ನವದೆಹಲಿ: ಕರೊನಾ ವೈರಸ್ ಹಾವಳಿ ಹಿನ್ನೆಲೆಯಲ್ಲಿ ಈ ವರ್ಷ ಚಿನ್ನದ ಬಳಕೆ ಕಳೆದ ವರ್ಷಕ್ಕಿಂತ ಶೇ.50 ಕಡಿಮೆಯಾಗುವ ನಿರೀಕ್ಷೆ ಇದೆ.
ಕರೊನಾ ವೈರಸ್ ಹಾವಳಿಯಿಂದ ರಾಷ್ಟ್ರದಲ್ಲಿ ಲಾಕ್ಡೌನ್ ಇರುವುದರಿಂದ ಚಿನ್ನದ ಮಳಿಗೆಗಳು ಬಾಗಿಲು ಮುಚ್ಚಿವೆ. ಈ ರೀತಿ ಮಳಿಗೆಗಳು ಬಾಗಿಲು ಮುಚ್ಚಿದನ್ನು 30 ವರ್ಷಗಳಿಂದ ಕಂಡೇ ಇಲ್ಲ ಎಂಬುದು ಚಿನ್ನದ ವ್ಯಾಪಾರಿಗಳ ಅಭಿಪ್ರಾಯ.
ಲಾಕ್ಡೌನ್ ಹಿನ್ನೆಲೆಯಲ್ಲಿ ಮಳಿಗೆಗಳು ಮುಚ್ಚಿರುವುದರಿಂದ ಚಿನ್ನದ ಪೂರೈಕೆ ಕಡಿಮೆಯಾಗಿ ಚಿನ್ನದ ಬೆಲೆ ದಿಢೀರ್ ಏರಿಕೆಯಾಗಿದೆ. ಈ ವರ್ಷದ ಏಪ್ರಿಲ್ ಆರಂಭದಲ್ಲಿ 7 ವರ್ಷಗಳಲ್ಲಿ ಕಾಣದಷ್ಟು ಚಿನ್ನದ ಬೆಲೆ ಏರಿಕೆ ಕಂಡಿದೆ. ದಿಢೀರ್ ಬೆಲೆ ಏರಿಕೆ ಕೂಡ ಚಿನ್ನದ ಖರೀದಿ ಮೇಲೆ ಪರಿಣಾಮ ಬೀರಿ ಚಿನ್ನದ ಬಳಕೆ ಕಡಿಮೆಯಾಗಲಿದೆ.
ಈ ವರ್ಷ ಚಿನ್ನದ ಬಳಕೆ 400 ಟನ್ನಿಂದ 350 ಟನ್ಗೆ ಇಳಿಯುವ ನಿರೀಕ್ಷೆ ಇದೆ ಎಂದು ಅಖಿಲ ಭಾರತ ಚಿನ್ನಾಭರಣ ಮಾರಾಟಗಾರರ ಸಂಘದ ಅಧ್ಯಕ್ಷ ಎನ್.ಅನಂತ ಪದ್ಮನಾಭನ್ ತಿಳಿಸಿದ್ದಾರೆ.
ಕಳೆದ ವರ್ಷ 690. 4 ಟನ್ ಚಿನ್ನದ ಬಳಕೆಯಾಗಿತ್ತು. 1991ಲ್ಲಿ ಅತೀ ಕಡಿಮೆ ಚಿನ್ನದ ಬಳಕೆಯಾಗಿದೆ. ಬೇಸಿಗೆಯಲ್ಲಿ ಮದುವೆಗಳು ನಡೆಯುತ್ತಿದ್ದವು. ಲಾಕ್ಡೌನ್ ಹಿನ್ನೆಲೆಯಲ್ಲಿ ಮದುವೆಗಳು ನಡೆಯುತ್ತಿಲ್ಲ. ಹೀಗಾಗಿ ಚಿನ್ನ ಖರೀದಿ ಪಾತಾಳ ತಲುಪಿದೆ. ಲಾಕ್ಡೌನ್ ಅಂತ್ಯಗೊಂಡರೆ ಅಕ್ಷಯ ತೃತೀಯದಲ್ಲಿ ಚಿನ್ನದ ಖರೀದಿ ನಡೆಯಲಿದೆ ಎಂಬ ವಿಶ್ವಾಸವನ್ನು ಅವರು ವ್ಯಕ್ತಪಡಿಸಿದರು.
ಚಿನ್ನಾಭರಣ ಖರೀದಿ ಕಡಿಮೆಯಾಗಿರುವುದರಿಂದ ಈ ವಲಯದಲ್ಲಿ ದುಡಿಯುತ್ತಿರುವ ಉದ್ಯೋಗಿಗಳ ವೇತನ ಕಡಿತ ಮಾಡುವ ಚಿಂತನೆ ಕೂಡ ನಡೆಯುತ್ತಿದೆ ಎಂದು ಅವರು ತಿಳಿಸಿದರು. (ಏಜೆನ್ಸೀಸ್)
VIDEO | ಪ್ರಾಣಿಗಳಿಂದ ಮನುಷ್ಯ ಕಲಿಯಬೇಕಾದುದು ಇದೆ ಎಂಬುದನ್ನು ತೋರಿಸಿಕೊಟ್ಟ ವಿಡಿಯೋ ಯಾವುದು?