ಬೆಂಗಳೂರು: ಐಪಿಎಲ್ ಆರಂಭಗೊಂಡು 12 ವರ್ಷಗಳೇ ಕಳೆದಿದ್ದರೂ ಒಮ್ಮೆಯೂ ಪ್ರಶಸ್ತಿಗೆ ಮುತ್ತಿಕ್ಕದಿರುವ ಆರ್ಸಿಬಿ ತಂಡ ಹೆಸರಿನಲ್ಲಿ ಸಣ್ಣ ಮಾರ್ಪಾಡು ಮಾಡಿಕೊಳ್ಳುವ ಮೂಲಕ ಅದೃಷ್ಟ ಖುಲಾಯಿಸುವ ಮತ್ತು ರಾಜ್ಯದ ಅಭಿಮಾನಿಗಳಿಗೆ ಮತ್ತಷ್ಟು ಹತ್ತಿರವಾಗುವ ನಿರೀಕ್ಷೆಯಲ್ಲಿದೆ. ಇಂಗ್ಲಿಷ್ನಲ್ಲಿ ‘ರಾಯಲ್ ಚಾಲೆಂಜರ್ಸ್ ಬ್ಯಾಂಗಲೋರ್’ (BANGALORE) ಎಂದಿರುವ ಹೆಸರನ್ನು ‘ರಾಯಲ್ ಚಾಲೆಂಜರ್ಸ್ ಬೆಂಗಳೂರು’ (BENGALURU) ಎಂದು ಬದಲಾಯಿಸಿಕೊಳ್ಳಲು ಆರ್ಸಿಬಿ ಫ್ರಾಂಚೈಸಿ ಮುಂದಾಗಿದೆ. ಇದರಿಂದ ಆರ್ಸಿಬಿ ಎಂಬ ಶಾರ್ಟ್ನೇಮ್ ಉಳಿಸಿಕೊಳ್ಳಲಿದೆ.
ಆರ್ಸಿಬಿ ತಂಡದ ಅಧಿಕೃತ ಟ್ವಿಟರ್ ಸಹಿತ ಸಾಮಾಜಿಕ ಜಾಲತಾಣಗಳ ಖಾತೆಯಲ್ಲಿ ಸದ್ಯ ‘ರಾಯಲ್ ಚಾಲೆಂಜರ್ಸ್’ ಎಂದಷ್ಟೇ ನಮೂದಿಸಲಾಗಿದ್ದು, ಹಾಲಿ ಲಾಂಛನವನ್ನೂ ತೆಗೆದು ಹಾಕಲಾಗಿದೆ. ಹೆಸರಿನ ಮಾರ್ಪಾಡಿನೊಂದಿಗೆ ಲಾಂಛನವೂ ಬದಲಾಗುವ ಸಾಧ್ಯತೆ ಇದೆ. ಫೆಬ್ರವರಿ 16ರಂದು ಆರ್ಸಿಬಿ ದೊಡ್ಡ ಘೋಷಣೆಯೊಂದನ್ನು ಮಾಡಲಿದೆ ಎಂದು ಈಗಾಗಲೆ ಪ್ರಕಟಿಸಿರುವುದರಿಂದ ಅಂದೇ ತಂಡದ ಹೆಸರು ಮಾರ್ಪಾಡು ಅಧಿಕೃತವಾಗುವ ನಿರೀಕ್ಷೆ ಇದೆ. ಉದ್ಯಾನನಗರಿಯ ಹೆಸರನ್ನು ಇಂಗ್ಲಿಷ್ನಲ್ಲಿ, ‘ಬ್ಯಾಂಗಲೋರ್’ ಎಂದು ಇದ್ದುದನ್ನು 2014ರ ನವೆಂಬರ್ 1ರಂದು ‘ಬೆಂಗಳೂರು’ ಎಂದು ಸರ್ಕಾರ ಅಧಿಕೃತವಾಗಿ ಬದಲಾಯಿಸಿದ್ದರೂ, ಆರ್ಸಿಬಿ ಬದಲಾವಣೆ ಮಾಡಿರಲಿಲ್ಲ.
ಆರ್ಸಿಬಿಯ ಈ ದೊಡ್ಡ ಘೋಷಣೆ ನಾಯಕತ್ವ ಬದಲಾವಣೆ ಆಗಿರ ಬಹುದೇ ಎಂಬ ಕೆಲ ಅನುಮಾನಗಳನ್ನು ಹೊಸ ಕೋಚ್ ಮೈಕ್ ಹೆಸ್ಸನ್ ತಳ್ಳಿಹಾಕಿದ್ದು, ಮುಂದಿನ ಆವೃತ್ತಿಯಲ್ಲೂ ವಿರಾಟ್ ಕೊಹ್ಲಿ ಅವರೇ ನಾಯಕರಾಗಿ ಮುಂದುವರಿಯಲಿದ್ದಾರೆ ಎಂದು ಸ್ಪಷ್ಟಪಡಿಸಿದ್ದಾರೆ. -ಏಜೆನ್ಸೀಸ್