2021ನೇ ಸಾಲಿನ ಪ್ರತಿಷ್ಠಿತ ಆಸ್ಕರ್ ಪ್ರಶಸ್ತಿ ಕಾರ್ಯಕ್ರಮವು ಭಾನುವಾರ ರಾತ್ರಿ ಹೆಚ್ಚು ಸದ್ದುಗದ್ದಲವಿಲ್ಲದೆ ಲಾಸ್ ಆಂಜಲೀಸ್ನಲ್ಲಿ ನಡೆದಿದೆ. ‘ನೋಮ್ಯಾಡ್ ಲ್ಯಾಂಡ್’ ಚಿತ್ರವು ಅತ್ಯುತ್ತಮ ಚಿತ್ರ ಪ್ರಶಸ್ತಿಯನ್ನು ತನ್ನದಾಗಿಸಿಕೊಂಡರೆ, ‘ದಿ ಫಾದರ್’ ಚಿತ್ರದ ಅಭಿನಯಕ್ಕಾಗಿ ಆಂಟೋನಿ ಹಾಪ್ಕಿನ್ಸ್ ಮತ್ತು ‘ನೋಮ್ಯಾಡ್ ಲ್ಯಾಂಡ್’ ಚಿತ್ರದ ಅಭಿನಯಕ್ಕಾಗಿ ಫ್ರಾನ್ಸಸ್ ಮ್ಯಾಕ್ಡೋರ್ಮಂಡ್ ಕ್ರಮವಾಗಿ ಅತ್ಯುತ್ತಮ ನಟ ಮತ್ತು ನಟಿ ಪ್ರಶಸ್ತಿಯನ್ನು ತಮ್ಮದಾಗಿಸಿಕೊಂಡಿದ್ದಾರೆ.
ಈ ಬಾರಿ ಆಸ್ಕರ್ ಕಣದಲ್ಲಿ ‘ನೋಮ್ಯಾಂಡ್ ಲ್ಯಾಂಡ್’, ‘ಮಾಂಕ್’, ‘ಜುದಾಸ್ ಆಂಡ್ ದಿ ಬ್ಲಾಕ್ ಮಸ್ಸೀಹಾ’, ‘ಮಿನಾರಿ’ ಸೇರಿದಂತೆ 56 ಚಿತ್ರಗಳು ವಿವಿಧ ವಿಭಾಗಗಳಲ್ಲಿ ಸ್ಪರ್ಧಿಸಿದ್ದು, ಈ ಪೈಕಿ ‘ನೋಮ್ಯಾಡ್ ಲ್ಯಾಂಡ್’ ಚಿತ್ರವು ಅತ್ಯುತ್ತಮ ಸಿನಿಮಾ, ನಟಿ ಮತ್ತು ನಿರ್ದೇಶನ … ಹೀಗೆ ಮೂರು ಪ್ರಮುಖ ಪ್ರಶಸ್ತಿಗಳನ್ನು ಗೆದ್ದುಕೊಂಡಿದೆ. ಈ ಚಿತ್ರದ ನಿರ್ದೇಶನಕ್ಕೆ ಪ್ರಶಸ್ತಿ ಪಡೆಯುವ ಮೂಲಕ ಕೋಯಿ ಜಾವ್ ಹೊಸ ದಾಖಲೆ ನಿರ್ವಿುಸಿದ್ದಾರೆ. ಚೀನಾ ಮೂಲದ ಕೋಯಿ, ಆಸ್ಕರ್ ಗೆದ್ದ ಏಷ್ಯಾದ ಮೊದಲ ನಿರ್ದೇಶಕಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
ಮಿಕ್ಕಂತೆ, ಯೂ ಜುಂಗ್ ಯೂನ್ (ಅತ್ಯುತ್ತಮ ಪೋಷಕ ನಟಿ – ಮಿನಾರಿ), ಡೇನಿಯಲ್ ಕಲ್ಲೂಯ (ಅತ್ಯುತ್ತಮ ಪೋಷಕ ನಟ – ಜುದಾಸ್ ಆಂಡ್ ದಿ ಬ್ಲಾಕ್ ಮಸ್ಸೀಹಾ), ಅನದರ್ ರೌಂಡ್ (ಅತ್ಯುತ್ತಮ ಅಂತಾರಾಷ್ಟ್ರೀಯ ಚಿತ್ರ – ಡ್ಯಾನಿಶ್ ಭಾಷೆ) , ಸೌಲ್ (ಬೆಸ್ಟ್ ಅನಿಮೇಶನ್ ಚಿತ್ರ) ಪ್ರಶಸ್ತಿಗೆ ಭಾಜನರಾಗಿದ್ದಾರೆ.
ಇರ್ಫಾನ್, ಭಾನು ನೆನಪು: ಪ್ರತೀ ವರ್ಷ ನಿಧನರಾಗುವ ಜನಪ್ರಿಯ ಸೆಲೆಬ್ರಿಟಿಗಳನ್ನು ವಿಶೇಷ ವಿಡಿಯೋ ಮೂಲಕ ನೆನಪಿಸಿಕೊಳ್ಳುವ ಪರಿಪಾಠ ಆಸ್ಕರ್ಸ್ನಲ್ಲಿದ್ದು, ಅದರಂತೆ ಕಳೆದ ವರ್ಷ ನಿಧನರಾದ ಇರ್ಫಾನ್ ಖಾನ್ ಮತ್ತು ಭಾನು ಅಥಯ್ಯ ಅವರನ್ನು ‘ಇನ್ ಮೆಮೋರಿಯಮ್ ಎಂಬ ವಿಭಾಗದಲ್ಲಿ ನೆನಪಿಸಿಕೊಳ್ಳಲಾಗಿದೆ. ಈ ಪೈಕಿ ಭಾನು ಅಥಯ್ಯ ಅವರು ‘ಗಾಂಧಿ’ ಚಿತ್ರದ ವಸ್ತ್ರ ವಿನ್ಯಾಸಕ್ಕಾಗಿ ಪ್ರಶಸ್ತಿ ಪಡೆದ ಮೊದಲ ಭಾರತೀಯರಾದರೆ, ಇರ್ಫಾನ್ ಖಾನ್ ಅಭಿನಯದ ಹಲವು ಹಾಲಿವುಡ್ ಚಿತ್ರಗಳು ಈ ಹಿಂದಿನ ವರ್ಷಗಳಲ್ಲಿ ಆಸ್ಕರ್ ಪ್ರಶಸ್ತಿಗಳಿಗೆ ನಾಮನಿರ್ದೇಶನ ಗೊಂಡಿವೆ. ಇರ್ಫಾನ್ ಮತ್ತು ಭಾನು ಅವರನ್ನು ವಿಡಿಯೋ ಮೂಲಕ ನೆನಪಿಸಿಕೊಂಡರೆ, ಕಳೆದ ವರ್ಷ ನಿಧನರಾದ ರಿಷಿ ಕಪೂರ್, ಸುಶಾಂತ್ ಸಿಂಗ್ ರಜಪೂತ್, ಸೌಮಿತ್ರ ಚಟರ್ಜಿ ಮುಂತಾದವರನ್ನು ಆಸ್ಕರ್ ವೆಬ್ಸೈಟ್ನಲ್ಲಿ ಸ್ಮರಿಸಲಾಗಿದೆ. -ಏಜೆನ್ಸೀಸ್
ಲಿಂಬೆರಸ, ಕೊಬ್ಬರಿ ಎಣ್ಣೆ, ಸ್ಟೀಮ್, ಬಿಸಿ ನೀರು: ಕರೊನಾಗೆ ಮನೆಮದ್ದು- ಡಾ. ವಿಜಯ ಸಂಕೇಶ್ವರ ಸಲಹೆ