ನವದೆಹಲಿ : ಕರೊನಾ ಲಸಿಕೆಯ ಎರಡೂ ಡೋಸ್ಗಳನ್ನು ತೆಗೆದುಕೊಂಡರೇ ಕರೊನಾ ಸೋಂಕಿನ ವಿರುದ್ಧದ ಸುರಕ್ಷೆಯು ಪರಿಪೂರ್ಣವಾಗುವುದು ಎಂದು ಸರ್ಕಾರ ಹೇಳುತ್ತಾ ಬಂದಿದೆ. ಆದರೆ, ಸುಮಾರು 3.86 ಕೋಟಿ ಭಾರತೀಯರು ಈವರೆಗೆ ಲಸಿಕೆಯ ಎರಡನೇ ಡೋಸ್ಅನ್ನು ನಿಗದಿತ ಸಮಯದಲ್ಲಿ ತೆಗೆದುಕೊಂಡಿಲ್ಲ ಎಂಬುದು ಬೆಳಕಿಗೆ ಬಂದಿದೆ.
ಸಾಮಾಜಿಕ ಕಾರ್ಯಕರ್ತ ರಮಣ್ ಶರ್ಮ ಎಂಬುವರ ಆರ್ಟಿಐ ಪ್ರಶ್ನೆಗೆ ಉತ್ತರವಾಗಿ ಕೇಂದ್ರ ಆರೋಗ್ಯ ಸಚಿವಾಲಯದ ಕೋವಿಡ್-19 ಲಸಿಕೆ ನೀಡಿಕೆ ವಿಭಾಗವು ಈ ಮಾಹಿತಿ ನೀಡಿದೆ. ಕೋವಿನ್ ಪೋರ್ಟಲ್ನ ಮಾಹಿತಿಯ ಅನುಸಾರವಾಗಿ, ಕೋವಿಶೀಲ್ಡ್ ಮತ್ತು ಕೋವಾಕ್ಸಿನ್ನ ಮೊದಲನೇ ಡೋಸ್ ಪಡೆದು, ಎರಡನೇ ಡೋಸ್ ತೆಗೆದುಕೊಳ್ಳದೆ ಇರುವವರ ವಿವರವನ್ನು ಸರ್ಕಾರ ನೀಡಿದೆ.
ಇದನ್ನೂ ಓದಿ: ಅಪಘಾತದಲ್ಲಿ ಗಾಯಗೊಂಡರೂ ಆಂಬುಲೆನ್ಸ್ನಲ್ಲಿ ಬಂದು ಪರೀಕ್ಷೆ ಬರೆದ ವಿದ್ಯಾರ್ಥಿಗಳು!
ಕೋವಿಶೀಲ್ಡ್ ಲಸಿಕೆ ಪಡೆದವರು ಮೊದಲನೇ ಡೋಸ್ ಪಡೆದ 84 ರಿಂದ 112 ದಿನಗಳೊಳಗೆ ಎರಡನೇ ಡೋಸ್ ಲಸಿಕೆ ಪಡೆಯಬೇಕು. ಕೋವಾಕ್ಸಿನ್ ಲಸಿಕೆ ಪಡೆದವರು ಮೊದಲನೇ ಡೋಸ್ನ ನಂತರ 28 ರಿಂದ 42 ದಿನಗಳೊಳಗೆ ಎರಡನೇ ಡೋಸ್ ಪಡೆಯಬೇಕು. ಲಸಿಕಾಕರಣದ ಪೂರ್ಣ ಪ್ರಯೋಜನ ಪಡೆಯಲು ಎರಡೂ ಡೋಸ್ ಲಸಿಕೆಗಳನ್ನು ಪಡೆಯುವುದು ಮುಖ್ಯ ಎಂದು ಸರ್ಕಾರ ತಿಳಿಸಿದೆ.
“ಕೋವಿನ್ ಪೋರ್ಟಲ್ನ ಡ್ಯೂ ರಿಪೋರ್ಟ್ ಪ್ರಕಾರ ಕೋವಿಶೀಲ್ಡ್ನ ಮೊದಲ ಡೋಸ್ ಪಡೆದು ಎರಡನೇ ಡೋಸ್ಅನ್ನು ನಿಗದಿತ ಸಮಯದಲ್ಲಿ ಪಡೆಯದ ಫಲಾನುಭವಿಗಳ ಸಂಖ್ಯೆಯು ಆಗಸ್ಟ್ 17 ರಂದು 3,40,72,993 ಆಗಿದೆ. ಕೋವಾಕ್ಸಿನ್ ಮೊದಲ ಡೋಸ್ ಪಡೆದು ಎರಡನೇ ಡೋಸ್ಅನ್ನು ನಿಗದಿತ ಸಮಯದಲ್ಲಿ ಪಡೆಯದ ಫಲಾನುಭವಿಗಳ ಸಂಖ್ಯೆಯು 46,78,406 ಆಗಿದೆ” ಎಂದು ಮಾಹಿತಿ ನೀಡಲಾಗಿದೆ.
ಇದನ್ನೂ ಓದಿ: ಒಲಿಂಪಿಕ್ಸ್ ಪದಕ ಗೆದ್ದ ಸಿಂಧುಗೆ ಐಸ್ ಕ್ರೀಂ ಕೊಡಿಸಿದ ಪ್ರಧಾನಿ ಮೋದಿ!
ಲಸಿಕೆ ಫಲಾನುಭವಿಗಳು ನಿಗದಿತ ಸಮಯದಲ್ಲಿ ಎರಡನೇ ಡೋಸ್ ಪಡೆಯಬೇಕೆಂದು ಶಿಫಾರಸ್ಸು ಮಾಡಲಾಗಿದೆ. ಆದರೆ, ಎರಡನೇ ಡೋಸನ್ನು ನಿಗದಿತ ಸಮಯದಲ್ಲಿ ಪಡೆಯದ ಫಲಾನುಭವಿಗಳು ಮತ್ತೆ ಮೊದಲನೇ ಡೋಸ್ ಪಡೆಯಬೇಕೆಂದಿಲ್ಲ ಎಂದು ಲಸಿಕೆ ವಿಭಾಗ ತನ್ನ ಪ್ರತಿಕ್ರಿಯೆಯಲ್ಲಿ ಹೇಳಿದೆ. ಕೋವಿನ್ ವೆಬ್ಸೈಟ್ನ ಪ್ರಕಾರ ಭಾರತದಾದ್ಯಂತ ಇಂದು ಸಂಜೆಯವರೆಗೆ 12.65 ಕೋಟಿ ಜನರು ಎರಡೂ ಡೋಸ್ ಲಸಿಕೆಗಳನ್ನು ಪಡೆದಿದ್ದಾರೆ. (ಏಜೆನ್ಸೀಸ್)
ಆಗಸ್ಟ್ 24ರವರೆಗೆ ಯುಎಇಗೆ ಈ ಏರ್ಲೈನ್ಸ್ನ ವಿಮಾನಗಳಿಗೆ ಪ್ರವೇಶವಿಲ್ಲ