗೂ ಇರಲಿಲ್ಲ. ಚಿತ್ರದ ದೃಶ್ಯಗಳನ್ನು ಯಾರೂ ನೋಡಿರಲಿಲ್ಲ. ಇದೀಗ ಯಶ್ರಾಜ್ ಫಿಲಂಸ್ನವರು ತಮ್ಮ ಯೂಟ್ಯೂಬ್ ಚಾನಲ್ನಲ್ಲಿ ಚಿತ್ರದ ಮೊದಲ ಟೀಸರ್ ಬಿಡುಗಡೆ ಮಾಡಿದ್ದಾರೆ. ಇಂದು ಶಾರೂಖ್ ಖಾನ್ ತಮ್ಮ 57ನೇ ಹುಟ್ಟುಹಬ್ಬವನ್ನು ಆಚರಿಸಿಕೊಳ್ಳುತ್ತಿದ್ದು, ಹುಟ್ಟುಹಬ್ಬದ ಉಡುಗೊರೆಯಾಗಿ ಈ ಟೀಸರ್ ಬಿಡುಗಡೆ ಮಾಡಲಾಗಿದೆ.
‘ಪಠಾಣ್’ ಟೀಸರ್ನಲ್ಲಿ ಬರೀ ಶಾರೂಖ್ ಖಾನ್ ಅಷ್ಟೇ ಅಲ್ಲ, ದೀಪಿಕಾ ಪಡುಕೋಣೆ ಮತ್ತು ನೆಗೆಟಿವ್ ಪಾತ್ರದಲ್ಲಿ ಕಾಣಿಸಿಕೊಂಡಿರುವ ಜಾನ್ ಅಬ್ರಹಾಂ ಅವರನ್ನು ಸಹ ನೋಡಬಹುದು. ಇದೊಂದು ಆಕ್ಷನ್ ಚಿತ್ರವಾಗಿದ್ದು, ಟೀಸರ್ನಲ್ಲಿ ಸಾಕಷ್ಟು ರೋಮಂಚನಕಾರಿ ಆಕ್ಷನ್ ದೃಶ್ಯಗಳಿವೆ. ದೀಪಕಿ ಇಲ್ಲಿ ಖಳರ ಜತೆಗೆ ಹೊಡೆದಾಡುವುದಷ್ಟೇ ಅಲ್ಲ, ತಮ್ಮ ಗ್ಲಾಮರ್ನಿಂದಲೂ ಗಮನ ಸೆಳೆಯುತ್ತಾರೆ. ಇನ್ನು, ಸಾಕಷ್ಟು ಚೇಸಿಂಗ್, ಫೈಟಿಂಗ್, ಬ್ಲಾಸ್ಟ್ ದೃಶ್ಯಗಳು ಈ ಟೀಸರ್ನಲ್ಲಿದ್ದು, ಆಕ್ಷನ್ ಪ್ರಿಯರ ಮೆಚ್ಚುಗೆ ಗಳಿಸುತ್ತಿದೆ.
ಇದನ್ನೂ ಓದಿ: ಮಲಯಾಳಂಗೆ ರಾಜ್ ಬಿ ಶೆಟ್ಟಿ; ‘ರುಧಿರಂ’ ಚಿತ್ರದಲ್ಲಿ ನಟನೆ
ಅಂದಹಾಗೆ, ‘ಪಠಾಣ್’ ಚಿತ್ರವು 2023ರ ಜನವರಿ 25ರಂದು ಜಗತ್ತಿನಾದ್ಯಂತ ಬಿಡುಗಡೆಯಾಗುತ್ತಿದೆ. ಯಶ್ ಚೋಪ್ರಾ ನಿರ್ಮಿಸಿರುವ ಈ ಚಿತ್ರವನ್ನು ಸಿದ್ಧಾರ್ಥ್ ಆನಂದ್ ನಿರ್ದೇಶನ ಮಾಡಿದ್ದು, ಹಿಂದಿ, ತೆಲುಗು ಮತ್ತು ತಮಿಳಿನಲ್ಲಿ ಈ ಚಿತ್ರ ಮೂಡಿಬರಲಿದೆ.