ನ್ಯೂಯಾರ್ಕ್: ಸಿನಿಮಾ ಥಿಯೇಟರ್ನ ಗೋಡೆಯೊಳಗೆ ಸಿಕ್ಕಿಹಾಕಿಕೊಂಡಿದ್ದ ವ್ಯಕ್ತಿಯೊಬ್ಬನನ್ನು ಅಗ್ನಿ ಶಾಮಕ ದಳದವರು ಗೋಡೆ ಕೊರೆದು ರಕ್ಷಿಸಿದ ಪ್ರಸಂಗವೊಂದು ನ್ಯೂಯಾರ್ಕ್ನ ಸೈರಾಕೂಸ್ನಿಂದ ವರದಿಯಾಗಿದೆ. ಪುರುಷರ ಶೌಚಾಲಯದ ಕಂಭದ ಗೋಡೆಯಲ್ಲಿ ಎರಡು ದಿನಗಳ ಕಾಲ ಟ್ರ್ಯಾಪ್ ಆಗಿದ್ದ ಈತ ಸಿಕ್ಕಾಗ, ಪೂರ್ಣ ಬೆತ್ತಲೆಯಾಗಿದ್ದ ಎಂದು ವರದಿ ತಿಳಿಸಿದೆ.
ಶುಕ್ರವಾರದಂದು ಬೆಳಿಗ್ಗೆ ಅಲ್ಲಿನ ಲ್ಯಾಂಡ್ಮಾರ್ಕ್ ಥಿಯೇಟರಿನ ಗೋಡೆಯ ಮೇಲೆ ಗುದ್ದುತ್ತಾ ಸಹಾಯ ಕೋರುತ್ತಿದ್ದ ದನಿಯೊಂದು ಕೇಳಿಸಿತು. ಆಗ ಸೈರಾಕೂಸ್ನ ಅಗ್ನಿ ಶಾಮಕ ದಳಕ್ಕೆ ಮಾಹಿತಿ ನೀಡಲಾಯಿತು. ಸಂರಕ್ಷಕ ಸಿಬ್ಬಂದಿ ಗೋಡೆಯಲ್ಲಿ ರಂಧ್ರ ಮಾಡಿ ಒಂದು ಫೈಬರ್ ಆಪ್ಟಿಕ್ ಕ್ಯಾಮೆರಾವನ್ನಿರಿಸಿ ಆ ವ್ಯಕ್ತಿಯಿರುವ ನಿರ್ದಿಷ್ಟ ಜಾಗವನ್ನು ಗಮನಿಸುತ್ತಾ, ಗೋಡೆಯನ್ನು ಒಡೆದು ಅವನನ್ನು ಹೊರತೆಗೆದರು ಎನ್ನಲಾಗಿದೆ.
ಇದನ್ನೂ ಓದಿ: ರಾಷ್ಟ್ರೀಯ ಹೆದ್ದಾರಿಯಲ್ಲೇ ಭತ್ತದ ಫಸಲು ಬಡಿದ ರೈತರು!
ಈ 39 ವರ್ಷ ವಯಸ್ಸಿನ ಪುರುಷನು ಮೇಲ್ಮಹಡಿಯ ಕ್ರಾಲ್ಸ್ಪೇಸ್ನಲ್ಲಿ ಎರಡು ದಿನ ಬಚ್ಚಿಟ್ಟುಕೊಂಡಿದ್ದ. ನಂತರ ಪುರುಷರ ಶೌಚಾಲಯದ ಕಂಭದ ಗೋಡೆಯ ಒಳಕ್ಕೆ ಬಿದ್ದು ಸಿಕ್ಕಿಹಾಕಿಕೊಂಡ ಎಂದು ತಿಳಿದುಬಂದಿದೆ. ಥಿಯೇಟರ್ ನಿರ್ದೇಶಕರಾದ ಮೈಕ್ ಇಂಟಗ್ಲೈಟಾ ಪ್ರಕಾರ, ಕೆಲವು ನೌಕರರು ಆ ವ್ಯಕ್ತಿ ಥಿಯೇಟರಿನಲ್ಲಿ ಓಡಾಡುತ್ತಿದ್ದುದನ್ನು ನೋಡಿದ್ದರು. ನಂತರ ಅವನು ಹೊರಟುಹೋಗಿದ್ದಾನೆ ಎಂದು ತಿಳಿದಿದ್ದರು ಎನ್ನಲಾಗಿದೆ.
ಆಶ್ರಯಕ್ಕಾಗಿ ಬಂದಿದ್ದನೋ, ಬಾತ್ರೂಮನ್ನು ಉಪಯೋಗಿಸಲು ಬಂದಿದ್ದನೋ ಗೊತ್ತಿಲ್ಲ ಎಂದಿರುವ ಅಧಿಕಾರಿಗಳು ಆತ ಮಾನಸಿಕ ಸಮಸ್ಯೆಯಿಂದ ಬಳಲುತ್ತಿರಬಹುದೆಂದು ಶಂಕಿಸಿದ್ದಾರೆ. ಸದ್ಯ ಆತ ಸ್ಥಳೀಯ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದು, ಸದ್ಯಕ್ಕೆ ಪೊಲೀಸರು ಯಾವುದೇ ಪ್ರಕರಣ ದಾಖಲಿಸಿಲ್ಲ ಎಂದು ವರದಿ ತಿಳಿಸಿದೆ. (ಏಜೆನ್ಸೀಸ್)
ವೈಟ್ಹೌಸ್ನಲ್ಲೂ ಬೆಳಗಿದ ದೀಪ! ಹಬ್ಬಕ್ಕೆ ಶುಭ ಕೋರಿದ ಅಮೆರಿಕ ಅಧ್ಯಕ್ಷ