ಢಾಕಾ: ಬಾಂಗ್ಲಾದೇಶ ಕ್ರಿಕೆಟ್ ತಂಡದ ಮಾಜಿ ನಾಯಕ ಮಶ್ರಫೆ ಮೊರ್ಟಜ ಅವರು ಕರೊನಾ ಸೋಂಕಿನಿಂದ ಗುಣಮುಖರಾಗಿದ್ದಾರೆ. ಆದರೆ ಅವರ ಪತ್ನಿ ಸುಮೊನಾ ಹಕ್ ಇನ್ನೂ ಸೋಂಕಿನಿಂದ ಸಂಪೂರ್ಣವಾಗಿ ಚೇತರಿಕೆ ಕಂಡಿಲ್ಲ.
ಬಾಂಗ್ಲಾದಲ್ಲಿ ಸಂಸದರೂ ಆಗಿರುವ ಮೊರ್ಟಜಗೆ ಜೂನ್ 20ರಂದು ಪಾಸಿಟಿವ್ ವರದಿ ಬಂದಿತ್ತು. ಇದೀಗ ನಡೆದ ಪರೀಕ್ಷೆಯಲ್ಲಿ ನೆಗೆಟಿವ್ ವರದಿ ಬಂದಿರುವ ವಿಷಯವನ್ನು ಅವರು ಫೇಸ್ಬುಕ್ನಲ್ಲಿ ಹಂಚಿಕೊಂಡಿದ್ದಾರೆ. ‘ಎಲ್ಲರೂ ಆರೋಗ್ಯವಾಗಿದ್ದೀರಿ ಎಂದು ನಂಬುತ್ತೇನೆ. ದೇವರ ದಯೆ ಮತ್ತು ಎಲ್ಲರ ಹಾರೈಕೆಗಳಿಂದಾಗಿ ನಾನು ಈಗ ಕರೊನಾ ವೈರಸ್ ನೆಗೆಟಿವ್ ಆಗಿದ್ದೇನೆ. ಈ ಕಠಿಣ ಸಮಯದಲ್ಲಿ ನನ್ನೊಂದಿಗೆ ನಿಂತ ಮತ್ತು ನನಗೆ ಶುಭ ಹಾರೈಸಿದ ಎಲ್ಲರಿಗೂ ಧನ್ಯವಾದಗಳು. ನಾನು ಮನೆಯಲ್ಲೇ ಚಿಕಿತ್ಸೆ ಪಡೆದು ಗುಣಮುಖನಾಗಿದ್ದೇನೆ. ಸೋಂಕಿತರಾಗಿರುವ ಎಲ್ಲರೂ ಸಕಾರಾತ್ಮಕವಾಗಿರಿ. ನಿಯಮಗಳಿಗೆ ಬದ್ಧರಾಗಿರಿ. ನಾವೆಲ್ಲರೂ ಒಗ್ಗೂಡಿ ವೈರಸ್ ವಿರುದ್ಧ ಹೋರಾಡುತ್ತಿರೋಣ’ ಎಂದು 36 ವರ್ಷದ ಮಾಜಿ ವೇಗಿ ಬರೆದುಕೊಂಡಿದ್ದಾರೆ.
ಇದನ್ನೂ ಓದಿ: ಸ್ಪಿನ್ ದಿಗ್ಗಜ ಅನಿಲ್ ಕುಂಬ್ಳೆ ಪುತ್ರ ವನ್ಯಜೀವಿ ಛಾಯಾಗ್ರಾಹಕ!
ಪತ್ನಿ ಕಳೆದ 2 ವಾರಗಳಿಂದ ಚಿಕಿತ್ಸೆ ಪಡೆಯುತ್ತಿದ್ದರೂ ಇನ್ನೂ ಪಾಸಿಟಿವ್ ಆಗಿದ್ದಾಳೆ. ಆಕೆ ಉತ್ತಮ ರೀತಿಯಲ್ಲಿ ಚೇತರಿಕೆ ಕಾಣುತ್ತಿದ್ದಾಳೆ. ಆಕೆಗೆ ನಿಮ್ಮ ಹಾರೈಕೆಗಳು ಇರಲಿ ಎಂದು ಮೊರ್ಟಜ ಹೇಳಿದ್ದಾರೆ. ಅವರು ಆಡಳಿತ ಪ ಅವಾಮಿ ಲೀಗ್ ಪಾರ್ಟಿ ಸಂಸದರಾಗಿದ್ದು, ಕರೊನಾ ಹಾವಳಿಯ ಸಮಯದಲ್ಲಿ ತಮ್ಮ ಕ್ಷೇತ್ರದ ಜನರ ಸಂಕಷ್ಟಗಳಿಗೆ ಸ್ಪಂದಿಸುತ್ತಿದ್ದರು.
ಕರೊನಾ ಸೋಂಕಿತರಾಗಿದ್ದ ಬಾಂಗ್ಲಾದೇಶದ ಮತ್ತಿಬ್ಬರು ಕ್ರಿಕೆಟಿಗರಾದ ನಫೀಸ್ ಇಕ್ಬಾಲ್ ಮತ್ತು ನಜ್ಮುಲ್ ಇಸ್ಲಾಂ ಕೂಡ ಗುಣಮುಖರಾಗಿದ್ದಾರೆ. ಅವರೂ ಮನೆಯಲ್ಲೇ ಚಿಕಿತ್ಸೆ ಪಡೆದುಕೊಂಡಿದ್ದರು. ಇವರಿಬ್ಬರೂ ಮೂರು ವಾರಗಳ ಹಿಂದೆ ಪಾಸಿಟಿವ್ ಆಗಿದ್ದರು.