ಅಲಾಸ್ಕಾ: ಮೊಬೈಲ್ ಫೋನ್ ಅಂದರೆ ಈಗ ಸಾಧ್ಯತೆಗಳ ಆಗರ. ಅದರಲ್ಲಿ ಮಾಡಲಾಗದದ್ದು ಬಹುಷಃ ಏನೂ ಇಲ್ಲಚವೋ ಏನೋ. ಕೇವಲ ಸಂವಹನಕ್ಕಾಗಿ ಹುಟ್ಟಿಕೊಂಡ ಮೊಬೈಲ್ ಇಂದು ಸಾವಿರಾರು ಜನರಿಗೆ ಇಂದು ಅನ್ನ ಕೂಡ ಕೊಡುತ್ತಿದೆ. ಇದೀಗ ಮೊಬೈಲ್ ಫೋನ್ ಅಲಾಸ್ಕಾದಂತಹ ತೀವ್ರ ಚಳಿ ಇರುವ ಪ್ರದೇಶದಲ್ಲಿ ಸಿಕ್ಕಿ ಹಾಕಿಕೊಂಡಿದ್ದ ವ್ಯಕ್ತಿ ಒಬ್ಬನನ್ನು ಕಾಪಾಡಿದೆ.
ಅಮರಿಕ ಮತ್ತು ಕೆನಡಾದಲ್ಲಿ ಐಫೋನ್ 14 ಸರಣಿಯಲ್ಲಿ ಲಭ್ಯವಿರುವ ಸ್ಯಾಟಲೈಟ್ ವೈಶಿಷ್ಟ್ಯದ ಮೂಲಕ Apple ನ ತುರ್ತು SOS, ಅಲಾಸ್ಕಾದ ನಿಮಿಯುಕ್ ಪಾಯಿಂಟ್ ಬಳಿ ಸಿಲುಕಿಕೊಂಡಿದ್ದ ವ್ಯಕ್ತಿಯ ಜೀವವನ್ನು ಉಳಿಸಿದೆ.
ನೂರ್ವಿಕ್‌ ಎಂಬ ಸ್ಥಳದಿಂದ ಕೊಟ್ಜೆಬ್ಯೂಗೆ ಸ್ನೋ-ಮಷಿನ್‌ನಲ್ಲಿ ಪ್ರಯಾಣಿಸುತ್ತಿದ್ದ ವ್ಯಕ್ತಿಯೊಬ್ಬರು ಕಳೆದುಹೋಗಿದ್ದರು. ನಂತರ ಅವರ ಐಫೋನ್‌ನಲ್ಲಿ ಉಪಗ್ರಹದ ಮೂಲಕ ಆ್ಯಪಲ್ ಐಫೋನ್ನ ತುರ್ತು SOS ಅನ್ನು ಸಕ್ರಿಯಗೊಳಿಸಿದ್ದಾರೆ. ಈ ಮಾಹಿತಿ ಅಲಾಸ್ಕಾ ಸ್ಟೇಟ್ ಟ್ರೂಪರ್ಸ್ಗೆ ಡಿಸೆಂಬರ್ 1ರಂದು, ಎರಡು ಗಂಟೆ ಹೊತ್ತಿಗೆ ಸಿಕ್ಕಿತ್ತು.
ವಾಯುವ್ಯ ಆರ್ಕ್ಟಿಕ್ ಬರೋ ಹುಡುಕಾಟ ಮತ್ತು ರಕ್ಷಣಾ ತಂಡ, ಆ್ಯಪಲ್ನ SOSನ ಮಾಹಿತಿ ಆಧರಿಸಿ ತಕ್ಷಣ ಕಾರ್ಯಾಚರಣೆಗೆ ಇಳಿದಿದ್ದಾರೆ. ತಂಡ, ಆ್ಯಪಲ್ನ ತುರ್ತು ಪ್ರತಿಕ್ರಿಯೆ ಕೇಂದ್ರ ನೀಡಿದ GPS ಲೊಕೇಷನ್ ಆಧರಿಸಿ ನಿಮಿಯುಕ್ ಪಾಯಿಂಟ್ ಪ್ರದೇಶಕ್ಕೆ ಹೋಗಿದ್ದಾರೆ. ಸುಮಾರು ಹೊತ್ತಿನ ಹುಡುಕಾಟದ ನಂತರ ಈ ತಂಡ ಆ ವಯಸ್ಕ ಪುರುಷನನ್ನು ಪತ್ತೆಹಚ್ಚಿ ಕೊಟ್ಜೆಬ್ಯೂಗೆ ಸುರಕ್ಷಿತವಾಗಿ ಕರೆತಂದಿದೆ. (ಏಜೆನ್ಸೀಸ್)