ನೊಯ್ಡಾ: ಆತ ಪಾರ್ಟಿಯೊಂದರಲ್ಲಿ ಪಾಲ್ಗೊಂಡು ವಾಪಸ್ ಮನೆಗೆ ತೆರಳುತ್ತಿದ್ದ. ಬಿಎಂಡಬ್ಲ್ಯೂ ಕಾರನ್ನು ಡ್ರೈವ್ ಮಾಡಿಕೊಂಡು ಹೋಗುತ್ತಿದ್ದವನಿಗೆ ಮಾರ್ಗಮಧ್ಯೆ ಮೂತ್ರ ವಿಸರ್ಜನೆಗೆ ಹೋಗಬೇಕಾಯಿತು. ಅದೆಷ್ಟು ಅರ್ಜೆಂಟ್ ಆಗಿತ್ತೋ..ಏನೋ…ಕಾರನ್ನು ರಸ್ತೆ ಬದಿಗೆ ನಿಲ್ಲಿಸಿ ಅಲ್ಲೇ ಸ್ವಲ್ಪ ಮುಂದೆ ಹೋದ…ಆದರೆ ವಾಪಸ್ ಬಂದಾಗ ಮಾತ್ರ ಅವನಿಗೆ ದೊಡ್ಡ ಶಾಕ್ ಕಾದಿತ್ತು…!
ನೊಯ್ಡಾದ ರಿಶಬ್ ಅರೋರಾ ಎಂಬಾತ ಸ್ಟಾಕ್ ದಲ್ಲಾಳಿ. ಪಾರ್ಟಿಗೆಂದು ತನ್ನ ಹತ್ತಿರದ ಸಂಬಂಧಿಯ ಹೊಸ ಬಿಎಂಡಬ್ಲ್ಯೂ ಐಷಾರಾಮಿ ಕಾರನ್ನು ತೆಗೆದುಕೊಂಡು ಹೋಗಿದ್ದ. ಈ ಕಾರಿನ ಬೆಲೆ ಬರೋಬ್ಬರಿ 40 ಲಕ್ಷ ರೂ. ಪಾರ್ಟಿಗೆ ಹೋದ ರಿಶಬ್ ಮದ್ಯಪಾನ ಮಾಡಿದ. ಅರ್ಧಂಬರ್ಧ ಅಮಲಿನ ಸ್ಥಿತಿಯಲ್ಲಿ ಮನೆಗೆ ಹೊರಟವನಿಗೆ ಮಾರ್ಗಮಧ್ಯದಲ್ಲಿ ಮೂತ್ರ ವಿಸರ್ಜನೆಗೆ ಹೋಗಬೇಕಾಯಿತು. ಕಾರನ್ನು ನಿಲ್ಲಿಸಿ, ಕೀಯನ್ನು ಅದರಲ್ಲೇ ಬಿಟ್ಟು ರಸ್ತೆಗಿಂತ ಸ್ವಲ್ಪ ಮುಂದೆ ಹೋದ. ಆದರೆ ಆತ ವಾಪಸ್ ಬಂದಾಗ ಕಾರು ಇರಲಿಲ್ಲ. ಅಪರಿಚಿತರ ಗುಂಪೊಂದು ಕಾರನ್ನು ಕದ್ದೊಯ್ದಾಗಿತ್ತು. ಮದ್ಯದ ಅಮಲು ಇಳಿಯುವಷ್ಟು ಆತ ಶಾಕ್ಗೆ ಒಳಗಾಗಿದ್ದ. !
ರಿಶಬ್ ಕೂಡಲೇ ಪೊಲೀಸರಿಗೆ ಮಾಹಿತಿ ನೀಡಿದ. ಪೊಲೀಸರು ಸ್ಥಳ ಪರಿಶೀಲನೆ ನಡೆಸಿದ್ದು, ಕದ್ದವರಿಗಾಗಿ ಹುಡುಕುತ್ತಿದ್ದಾರೆ. ಕಾರಿನ ಮಾಲೀಕನ ಬಗ್ಗೆ ಗೊತ್ತಿರುವವರೇ ಯಾರೋ ಮಾಡಿದ್ದಾರೆ ಎಂದು ಶಂಕೆ ವ್ಯಕ್ತಪಡಿಸಿರುವ ಪೊಲೀಸರು, ಅಪರಿಚಿತ ಕಳ್ಳರ ವಿರುದ್ಧ ಎಫ್ಐಆರ್ ದಾಖಲಿಸಿದ್ದಾರೆ. ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿದ್ದು, ದುಷ್ಕರ್ಮಿಗಳನ್ನು ಆದಷ್ಟು ಶೀಘ್ರವೇ ಪತ್ತೆಹಚ್ಚುವುದಾಗಿ ತಿಳಿಸಿದ್ದಾರೆ.
ಅಷ್ಟಕ್ಕೂ ಈ ಕಾರಿಗಾಗಿ ಮಾಡಿದ 40 ಲಕ್ಷ ರೂ.ಸಾಲ ಇನ್ನೂ ಹಾಗೇ ಇದೆ. ರಿಶಬ್ ಅರೋರಾ ವಿರುದ್ಧ ಡ್ರಂಕ್ ಆ್ಯಂಡ್ ಡ್ರೈವ್ ಪ್ರಕರಣವೂ ದಾಖಲಾಗಿದೆ. (ಏಜೆನ್ಸೀಸ್)