ಮುಂಬೈ: ಇತರ ಕ್ರೀಡಾಪಟುಗಳಂತೆ ಇನ್ನು ಕ್ರಿಕೆಟಿಗರೂ ಒಲಿಂಪಿಕ್ಸ್ ಪದಕದ ಕನಸು ಕಾಣಬಹುದಾಗಿದೆ. 2028ರಲ್ಲಿ ಕ್ರಿಕೆಟ್ ಕೂಡ ಜಾಗತಿಕ ಕ್ರೀಡಾಹಬ್ಬದ ಭಾಗವಾಗುವುದು ಬಹುತೇಕ ಖಚಿತಗೊಂಡಿದೆ. ಪುರುಷರ ಮತ್ತು ಮಹಿಳಾ ವಿಭಾಗದ ಟಿ20 ಕ್ರಿಕೆಟ್ ಸ್ಪರ್ಧೆಯನ್ನು 2028ರ ಒಲಿಂಪಿಕ್ಸ್ಗೆ ಸೇರ್ಪಡೆಗೊಳಿಸುವ ಆತಿಥೇಯ ಲಾಸ್ ಏಂಜಲಿಸ್ ಗೇಮ್ಸ್ ಸಂಟನಾ ಸಮಿತಿಯ ಪ್ರಸ್ತಾಪವನ್ನು ಅಂತಾರಾಷ್ಟ್ರೀಯ ಒಲಿಂಪಿಕ್ ಸಮಿತಿಯ (ಐಒಸಿ) ಕಾರ್ಯಕಾರಿ ಮಂಡಳಿ ಶುಕ್ರವಾರ ಅಧಿಕೃತವಾಗಿ ಅಂಗೀಕರಿಸಿದೆ.
ಇನ್ನು ಭಾನುವಾರದಿಂದ 3 ದಿನಗಳ ಕಾಲ ಮುಂಬೈನಲ್ಲಿ ನಡೆಯಲಿರುವ ಐಒಸಿ ಅಧಿವೇಶನದಲ್ಲಿ ಈ ಪ್ರಸ್ತಾಪವನ್ನು ಮತದಾನಕ್ಕೆ ಇಡಲಾಗುವುದು. ಅಲ್ಲಿ ಬಹುಮತ ಸಿಕ್ಕರೆ, ಬರೋಬ್ಬರಿ 128 ವರ್ಷಗಳ ಬಳಿಕ ಕ್ರಿಕೆಟ್ ಆಟ, ಜಾಗತಿಕ ಕ್ರೀಡಾಕೂಟ ಒಲಿಂಪಿಕ್ಸ್ಗೆ ಮರಳುವುದು ಅಧಿಕೃತವೆನಿಸಲಿದೆ. ಕ್ರಿಕೆಟ್ ಆಟದಲ್ಲಿ ಬಲಿಷ್ಠವಾಗಿ ಬೆಳೆದಿರುವ ಭಾರತದ ಪಾಲಿಗೆ ಇದು ಶುಭ ಸುದ್ದಿಯಾಗಿದ್ದು, 2028ರಲ್ಲಿ ಚಿನ್ನ ಗೆಲ್ಲುವ ನಿರೀಕ್ಷೆಯೂ ಹುಟ್ಟಿಕೊಂಡಿದೆ.
ಕ್ರಿಕೆಟ್ ಜತೆಗೆ ಬೇಸ್ಬಾಲ್/ಸಾಫ್ಟ್ಬಾಲ್, ಫ್ಲ್ಯಾಗ್ ಫುಟ್ಬಾಲ್, ಲಾಕ್ರೋಸ್ (ಸಿಕ್ಸಸ್) ಮತ್ತು ಸ್ಕ್ವಾಷ್ ಸಹಿತ ಒಟ್ಟು 5 ಕ್ರೀಡೆಗಳನ್ನು 2028ರ ಒಲಿಂಪಿಕ್ಸ್ಗೆ ಹೊಸದಾಗಿ ಸೇರಿಸಲು ಅಧ್ಯಕ್ಷ ಥಾಮಸ್ ಬಾಚ್ ನೇತೃತ್ವದ ಐಒಸಿ ಸಮಿತಿ ಸಮ್ಮತಿಸಿದೆ. ಟಿ20 ಕ್ರಿಕೆಟ್ ಜನಪ್ರಿಯತೆಯನ್ನು ಪರಿಗಣಿಸಿ ಒಲಿಂಪಿಕ್ಸ್ ಪ್ರವೇಶ ನೀಡಲಾಗುತ್ತಿದೆ ಎಂದು ಥಾಮಸ್ ಬಾಚ್ ತಿಳಿಸಿದ್ದಾರೆ. ಕ್ರಿಕೆಟ್ ಈ ಹಿಂದೆ ಪ್ಯಾರಿಸ್ 1990ರ ಒಲಿಂಪಿಕ್ಸ್ನಲ್ಲಿ ಏಕೈಕ ಬಾರಿ ಪದಕ ಸ್ಪರ್ಧೆಯಾಗಿತ್ತು. ಆದರೆ ಆಗ ಎರಡೇ (ಬ್ರಿಟನ್-ಫ್ರಾನ್ಸ್) ತಂಡಗಳು ಆಡಿದ್ದವು.
ಆರೇ ತಂಡಗಳಿಗೆ ಅವಕಾಶ?
ಆತಿಥೇಯ ಲಾಸ್ ಏಂಜಲಿಸ್ ಸಂಟನಾ ಸಮಿತಿಯ ಪ್ರಸ್ತಾಪದ ಪ್ರಕಾರ, ಕ್ರಿಕೆಟ್ ಸಹಿತ ಹೊಸದಾಗಿ ಸೇರ್ಪಡೆಗೊಂಡಿರುವ ಟೀಮ್ ಗೇಮ್ಗಳ ಪೈಕಿ ಒಂದು ವಿಭಾಗದಲ್ಲಿ ಗರಿಷ್ಠ 6 ತಂಡಗಳಷ್ಟೇ ಭಾಗವಹಿಸಬಹುದು. ಇನ್ನು ನಿಯಮ ಪ್ರಕಾರ, ಆತಿಥೇಯ ಅಂದರೆ ಅಮೆರಿಕದ ಕ್ರಿಕೆಟ್ ತಂಡಕ್ಕೆ ನೇರಪ್ರವೇಶ ಸಿಗಲಿದೆ. ಆದರೆ ಒಟ್ಟಾರೆ ಅರ್ಹತಾ ಪ್ರಕ್ರಿಯೆ 2025ರ ವೇಳೆಯಲ್ಲಷ್ಟೇ ಅಂತಿಮಗೊಳ್ಳಬಹುದು ಎಂದು ಐಒಸಿಯ ಕ್ರೀಡಾ ನಿರ್ದೇಶಕ ಕಿಟ್ ಮೆಕ್ಕಾನೆಲ್ ತಿಳಿಸಿದ್ದಾರೆ. ಒಲಿಂಪಿಕ್ಸ್ನಲ್ಲಿ ಭಾಗವಹಿಸುವ ಒಟ್ಟು ಕ್ರೀಡಾಪಟುಗಳಿಗೆ 10,500ರ ಮಿತಿ ಇರುವುದರಿಂದ ತಂಡ ಕ್ರೀಡೆಗಳಲ್ಲಿ ತಂಡಗಳ ಸಂಖ್ಯೆಗೆ ಕಡಿವಾಣ ಹಾಕಲಾಗುತ್ತಿದೆ.