ನವದೆಹಲಿ: ಕೋವಿಡ್-19 ಸಾಂಕ್ರಾಮಿಕ ಅತಿಯಾಗಿದ್ದ ಸಂದರ್ಭದಲ್ಲಿ ಮಾಸ್ಕ್ ಧರಿಸುವುದು, ಸ್ಯಾನಿಟೈಸೇಷನ್, ಫಿಸಿಕಲ್ ಡಿಸ್ಟೆನ್ಸ್ ಸೋಂಕು ಹರಡುವುದನ್ನು ತಡೆಯಲು ಇರುವ ಪ್ರಮುಖ ಮಾರ್ಗ ಎಂದೇ ಹೇಳಲಾಗಿತ್ತು. ಮಾತ್ರವಲ್ಲ, ಆ ಬಳಿಕವೂ ನಂತರದ ಅಲೆಗಳಲ್ಲಿ, ಮತ್ತೆ ಕೋವಿಡ್ ಹೆಚ್ಚಳ ಎಂಬ ಆತಂಕದ ಸಂದರ್ಭದಲ್ಲೂ ಇದನ್ನು ಪುನರುಚ್ಚರಿಸಲಾಗುತ್ತಿತ್ತು.
ಆದರೆ ಕೋವಿಡ್ ಸಂದರ್ಭದಲ್ಲಿ ಮಾಸ್ಕ್ ವಹಿಸಿದ ಪಾತ್ರವೆಷ್ಟು ಎಂಬ ಬಗ್ಗೆ ಅಧ್ಯಯನ ನಡೆದಿದ್ದು, ಆ ಕುರಿತ ಒಂದಷ್ಟು ಮಾಹಿತಿ ಹೊರಬಿದ್ದಿದೆ. ಯುಕೆ ಮೂಲದ ಕಾಖ್ರೇನ್ (Cochrane) ಈ ಅಧ್ಯಯನ ನಡೆಸಿದೆ. ಕಾಖ್ರೇನ್ನ ಅಧ್ಯಯನದ ಅಂಶಗಳನ್ನು ‘ಗೋಲ್ಡ್ ಸ್ಟ್ಯಾಂಡರ್ಡ್ ಆಫ್ ಎವಿಡೆನ್ಸ್ ಬೇಸ್ಡ್ ಮೆಡಿಸಿನ್’ ಎಂದು ಪರಿಗಣಿಸಲಾಗುತ್ತಿದೆ ಎಂದು ಅಲ್ಲಿನ ಆನ್ಲೈನ್ ಮಾಧ್ಯಮವೊಂದು ಬಣ್ಣಿಸಿದೆ.
ಕರೊನಾ ಸೋಂಕು ವ್ಯಾಪಿಸುವುದನ್ನು ತಡೆಯುವಲ್ಲಿ ಮಾಸ್ಕ್, ವೈಯಕ್ತಿಕ ಅಂತರ ಮುಂತಾದ ಭೌತಿಕ ಕ್ರಮಗಳು ಎಷ್ಟರಮಟ್ಟಿಗೆ ಪರಿಣಾಮ ಬೀರಿವೆ ಎಂಬುದರ ಬಗ್ಗೆ ಕಾಖ್ರೇನ್ ಅಧ್ಯಯನ ಮಾಡಿದೆ. ಕೋವಿಡ್ ವ್ಯಾಪಿಸುವುದನ್ನು ತಡೆಯುವ ನಿಟ್ಟಿನಲ್ಲಿ ಬಹುಶಃ ಮಾಸ್ಕ್ ಏನೂ ಪರಿಣಾಮ ಬೀರಲ್ಲ ಅಥವಾ ಅತಿಕಡಿಮೆ ವ್ಯತ್ಯಾಸ ಉಂಟುಮಾಡುತ್ತದೆ ಎಂಬುದಾಗಿ ಈ ಅಧ್ಯಯನದಲ್ಲಿ ನಿರ್ಣಯಿಸಲಾಗಿದೆ.
ಮಾತ್ರವಲ್ಲ, ನಿಯಮಿತ ಸೇವೆಯಲ್ಲಿ ಇರುವ ಆರೋಗ್ಯ ಕಾರ್ಯಕರ್ತರಲ್ಲೂ ಮೆಡಿಕಲ್/ಸರ್ಜಿಕಲ್ ಇಲ್ಲವೇ ಎನ್95 ಮಾಸ್ಕ್ಗಳ ಬೀರಿದ ಪರಿಣಾಮಗಳ ಬಗ್ಗೆ ಖಚಿತ ವ್ಯತ್ಯಾಸ ತಿಳಿದುಬಂದಿಲ್ಲ ಎಂದು ಅಧ್ಯಯನದಲ್ಲಿ ಹೇಳಲಾಗಿದೆ. ಅದಾಗ್ಯೂ ಮಾಸ್ಕ್ ಏನೇನೂ ಪರಿಣಾಮಕಾರಿ ಅಲ್ಲ ಎಂಬುದು ಈ ಅಧ್ಯಯನದ ಅರ್ಥವಲ್ಲ. ಆದರೆ ಇದುವರೆಗಿನ ಅಧ್ಯಯನದ ಪ್ರಕಾರ ಮಾಸ್ಕ್ ಸೋಂಕು ವ್ಯಾಪಿಸುವುದನ್ನು ತಡೆಯುವುದಿಲ್ಲ ಎಂಬುದಾಗಿದೆ ಎಂದು ಅಧ್ಯಯನ ತಿಳಿಸಿದೆ.