ಪುದುಚೇರಿ: ಪ್ರತಿಯೊಬ್ಬರೂ ತಮ್ಮ ಬಾಲ್ಯದಲ್ಲಿ ಮೃದುವಾದ, ಗುಲಾಬಿ ಬಣ್ಣದ ಕಾಟನ್ ಕ್ಯಾಂಡಿ ಅಥವಾ ಅಜ್ಜಿ ಕೂದಲು ಅಥವಾ ಬಾಂಬೆ ಮಿಠಾಯಿ ಸವಿದಿರುತ್ತೀರಿ. ಇದನ್ನು ಮಾರುವ ಜನರು ಹೆಚ್ಚಾಗಿ ಜಾತ್ರೆಗಳು, ಹಳ್ಳಿಗಳು ಮತ್ತು ನಗರಗಳ ಬೀದಿಗಳಲ್ಲಿ ನಡೆಯುವ ಉತ್ಸವಗಳಲ್ಲಿ ಕಂಡುಬರುತ್ತಾರೆ. ಮಕ್ಕಳು ಇದನ್ನು ತಿನ್ನಲು ತಂದೆ ತಾಯಿ ಬಳಿ ದುಂಬಾಲು ಬೀಳುವುದು ಉಂಟು. ಅದರ ರುಚಿ ತುಂಬಾ ಅದ್ಭುತ.
ಆದರೆ ಇದೀಗ ಕೇಂದ್ರಾಡಳಿತ ಪ್ರದೇಶವಾದ ಪುದುಚೇರಿಯ ಅಧಿಕಾರಿಗಳು ತನಿಖೆಯ ಸಮಯದಲ್ಲಿ ಬಾಂಬೆ ಮಿಠಾಯಿಯಲ್ಲಿ ಹಾನಿಕಾರಕ (ವಿಷಕಾರಿ) ರಾಸಾಯನಿಕಗಳನ್ನು ಕಂಡುಕೊಂಡ ಕಾರಣ ಅದರ ಮಾರಾಟವನ್ನು ಸಂಪೂರ್ಣವಾಗಿ ನಿಷೇಧಿಸಲು ನಿರ್ಧರಿಸಿದ್ದಾರೆ.
ಮಾಹಿತಿ ನೀಡಿದ ಲೆಫ್ಟಿನೆಂಟ್ ಗವರ್ನರ್
ಪುದುಚೇರಿ ಲೆಫ್ಟಿನೆಂಟ್ ಗವರ್ನರ್ ತಮಿಳಿಸೈ ಸುಂದರರಾಜನ್ ಅವರು ಇತ್ತೀಚೆಗೆ ತಮ್ಮ ಅಧಿಕೃತ ಸಾಮಾಜಿಕ ಮಾಧ್ಯಮ ಖಾತೆಗಳಲ್ಲಿ ವಿಡಿಯೋ ಬಿಡುಗಡೆ ಮಾಡಿ, ಬಾಂಬೆ ಮಿಠಾಯಿ ನಿಷೇಧದ ಬಗ್ಗೆ ತಿಳಿಸಿದರು. ಇದರಲ್ಲಿ ಕಂಡುಬರುವ ಹಾನಿಕಾರಕ ರಾಸಾಯನಿಕಗಳು ಆರೋಗ್ಯಕ್ಕೆ ಹಾನಿಕಾರಕವಾದ ಕಾರಣ, ತಮ್ಮ ಮಕ್ಕಳಿಗೆ ಬಾಂಬೆ ಮಿಠಾಯಿ ಖರೀದಿಸುವುದನ್ನು ತಪ್ಪಿಸುವಂತೆ ಸಾರ್ವಜನಿಕರಲ್ಲಿ ಮನವಿ ಮಾಡಿದ್ದಾರೆ. ಆಹಾರ ಸುರಕ್ಷತಾ ಅಧಿಕಾರಿಗಳು ಬಾಂಬೆ ಮಿಠಾಯಿ ಪರೀಕ್ಷಿಸಿದರು. ಅದರಲ್ಲಿ ರೋಡಮೈನ್ ಬಿ ಎಂಬ ವಿಷಕಾರಿ ಪದಾರ್ಥವನ್ನು ಪತ್ತೆಹಚ್ಚಿದರು ಎಂದು ತಿಳಿಸಿದ್ದಾರೆ.
ಲೆಫ್ಟಿನೆಂಟ್ ಗವರ್ನರ್ ಜನರಿಗೆ ಮತ್ತೊಂದು ಸಲಹೆ ನೀಡಿದ್ದು, ಅದರ ಪ್ರಕಾರ, ಮಕ್ಕಳು ಬಣ್ಣ ಬಣ್ಣದಲ್ಲಿ ಸಿಗುವ ಸಿಹಿ ತಿನಿಸುಗಳಲ್ಲಿ ರಾಸಾಯನಿಕಗಳನ್ನು ಬಳಸುವುದರಿಂದ ಅಂತಹ ಆಹಾರ ಪದಾರ್ಥಗಳನ್ನು ಖರೀದಿಸುವುದನ್ನು ತಪ್ಪಿಸಬೇಕು ಎಂದು ಸೂಚಿಸಿದ್ದಾರೆ.
ಕೆಲವು ವರದಿಯ ಪ್ರಕಾರ, ಆಹಾರ ಸುರಕ್ಷತಾ ಇಲಾಖೆಯಿಂದ ಕ್ಲಿಯರೆನ್ಸ್ ಪ್ರಮಾಣಪತ್ರ ಹೊಂದಿರುವ ಅಂಗಡಿಯವರು ಮಾತ್ರ ಈ ಕಾಟನ್ ಕ್ಯಾಂಡಿ ಅಥವಾ ಬಾಂಬೆ ಮಿಠಾಯಿ ಮಾರಬಹುದು.
ಲೆಫ್ಟಿನೆಂಟ್ ಗವರ್ನರ್ ಸೂಚನೆಯ ಮೇರೆಗೆ ಆಹಾರ ಸುರಕ್ಷತಾ ಇಲಾಖೆಯ ತಂಡವು ಪುದುಚೇರಿಯ ವಿವಿಧ ಪ್ರದೇಶಗಳಿಂದ ಕಾಟನ್ ಕ್ಯಾಂಡಿಯ ಮಾದರಿಗಳನ್ನು ಸಂಗ್ರಹಿಸಿ ಪ್ರಯೋಗಾಲಯದಲ್ಲಿ ಪರೀಕ್ಷಿಸಿದೆ. ಇದೀಗ ವಿಷಕಾರಿ ಅಂಶ ಪತ್ತೆಯಾದ ಹಿನ್ನೆಲೆಯಲ್ಲಿ ಕೆಲ ಅಂಗಡಿಗಳಿಗೆ ಸೀಲ್‌ ಹಾಕಲಾಗಿದೆ. ಮತ್ತೊಂದೆಡೆ, ನ್ಯಾಷನಲ್ ಇನ್‌ಸ್ಟಿಟ್ಯೂಟ್ ಆಫ್ ಹೆಲ್ತ್ (NIH.gov) ಪ್ರಕಾರ, ರೋಡಮೈನ್ ಬಿ, ಇದನ್ನು ಸಾಮಾನ್ಯವಾಗಿ RhB ಎಂದೂ ಕರೆಯಲಾಗುತ್ತದೆ. ಇದು ರಾಸಾಯನಿಕ ಸಂಯುಕ್ತವಾಗಿದೆ. ಇದನ್ನು ಬಣ್ಣಕ್ಕೆ ಬಳಸಲಾಗುತ್ತದೆ. ಇದು ಆಹಾರ ಪದಾರ್ಥಗಳೊಂದಿಗೆ ದೇಹವನ್ನು ಪ್ರವೇಶಿಸಿದ ನಂತರ, ಇದು ಜೀವಕೋಶಗಳು ಮತ್ತು ಅಂಗಾಂಶಗಳ ಮೇಲೆ ಪರಿಣಾಮವನ್ನು ಬೀರುತ್ತದೆ. RhB ಮಿಶ್ರಿತ ಆಹಾರವನ್ನು ದೀರ್ಘಕಾಲದವರೆಗೆ ಸೇವಿಸುವುದರಿಂದ ಕ್ಯಾನ್ಸರ್ ಅಥವಾ ಯಕೃತ್ತಿನ ಹಾನಿ ಉಂಟಾಗುತ್ತದೆ. ಅತಿಯಾದ ಪ್ರಮಾಣದಲ್ಲಿ ಸೇವಿಸಿದರೆ ವಿಷದಂತೆಯೇ ಕೆಲಸ ಮಾಡುತ್ತದೆ.
ಏನಿದು ಕಾಟನ್ ಕ್ಯಾಂಡಿ?
ಕಾಟನ್ ಕ್ಯಾಂಡಿ “ಫೇರಿ ಫ್ಲೋಸ್” ಎಂದೂ ಕರೆಯಲಾಗುತ್ತದೆ. ಹಳ್ಳಿಗಳಲ್ಲಿ ಅಜ್ಜಿ ಕೂದಲು, ಬಾಂಬೆ ಮಿಠಾಯಿ ಎಂದೂ ಕರೆಯಲಾಗುತ್ತದೆ. ಇದು ಸಾಂಪ್ರದಾಯಿಕ ಭಾರತೀಯ ಸಿಹಿತಿಂಡಿ ಅಲ್ಲವೇ ಅಲ್ಲ. ಇದು ಒಂದು ರೀತಿಯ ಸ್ಪನ್ ಸಕ್ಕರೆ, ಇದು ಅನೇಕ ದೇಶಗಳಲ್ಲಿ ಜನಪ್ರಿಯವಾಗಿದೆ. ಇದನ್ನು ಸಕ್ಕರೆ ಪಾಕದಿಂದ ತಯಾರಿಸಲಾಗುತ್ತದೆ, ನಂತರ ಸಣ್ಣ ರಂಧ್ರಗಳ ಮೂಲಕ ತಿರುಗಿಸಲಾಗುತ್ತದೆ. ಅಲ್ಲಿ ಅದು ಗಾಳಿಯ ಮಧ್ಯದಲ್ಲಿ ಹೆಪ್ಪುಗಟ್ಟುತ್ತದೆ ಮತ್ತು ಕೋನ್ ಮೇಲೆ ಕುಳಿತುಕೊಳ್ಳುತ್ತದೆ. ಇದನ್ನು ವಿವಿಧ ಬಣ್ಣಗಳಲ್ಲಿ ತಯಾರಿಸಲಾಗುತ್ತದೆ.