ಮಕಾಸ್ಸರ್: ಪ್ರೇಮಿಗಳ ದಿನವಾದ ಇಂದು ಪ್ರಪಮಚದಾದ್ಯಂತ ವಿಜೃಂಭಣೆಯಿಂದ ಪ್ರೇಮಿಗಳ ದಿನವನ್ನು ಆಚರಿಸಲಾಗುತ್ತಿದೆ. ಆದರೆ ಇಂಡೋನೇಷ್ಯಾದಲ್ಲಿ ಈ ದಿನವನ್ನು ಆಚರಿಸುವಂತಿಲ್ಲ. ಇದರಿಂದ ಯುವ ಜನತೆಗೆ ಸೆಕ್ಸ್ ಬಗ್ಗೆ ಆಸಕ್ತಿ ಮೂಡುತ್ತದೆ ಎನ್ನುವ ಕಾರಣಕ್ಕೆ ಅಲ್ಲಿನ ಸರ್ಕಾರ ಈ ದಿನವನ್ನು ಆಚರಿಸುವುದಕ್ಕೆ ಅನುಮತಿ ನೀಡಿಲ್ಲ.
ಮಕಸ್ಸರ್ನ ಮೇಯರ್ ಮಹಮ್ಮದ್ ಇಕ್ಬಾಲ್ ಸಮದ್ ಸುಹೇ ತನ್ನ ಅಧಿಕಾರ ವ್ಯಾಪ್ತಿಯಲ್ಲಿ ಯಾವುದೇ ರೀತಿಯಲ್ಲಿ ಪ್ರೇಮಿಗಳ ದಿನಾಚರಣೆಯನ್ನು ಮಾಡುವಂತಿಲ್ಲ ಎಂದು ಸಾರ್ವಜನಿಕ ಆದೇಶ ಹೊರಡಿಸಿದ್ದಾರೆ. ಈ ಆದೇಶದ ಮೇರೆಗೆ ನಗರದ ಕೆಲವು ಹೋಟೆಲ್ಗಳ ಮೇಲೆ ದಾಳಿ ಮಾಡಲಾಗಿದ್ದು, ಹೋಟೆಲ್ ಒಂದರಲ್ಲಿ ಅನೈತಿಕ ಸಂಬಂಧ ಹೊಂದಿದ್ದ ಜೋಡಿಯೊಂದನ್ನು ಬಂಧಿಸಲಾಗಿದೆ. ಜರ್ಮನ್ ಮತ್ತು ಇಂಡೋನೇಷ್ಯಾ ಮೂಲದ ಇಬ್ಬರು ಅನೈತಿಕ ಸಂಬಂಧ ಹೊಂದಿದ್ದು ಅವರನ್ನು ಬಂಧಿಸಲಾಗಿತ್ತು. ಆದರೆ ಅವರಿಬ್ಬರು ವಿವಾಹ ಪೂರ್ವ ಅನೈತಿಕ ಸೆಕ್ಸ್ನ ಬಗ್ಗೆ ಉಪನ್ಯಾಸ ನೀಡಲಾರಂಭಿಸಿದ್ದರಿಂದಾಗಿ ಅವರಿಬ್ಬರನ್ನು ಬಿಟ್ಟು ಕಳುಹಿಸಿರುವುದಾಗಿ ಸ್ಥಳೀಯ ಸಾರ್ವಜನಿಕ ಆದೇಶ ಕಚೇರಿಯ ಮುಖ್ಯಸ್ಥ ಇಮಾನ್ ಹುಡ್ ತಿಳಿಸಿದ್ದಾರೆ. ಉಳಿದಂತೆ ವೇಶ್ಯಾವಾಟಿಕೆಯಲ್ಲಿ ತೊಡಗಿಕೊಂಡಿದ್ದ ಐದು ಯುವತಿಯರನ್ನು ದಾಳಿಯು ವೇಳೆ ಸೆರೆ ಹಿಡಿದಿರುವುದಾಗಿ ಹುಡ್ ತಿಳಿಸಿದ್ದಾರೆ.
ನಗರದಲ್ಲಿ ಯಾವುದೇ ಅಂಗಡಿಗಳಲ್ಲಿ ಕಾಂಡೋಂಮ್ನ್ನು ಬಹಿರಂಗವಾಗಿ ಮಾರದಿರುವಂತೆಯೂ ಸಹ ಆದೇಶ ಹೊರಡಿಸಲಾಗಿದೆ. ಕಾಂಡೋಮ್ಗಳ ಭಿತ್ತಿಚಿತ್ರಗಳನ್ನು ಸಹ ಪ್ರಕಟಿಸದಿರುವಂತೆ ಹೇಳಲಾಗಿದೆ. ಯಾವುದೇ ವ್ಯಕ್ತಿ ಕಾಂಡೋಮ್ ಕೊಳ್ಳಬೇಕಾದರೆ ಆತ ವಿವಾಹಿತನೇ ಆಗಿರಬೇಕು ಮತ್ತು ಆತನ ಗುರುತಿನ ಚೀಟಿ ತೋರಿಸಿದ ಮೇಲೆ ಮಾತ್ರವೇ ಕಾಂಡೋಮ್ನ್ನು ಆತನಿಗೆ ನೀಡಬೇಕು ಎಂದು ಎಲ್ಲ ಅಂಗಡಿ ಮುಕ್ಕಟ್ಟುಗಳಿಗೆ ಆದೇಶ ನೀಡಲಾಗಿದೆ.
ಪ್ರೇಮಿಗಳ ದಿನದಂತಹ ಆಚರಣೆಗಳತ್ತ ಯುವ ಜನತೆ ಆಕರ್ಷಿತವಾಗುತ್ತದೆ. ಇಂತಹ ದಿನಾಚರಣೆಗಳು ಡ್ರಗ್ಸ್ ಸೇವನೆಗೆ ಮತ್ತು ಸೆಕ್ಸ್ಗೆ ಪ್ರೇರೇಪಿಸುತ್ತವೆ. ಹಾಗಾಗಿ ಈ ದಿನದ ಆಚರಣೆ ಮಾಡದಿರುವಂತೆ ಆದೇಶ ಹೊರಡಿಸಿರುವುದಾಗಿ ಹುಡ್ ತಿಳಿಸಿದ್ದಾರೆ.
ಇದನ್ನೂ ಓದಿ: ಕೊರೊನಾ ವೈರಸ್ ಕಾರಣಕ್ಕೆ ಸಾಗರದ ನಡುವೆ ನಿರ್ಬಂಧಿತವಾಗಿರುವ ಜಪಾನ್ ಹಡಗಿನಲ್ಲೂ ವ್ಯಾಲೆಂಟೈನ್ಸ್ ಡೇ: ಮನಕಲಕುವಂತಿದೆ ಆಚರಣೆ..
ಸಾಮಾನ್ಯವಾಗಿ ಮುಸ್ಲಿಂ ಪ್ರಧಾನ ದೇಶಗಳಲ್ಲಿ ಪ್ರೇಮಿಗಳ ದಿನಾಚರಣೆಗೆ ಹೆಚ್ಚಿನ ಬೆಂಬಲವನ್ನು ನೀಡಲಾಗುವುದಿಲ್ಲ. ಈ ಆಚರಣೆಯಿಂದಾಗಿ ಧರ್ಮಕ್ಕೆ ಕಳಂಕ ತರುವಂತಹ ಕೆಲಸಗಲಾಗಬಹುದು ಎನ್ನುವ ದೃಷ್ಟಿಯಲ್ಲಿ ಆಚರಣೆಗೆ ಅನುಮತಿ ನಿರಾಕರಿಸಲಾಗುತ್ತದೆ. (ಏಜೆನ್ಸೀಸ್)