ಪ್ರಪಂಚದಾದ್ಯಂತದ ಫ್ಯಾಷನ್ ಶೋಗಳನ್ನ ವಿಭಿನ್ನ ಕಾನ್ಸೆಪ್ಟ್ ಮತ್ತು ಹೊಸ ಕ್ರಿಯೆಟಿವಿಟಿಯೊಂದಿಗೆ ಮಾಡಲಾಗುತ್ತೆ. ಅದರಲ್ಲೂ ಉಡುಪಿನ ವಿನ್ಯಾಸಕ್ಕೆ ವಿಶೇಷ ಮಹತ್ವ ನೀಡಲಾಗುತ್ತೆ. ಕೆಲ ಡಿಸೈನ್ ಮತ್ತು ಥೀಮ್ಡ್ ಡ್ರೆಸ್ಗಳಂತೂ ನೋಡುಗರ ಹುಬ್ಬೇರಿಸುವಂತಿರುತ್ತೆ.
ಅಂತೆಯೇ ಇತ್ತೀಚೆಗೆ ಚೆನ್ನೈನಲ್ಲಿ ನಡೆದ ಫ್ಯಾಷನ್ ಶೋನಲ್ಲಿ ರೂಪದರ್ಶಿಯೊಬ್ಬರು ಜೀವಂತ ಮೀನನ್ನೇ ಧರಿಸಿ ಮರ್ಮೇಡ್ನಂತೆ ರ್ಯಾಂಪ್ ಮೇಲೆ ಚಲಿಸಿದ್ದಾರೆ. ಈ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ಸಖತ್ ವೈರಲ್ ಆಗಿದೆ. ಈಕೆ ಈ ರೀತಿಯಾಗಿ ಜೀವಂತ ಮೀನನ್ನೇ ಬಟ್ಟೆ ಮಾಡಿಕೊಂಡು ಧರಿಸಿರೋದಕ್ಕೆ ನೆಟ್ಟಿಗರು ವಿರೋಧ ವ್ಯಕ್ತ ಪಡಿಸುತ್ತಿದ್ದಾರೆ.
ವಿಡಿಯೋದಲ್ಲಿ ಏನಿದೆ?
ರೂಪದರ್ಶಿಯ ಮೇಕ್ ಅಪ್ ಆರ್ಟಿಸ್ಟ್ ಪ್ರೀತಿ ಈ ವಿಡಿಯೋವನ್ನ ಇನ್ಸ್ಟಾಗ್ರಾಂನಲ್ಲಿ ಹಂಚಿಕೊಂಡಿದ್ದಾರೆ. ರೂಪದರ್ಶಿ ಬಿಳಿ ಉಡುಪನ್ನ ಧರಿಸಿದ್ದು, ಹೊಟ್ಟೆಯ ಬಳಿ ಫಿಶ್ ಬೌಲನ್ನ ಇರಿಸಿಕೊಂಡಿದ್ದಾಳೆ. ಈಕೆ ಧರಿಸಿದ ಬಟ್ಟೆಗೆ ಸಂಪೂರ್ಣವಾಗಿ ಮರ್ಮೇಡ್ ಲುಕ್ ನೀಡಲಾಗಿದೆ. ಪ್ಲಾಸ್ಟಿಕ್ ಚೀಲದಲ್ಲಿ ಹೊಟ್ಟೆಯ ಮೇಲೆ ಈ ಮೀನುಗಳನ್ನ ಇರಿಸಿಕೊಂಡು ಈಕೆ ಪೋಸ್ ನೀಡಿದ್ದಾಳೆ.
ಸೋಶಿಯಲ್ ಮೀಡಿಯಾದಲ್ಲಿ ಈ ವಿಡಿಯೋ ವೈರಲ್ ಆಗುತ್ತಿದ್ದಂತೆಯೇ ಅನೇಕ ಬಳಕೆದಾರರು ಪ್ರಾಣಿಗಳನ್ನು ಫ್ಯಾಷನ್ ಪರಿಕರಗಳಾಗಿ ಈ ರೀತಿ ಬಳಸಿಕೊಂಡಿರುವುದಕ್ಕೆ ವಿರೋಧ ವ್ಯಕ್ತಪಡಿಸಿದ್ದಾರೆ. ಓರ್ವ ಬಳಕೆದಾರರು ಎಲ್ಲದರಲ್ಲೂ ಪ್ರಾಣಿಗಳ ಬಳಕೆ ಮಾಡೋದನ್ನ ನಿಲ್ಲಿಸಿ ಎಂದು ಬರೆದಿದ್ದಾರೆ.
ಮತ್ತಷ್ಟು ಬಳಕೆದಾರರು ಮೀನಿನ ಯೋಗಕ್ಷೇಮದ ಬಗ್ಗೆಯೂ ಕಳವಳ ವ್ಯಕ್ತಪಡಿಸಿದ್ದಾರೆ. ಸಣ್ಣ ಜಾಗದಲ್ಲಿ ಇಷ್ಟು ಮೀನುಗಳನ್ನು ಇರಿಸಬಾರದು. ಜತೆಗೆ ಈ ರೀತಿಯಾಗಿ ಮೀನುಗಳನ್ನ ಇರಿಸಿದ್ದಲ್ಲಿ ಅವುಗಳಿಗೆ ಸರಿಯಾದ ಪ್ರಮಾಣದಲ್ಲಿ ಆಮ್ಲಜನಕ ಸಿಗೋದಿಲ್ಲ. ಅವು ಸಾಯುವ ಸ್ಥಿತಿ ತಲುಪುತ್ತೆ ಎಂದು ಅಭಿಪ್ರಾಯ ಪಟ್ಟಿದ್ದಾರೆ.
ವಿಡಿಯೋಗೆ ಉರ್ಫಿ ಕಾಮೆಂಟ್:
ಉರ್ಫಿ ಜಾವೇದ್ ಬಗ್ಗೆ ಪೀಠಿಕೆ ಕೊಡುವ ಅಗತ್ಯವೇ ಇಲ್ಲ. ಸೋಷಿಯಲ್ ಮೀಡಿಯಾ ಸೆನ್ಸೇಷನ್ ಈ ಹಿಂದಿ ಕಿರುತೆರೆ ನಟಿ. ಉರ್ಫಿ ಜಾವೇದ್ ಅವರು ತಮ್ಮ ಉಡುಗೆಗಳಿಂದಲೇ ಖ್ಯಾತಿ ಗಳಿಸಿದ ರೀತಿ ಮಾತ್ರ ತುಂಬಾ ವಿಶೇಷ. ಉರ್ಫಿ ಜಾವೇದ್ ಈ ಮರ್ಮೇಡ್ ವಿಡಿಯೋಗೆ ಕಾಮೆಂಟ್ ಮಾಡಿದ್ದು, ಐ ಲವ್ ಇಟ್ ಎಂದು ಬರೆದಿದ್ದಾರೆ.