ಬಹ್ರೈನ್ : ಕೋವಿಡ್ 19 ನಿಯಮಗಳ ಉಲ್ಲಂಘನೆಗಾಗಿ ಬಹ್ರೈನ್ನಲ್ಲಿ 3 ವರ್ಷ ಜೈಲು ಶಿಕ್ಷೆಗೊಳಗಾಗಿರುವ ತನ್ನ ತಮ್ಮನ ಬಿಡುಗಡೆಗೆ ಸಹಾಯ ಮಾಡಬೇಕೆಂದು ಹೈದರಾಬಾದ್ ನಿವಾಸಿಯೊಬ್ಬರು ವಿದೇಶಾಂಗ ಸಚಿವಾಲಯದ ಮೊರೆ ಹೋಗಿದ್ದಾರೆ. ಬಿಹಾರ ಮೂಲದ ಮೊಹಮ್ಮದ್ ಖಾಲಿದ್ ಎಂಬುವನಿಗೆ ಕ್ವಾರಂಟೈನ್ ಮೀರಿ ಓಡಾಡಿದ ಆರೋಪದ ಮೇಲೆ ಬಹ್ರೈನ್ನಲ್ಲಿ ಜೈಲು ಶಿಕ್ಷೆಯೊಂದಿಗೆ 10 ಲಕ್ಷ ರೂ.ಗಳ ದಂಡ ವಿಧಿಸಲಾಗಿದೆ ಎಂದು ತಿಳಿದುಬಂದಿದೆ.
ಅಕ್ರಮವಾಗಿ ಶಿಕ್ಷೆ ವಿಧಿಸಲಾಗಿದೆ ಎಂದಿರುವ ಖಾಲಿದ್ನ ಕುಟುಂಬಸ್ಥರು, ಈ ವಿಚಾರದಲ್ಲಿ ಭಾರತ ಸರ್ಕಾರವು ಮಧ್ಯಸ್ತಿಕೆ ವಹಿಸಿ ಆತನ ಬಿಡುಗಡೆಗೆ ಅನುವು ಮಾಡಿಕೊಡಬೇಕೆಂದು ಕೋರಿದ್ದಾರೆ. ಖಾಲಿದ್ ಸಹೋದರ ಎನ್ನಲಾದ ಹುಸ್ಸೈನ್ ಅಹಮದ್ ಎಂಬುವರು ಈ ಬಗ್ಗೆ ವಿದೇಶಾಂಗ ಸಚಿವ ಎಸ್.ಜೈಶಂಕರ್ ಅವರಿಗೆ ಪತ್ರ ಬರೆದಿದ್ದಾರೆ.
ಇದನ್ನೂ ಓದಿ: ಡೇಟಿಂಗ್ ಆ್ಯಪ್ ಮೂಲಕ ಪುಸಲಾಯಿಸಿ ಕರೆದರು, ವಿಡಿಯೋ ಮಾಡಿ ಬ್ಲ್ಯಾಕ್ಮೇಲ್ ಮಾಡಿದರು!
ಕಳೆದ 8 ವರ್ಷಗಳಿಂದ ಬಹ್ರೈನ್ನ ಜಾಹೆಕಾನ್ ಕಂಪನಿಯಲ್ಲಿ ಎಲೆಕ್ಟ್ರಿಷಿಯನ್ ಆಗಿ ಕೆಲಸ ಮಾಡುತ್ತಿರುವ ಮೊಹಮ್ಮದ್ ಖಾಲಿದ್ಗೆ ಮೇ 18 ರಂದು ಕರೊನಾ ಪಾಸಿಟೀವ್ ಬಂತು. ಕೋವಿಡ್ ಕ್ಯಾಂಪ್ ಮತ್ತು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದ ನಂತರ ಮೇ 31 ಕ್ಕೆ ಡಿಸ್ಚಾರ್ಜ್ ಆದ. ನಂತರ 17 ದಿನಗಳ ಮಟ್ಟಿಗೆ ಮನೆಯಲ್ಲೇ ಕ್ವಾರಂಟೈನ್ ಆಗಲು ಹೇಳಲಾಗಿತ್ತು. ಕಂಪೆನಿ ಒದಗಿಸಿದ್ದ ಜಾಗದಲ್ಲಿ ವಾಸಿಸುತ್ತಿದ್ದು, ಊಟದ ವ್ಯವಸ್ಥೆ ಇಲ್ಲದ್ದರಿಂದ ಜೂನ್ 7 ರಂದು ಆಹಾರ ಖರೀದಿಸಲು ಹೊರಗೆ ಹೋಗಿದ್ದ. ಆ ಸಮಯದಲ್ಲಿ ಸ್ಥಳೀಯರೊಬ್ಬರು ಆತ ಎಲೆಕ್ಟ್ರಾನಿಕ್ ಟ್ರ್ಯಾಕರ್ ವ್ರಿಸ್ಟ್ಬ್ಯಾಂಡ್ ಹಾಕಿಕೊಂಡು ಓಡಾಡುತ್ತಿದ್ದಾನೆಂದು ವಿಡಿಯೋ ಮಾಡಿ ಸಾಮಾಜಿಕ ಮಾಧ್ಯಮದಲ್ಲಿ ಪ್ರಕಟಿಸಿದರು. ತಕ್ಷಣ ಖಾಲಿದ್ನನ್ನು ಬಂಧಿಸಲಾಯಿತು ಎಂದು ಪತ್ರದಲ್ಲಿ ವಿವರಿಸಿದ್ದಾರೆ.
ಬಂಧನದ ನಂತರ ಆತನ ಕೋವಿಡ್ ಪರೀಕ್ಷೆ ಮಾಡಿದಾಗ ನೆಗೆಟೀವ್ ಬಂತು. ಆದಾಗ್ಯೂ ಅವನಿಗೆ 3 ವರ್ಷ ಜೈಲು ಶಿಕ್ಷೆ ಮತ್ತು ದಂಡವನ್ನು ವಿಧಿಸಲಾಯಿತು. ಕುಟುಂಬವು ಬಡತನದ ಕಾರಣದಿಂದಾಗಿ ಕಾನೂನು ಸಹಾಯ ಪಡೆಯಲು ಅಸಮರ್ಥವಾಗಿದ್ದು, ಭಾರತ ಸರ್ಕಾರ ಅವನ ಬಿಡುಗಡೆಗೆ ಸಹಾಯ ಮಾಡಬೇಕೆಂದು ಹುಸ್ಸೈನ್ ಅಹಮದ್ ಮನವಿ ಮಾಡಿದ್ದಾರೆ. (ಏಜೆನ್ಸೀಸ್)
ವಿದ್ಯುತ್ ದರ ಹೆಚ್ಚಳ ಹಿಂಪಡೆಯಲು, ತೆರಿಗೆ ಇಳಿಸಲು ಎಫ್ಕೆಸಿಸಿಐ ಆಗ್ರಹ