ನವದೆಹಲಿ: ಕೋವಿಡ್-19 ಸಂಕಷ್ಟದಿಂದ ಪಾರಾಗಲು ಪ್ರಧಾನಿ ನರೇಂದ್ರ ಮೋದಿ ರಕ್ಷಣಾ ವಲಯ ಸೇರಿ ವಿವಿಧ ವಲಯಗಳಲ್ಲಿ ಸ್ವಾವಲಂಬನೆ ಸಾಧಿಸುವ ಅಂಶಗಳನ್ನು ಪ್ರತಿಪಾದಿಸಿದ ಬೆನ್ನಲ್ಲೇ ಮೇಡ್ ಇನ್ ಇಂಡಿಯಾ ಫೈಟರ್ಜೆಟ್ ತೇಜಸ್-ಎನ್ ಉತ್ಪಾದನೆಗೆ ವೈಮಾನಿಕ ಅಭಿವೃದ್ಧಿ ಸಂಸ್ಥೆ (ಎಡಿಎ) ಹಸಿರು ನಿಶಾನೆ ತೋರಿದೆ. ನೌಕಾಪಡೆಯ ಐಎನ್ಎಸ್ ವಿಕ್ರಮಾದಿತ್ಯ ಮತ್ತು ಸದ್ಯದಲ್ಲೇ ಸೇವೆಗೆ ಸೇರ್ಪಡೆಗೊಳ್ಳಲಿರುವ ಐಎನ್ಎಸ್ ವಿಕ್ರಾಂತ್ನ ನೆಲೆಗಳಿಂದ ಈ ವಿಮಾನ ಹಾರಾಟ ಕೈಗೊಂಡು ಶತ್ರು ಪಾಳಯದಲ್ಲಿ ಎದೆನಡುಕ ಉಂಟು ಮಾಡಲಿದೆ. ಈ ಎರಡು ಇಂಜಿನ್ವುಳ್ಳ ಈ ವಿಮಾನಗಳು ಇನ್ನು ಆರು ವರ್ಷದಲ್ಲಿ ತಯಾರಾಗಿ ನೌಕಾಪಡೆಯ ಸೇವೆಗೆ ಸೇರ್ಪಡೆಗೊಳ್ಳಲಿವೆ.
ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಉಪಸ್ಥಿತಿಯಲ್ಲಿ ಮೇ 22ರಂದು ನಡೆದ ನೌಕಾಪಡೆ ಮತ್ತು ವಾಯುಪಡೆ ಮುಖ್ಯಸ್ಥರ ಸಭೆಯಲ್ಲಿ ಸ್ವದೇಶಿ ನಿರ್ಮಿತ ತೇಜಸ್-ಎನ್ ಯುದ್ಧವಿಮಾನಗಳ ಅಭಿವೃದ್ಧಿ ಕುರಿತು ಚರ್ಚಿಸಲಾಗಿತ್ತು. ಬಳಿಕ ಹೊಸ ಯುದ್ಧವಿಮಾನಗಳ ಕಾರ್ಯಾಚರಣೆಯ ಅವಶ್ಯಕತೆಗಳ (Operational Requirements) ಬಗ್ಗೆ ರಕ್ಷಣಾ ಸಚಿವಾಲಯದ ಏಕೀಕೃತ ಮುಖ್ಯಕಾರ್ಯಾಲಯ ಮಾರ್ಗಸೂಚಿಯನ್ನು ಹೊರಡಿಸಿತ್ತು.
ಸದ್ಯ ಲಭ್ಯವಿರುವ ಎರಡು ತೇಜಸ್-ಎನ್ ಪ್ರೋಟೋಟೈಪ್ ಯುದ್ಧವಿಮಾನಗಳನ್ನು ಗೋವಾದಲ್ಲಿ ನೆಲೆಗೊಂಡಿರುವ ಐಎನ್ಎಸ್ ವಿಕ್ರಮಾದಿತ್ಯದ ನೆಲೆಯಲ್ಲಿ ಇಳಿಸಿ, ಅಲ್ಲಿಂದ ಹಾರಾಟ ನಡೆಸುವ ಮೂಲಕ ಯಶಸ್ವಿಯಾಗಿ ಪರೀಕ್ಷಿಸಲಾಗಿದೆ.
ಅಮೆರಿಕ ನೌಕಾಪಡೆ ಬಳಸುತ್ತಿರುವ ಬೋಯಿಂಗ್ನ ಎಫ್/ಎ-18 ಇ/ಎಫ್ ಸೂಪರ್ ಹಾರ್ನೆಟ್ ಯುದ್ಧವಿಮಾನಗಳಿಗೆ ಮತ್ತು ಫ್ರೆಂಚ್ ನೌಕಾಪಡೆ ಬಳಸುತ್ತಿರುವ ಮರೀನ್ ರಫೇಲ್ ಯುದ್ಧವಿಮಾನಗಳಿಗೆ ಸಮನಾದ ಸಾಮರ್ಥ್ಯ ತೇಜಸ್-ಎನ್ ಯುದ್ಧವಿಮಾನಕ್ಕೂ ಇದೆ. ತೇಜಸ್-ಎನ್ ಯುದ್ಧವಿಮಾನದಲ್ಲಿ ಆಕಾಶದಿಂದ ಆಕಾಶಕ್ಕೆ ನೆಗೆಯುವ 6 ಕ್ಷಿಪಣಿಗಳನ್ನು ಜೋಡಣೆ ಮಾಡಬಹುದು ಎಂದು ಹೇಳಲಾಗುತ್ತಿದೆ.
ಒಮ್ಮೆ ತಯಾರಾದ ಬಳಿಕ ತೇಜಸ್-ಎನ್ ಯುದ್ಧವಿಮಾನಗಳು ಹಾಲಿ ಸೇವೆಯಲ್ಲಿರುವ ಮಿಗ್-29ಕೆ ಯುದ್ಧವಿಮಾನಗಳ ಬದಲಿಗೆ ಕಾರ್ಯನಿರ್ವಹಿಸಲಿವೆ. ಮಿಗ್-29ಕೆ ಯುದ್ಧವಿಮಾನಗಳ ಸರ್ವಿಸಿಂಗ್ ಸಮಸ್ಯೆ ಇರುವ ಹಿನ್ನೆಲೆಯಲ್ಲಿ ಸ್ವದೇಶಿ ನಿರ್ಮಿತ ಯುದ್ಧವಿಮಾನಗಳ ತಯಾರಿಕೆಗೆ ಕೇಂದ್ರ ಸರ್ಕಾರ ಒಲವು ತೋರುತ್ತಿದೆ ಎನ್ನಲಾಗಿದೆ.
ಈ ಚಿತ್ರ ನೋಡಿ… ಗರ್ಭಿಣಿ ಆನೆಯ ದಾರುಣ ಸಾವಿಗೆ ಕಂಬನಿ ಮಿಡಿಯುತ್ತಿದೆ!