ಗುರುಗ್ರಾಮ: ಕರೊನಾ ಸೋಂಕು ತಡೆಯಲು ಮಾಸ್ಕ್ ಬಳಸಿ ಅಂದ್ರೆ ನಗ,ನಗದು ದೋಚುವುದಕ್ಕೂ ಮಾಸ್ಕ್ ಬಳಸಿದ್ರು ನೋಡಿ! ಕಳ್ಳರು ಮಾಸ್ಕ್ ಧರಿಸಿಕೊಂಡು ರೋಗಿಗಳಂತೆ ನಟಿಸುತ್ತ ಡಾಕ್ಟರ್ ದಂಪತಿಯ ಮನೆಗೆ ಹೋಗಿದ್ದರು. ಅವರನ್ನು ಬೆದರಿಸಿ ಅಲ್ಲಿದ್ದ 3 ಲಕ್ಷಕ್ಕೂ ಅಧಿಕ ಮೌಲ್ಯದ ನಗ, ನಗದನ್ನು ದೋಚಿದ್ರು! ಗುರುಗ್ರಾಮದ ಅಪ್ಸ್ಕೇಲ್ ಸೆಕ್ಟರ್ 40ರಲ್ಲಿ ಹಾಡುಹಗಲೇ ನಡೆದ ರಾಬರಿ ಇದು!
ಹೋಮಿಯೋಪಥಿ ಡಾಕ್ಟರ್ ವೇದ ಪ್ರಕಾಶ್ ಟಂಡನ್ ಎಂಬುವವರ ಮನೆ ಕಂ ಕ್ಲಿನಿಕ್ಗೆ ಮೂವರು ಮಾಸ್ಕ್ ಧಾರಿಗಳು ಆಗಮಿಸಿದ್ದರು. ಅವರಲ್ಲೊಬ್ಬ ರೋಗಿಯಂತೆ ನಟಿಸಿದ್ದ. ಡಾಕ್ಟರ್ಗೆ ಏನೂ ಸಂದೇಹ ಬರಲಿಲ್ಲ. ಆತನ ಆರೋಗ್ಯ ಗಮನಿ ಔಷಧ ನೀಡಿ ಹೊರಡುವಂತೆ ಸೂಚಿಸಿದಾಗ ಆತ ಇನ್ನಿಬ್ಬರಿಗೆ ಒಳಗೆ ಬರುವಂತೆ ಸೂಚನೆ ನೀಡಿದ. ಡಾಕ್ಟರ್ ಹಣೆಗೆ ಗನ್ ಇಟ್ಟು, ಅವರ ಪತ್ನಿಯನ್ನೂ ಒಟ್ಟಿಗೆ ಕೂರಿಸಿ ನಗ,ನಗದನ್ನು ಅವರಿಂದಲೇ ತರಿಸಿಕೊಂಡು ಅಲ್ಲಿಂದ ಪರಾರಿಯಾಗಿದ್ದಾರೆ. ಇಷ್ಟೆಲ್ಲವೂ 40 ನಿಮಿಷದ ಅವಧಿಯಲ್ಲಿ ಆಗಿದೆ ಎಂದು ಕ್ರೈಂ ಬ್ರ್ಯಾಂಚ್ ಎಸಿಪಿ ಪ್ರೀತ್ ಪಾಲ್ ಸಿಂಗ್ ಸಂಗ್ವಾನ್ ತಿಳಿಸಿದ್ದಾರೆ.
ಸಿಸಿಟಿವಿ ದೃಶ್ಯಾವಳಿಗಳನ್ನು ವಶಕ್ಕೆ ತೆಗೆದುಕೊಂಡು ತನಿಖೆ ನಡೆಸಲಾಗುತ್ತಿದೆ. ಡಾಕ್ಟರ್ ಮನೆಯಲ್ಲಿ ಕೆಲಸಕ್ಕೆ ಬರುತ್ತಿದ್ದವರನ್ನೆಲ್ಲ ವಿಚಾರಣೆಗೆ ಒಳಪಡಿಸಲಾಗಿದೆ ಎಂದು ಸಂಗ್ವಾನ್ ಹೇಳಿದ್ದಾರೆ. (ಏಜೆನ್ಸೀಸ್)