ನವದೆಹಲಿ: ಫೇಸ್ಬುಕ್ನ ಒಡೆತನ ಹೊಂದಿರುವ ಮೆಟಾ ಕಂಪನಿಯ ಸ್ಥಾಪಕ ಹಾಗೂ ಸಿಇಒ ಆಗಿರುವ ಮಾರ್ಕ್ ಜುಕರ್ಬರ್ಗ್ ಒಂದು ವಾರದ ಹಿಂದಷ್ಟೇ ಮೆಟಾ ಚೀಫ್ ಆಪರೇಟಿಂಗ್ ಆಫೀಸರ್ (ಸಿಒಒ) ಶೆರಿಲ್ ಸ್ಯಾಂಡ್ಬರ್ಗ್ ಕೆಲಸವನ್ನು ಮೆಚ್ಚಿ ಒಳ್ಳೆಯ ರೀತಿಯಲ್ಲೇ ವಿದಾಯ ಹೇಳಿದ್ದರು.
ಆದರೆ ಇದೀಗ ಕಂಪನಿಯ ಸಂಪನ್ಮೂಲಗಳನ್ನು ದುರ್ಬಳಕೆ ಮಾಡಿಕೊಂಡಿರುವ ಆರೋಪದ ಮೇಲೆ ಮೆಟಾ ಲಾಯರ್ಗಳು ಶೆರಿಲ್ ವಿರುದ್ಧ ತನಿಖೆ ನಡೆಸುತ್ತಿದ್ದಾರೆ. ಈ ತನಿಖೆಯ ಸಲುವಾಗಿ ಈಗಾಗಲೇ ಕಂಪನಿಯ ಹಲವಾರು ಉದ್ಯೋಗಿಗಳ ವಿಚಾರಣೆ ನಡೆಸಲಾಗಿದೆ ಎಂದು ವಾಲ್ ಸ್ಟ್ರೀಟ್ ಜರ್ನಲ್ ವರದಿ ಮಾಡಿದೆ.
ಶೆರಿಲ್ಗೆ ಸೇರಿದ ಲೀನ್ ಇನ್ ಫೌಂಡೇಷನ್ನಲ್ಲಿ ಮತ್ತು ಆಕೆಯ ಪುಸ್ತಕ ‘ಆಪ್ಷನ್ ಬಿ: ಫೇಸಿಂಗ್ ಅಡ್ವರ್ಸಿಟಿ, ಬಿಲ್ಡಿಂಗ್ ರೆಸಿಲಿಯೆನ್ಸ್ ಆ್ಯಂಡ್ ಫೈಂಡಿಂಗ್ ಜಾಯ್’ ಪ್ರಮೋಷನ್ನಲ್ಲಿ ಫೇಸ್ಬುಕ್ ಸಿಬ್ಬಂದಿಯನ್ನು ಬಳಸಿಕೊಳ್ಳಲಾಗಿದೆ. ಇದಕ್ಕೆ ಪೂರಕ ಎಂಬಂತೆ ಆಪ್ಷನ್ ಬಿನಲ್ಲಿ ಫೇಸ್ಬುಕ್ನ ಹಲವಾರು ಉದ್ಯೋಗಿಗಳನ್ನು ಉಲ್ಲೇಖಿಸಲಾಗಿದೆ.
ಶೆರಿಲ್ ತನ್ನ ಹಳೆಯ ಪಾಲುದಾರ ಆ್ಯಕ್ಟಿವಿಷನ್ ಸಿಇಒ ಬಾಬಿ ಕೊಟಿಕ್ ವಿರುದ್ಧದ ನಕಾರಾತ್ಮಕ ಸುದ್ದಿಗಳನ್ನು ಇಲ್ಲವಾಗಿಸಲು ಫೇಸ್ಬುಕ್ ಮೀಡಿಯಾ ಟೀಮ್ ಬಳಸಿಕೊಂಡಿದ್ದರು ಎಂಬ ಆರೋಪವೂ ಇದೆ. ಮಾತ್ರವಲ್ಲ ಇನ್ನೂ ಕೆಲವು ವೈಯಕ್ತಿಕ ವಿಷಯಗಳಿಗೆ ಕಂಪನಿಯ ಸಂಪನ್ಮೂಲವನ್ನು ಶೆರಿಲ್ ದುರ್ಬಳಕೆ ಮಾಡಿಕೊಂಡಿದ್ದಾರೆ ಎಂಬ ಆರೋಪವಿದೆ.
ಶೆರಿಲ್ 14 ವರ್ಷಗಳಿಂದ ಜತೆಗಿದ್ದು, ಇದೀಗ ಬೇರೆಯಾಗುತ್ತಿದ್ದಾರೆ ಎಂದು ಜೂ. 2ರಂದು ಸುದೀರ್ಘ ಪೋಸ್ಟ್ ಮಾಡುವ ಮೂಲಕ ಮಾರ್ಕ್ ಜುಕರ್ಬರ್ಗ್ ವಿದಾಯ ಹೇಳಿದ್ದರು. ಫೇಸ್ಬುಕ್ಅನ್ನು ಸ್ಥಾಪಿಸಿ ಬೆಳೆಸುವುದರಲ್ಲಿ ಶೆರಿಲ್ ಪಾತ್ರ ಪ್ರಮುಖವಾಗಿತ್ತು. ಇದೀಗ ಆಕೆ ಕಂಪನಿ ತೊರೆಯಲಿರುವಂತೆ ಆರೋಪಗಳು ಕೇಳಿಬಂದಿರುವುದಷ್ಟೇ ಅಲ್ಲದೆ, ತನಿಖೆಯೂ ಆರಂಭವಾಗಿರುವುದು ಅಚ್ಚರಿ ಮೂಡಿಸಿದೆ.
ವಾಟ್ಸ್ಆ್ಯಪ್ ಬಳಕೆದಾರರಿಗೆ ಸಂತಸದ ಸಂಗತಿ; ಟೆಲಿಗ್ರಾಂ ಆ್ಯಪ್ಗೆ ಪೈಪೋಟಿಯಂತೆ ಮತ್ತೊಂದು ಅಪ್ಡೇಟ್..