ಲಂಡನ್ : ಕೇಂಬ್ರಿಡ್ಜ್ ಯೂನಿವರ್ಸಿಟಿಯ ರಸಾಯನಶಾಸ್ತ್ರಜ್ಞರಾದ ಶಂಕರ್ ಬಾಲಸುಬ್ರಮಣಿಯನ್ ಮತ್ತು ಡೇವಿಡ್ ಕ್ಲೆನರ್ಮನ್ ಅವರನ್ನು ‘2020 ಮಿಲೇನಿಯಮ್ ಟೆಕ್ನಾಲಜಿ ಪ್ರೈಜ್’ನ ವಿಜೇತರನ್ನಾಗಿ ಘೋಷಿಸಲಾಗಿದೆ. ವಿಜ್ಞಾನ ಮತ್ತು ತಂತ್ರಜ್ಞಾನ ಕ್ಷೇತ್ರದ ಈ ಪ್ರತಿಷ್ಠಿತ ಜಾಗತಿಕ ಬಹುಮಾನವನ್ನು ಈ ವಿಜ್ಞಾನಿಗಳು ಜಂಟಿಯಾಗಿ ಅಭಿವೃದ್ಧಿಪಡಿಸಿರುವ ಕ್ರಾಂತಿಕಾರಿ ಡಿಎನ್ಎ ಸೀಖ್ವೆನ್ಸಿಂಗ್ ಟೆಕ್ನೀಕ್ ‘ಎನ್ಜಿಎಸ್’ಗೆ ನೀಡಲಾಗಿದೆ. ಕರೊನಾ ವೈರಸ್ನಂಥ ಮಾರಕ ರೋಗಗಳನ್ನುಂಟು ಮಾಡುವ ಜೀವಿಗಳ ಪತ್ತೆ ಮತ್ತು ತಡೆಯಲ್ಲಿ ಈ ತಂತ್ರಜ್ಞಾನ ಬಹೂಪಯೋಗಿಯಾಗಿದೆ ಎನ್ನಲಾಗಿದೆ.
ಈ ಬಹುಮಾನವನ್ನು ಟೆಕ್ನಾಲಜಿ ಅಕಾಡೆಮಿ ಫಿನ್ಲ್ಯಾಂಡ್ (ಟಿಎಎಫ್) 2004 ರಿಂದ 2 ವರ್ಷಕ್ಕೊಮ್ಮೆ ಸಮಾಜದ ಒಳಿತಿಗೆ ಕೊಡುಗೆ ನೀಡುವ ಕ್ರಾಂತಿಕಾರಿ ಅನ್ವೇಷಣೆಗಳಿಗೆ ನೀಡುತ್ತಾ ಬಂದಿದ್ದು, 1 ಮಿಲಿಯನ್ ಯೂರೋಗಳ ಮೌಲ್ಯ ಹೊಂದಿದೆ. ಕರೊನಾ ಸಾಂಕ್ರಾಮಿಕದ ಹಿನ್ನೆಲೆಯಲ್ಲಿ ತಡವಾಗಿ ಘೋಷಿಸಲ್ಪಟ್ಟ ಬಹುಮಾನವನ್ನು ನಿನ್ನೆ ನಡೆದ ವರ್ಚುವಲ್ ಕಾರ್ಯಕ್ರಮದಲ್ಲಿ ಫಿನ್ಲ್ಯಾಂಡ್ ರಿಪಬ್ಲಿಕ್ನ ಅಧ್ಯಕ್ಷ ಸೌಲಿ ನೀನಿಸ್ಟೊ ಅವರು ಪ್ರದಾನಿಸಿದ್ದಾರೆ.
ಭಾರತ ಮೂಲದ ಬ್ರಿಟಿಷ್ ಆದ ಮೆಡಿಸಿನಲ್ ಖೆಮಿಸ್ಟ್ರಿ ಪ್ರೊಫೆಸರ್ ಬಾಲಸುಬ್ರಮಣಿಯನ್ ಮತ್ತು ಬ್ರಿಟಿಷ್ ಬಯೋಫಿಸಿಕಲ್ ಖೆಮಿಸ್ಟ್ ಆದ ಕ್ಲೆನರ್ಮನ್ ಅವರು ಸೊಲೆಕ್ಸಾ-ಇಲ್ಯುಮಿನ ನೆಕ್ಸ್ಟ್ ಜನರೇಷನ್ ಡಿಎನ್ಎ ಸೀಖ್ವೆನ್ಸಿಂಗ್ (ಎನ್ಜಿಎಸ್)ಅನ್ನು ಅನ್ವೇಷಿಸಿದ್ದಾರೆ. ಈ ತಂತ್ರಜ್ಞಾನವು ವೇಗವಾದ, ನಿಖರವಾದ, ಕಡಿಮೆ-ವೆಚ್ಚದ ಮತ್ತು ದೊಡ್ಡ-ಪ್ರಮಾಣದ ಜೀನೋಮ್ ಸೀಖ್ವೆನ್ಸಿಂಗ್ ಮಾಡಲು ಅನುವು ಮಾಡಿಕೊಡುತ್ತದೆ. ಇದನ್ನು ಕರೊನಾ ವೈರಸ್ನ ರೂಪಾಂತರಗಳನ್ನು ಪತ್ತೆ ಹಚ್ಚುವಲ್ಲಿ ಬಳಸಲಾಗುತ್ತಿದೆ ಎನ್ನಲಾಗಿದೆ.
ಜೀವಿಗಳ ಸಂಪೂರ್ಣ ಡಿಎನ್ಎ ಅನುಕ್ರಮವನ್ನು ಅತಿ ವೇಗದಲ್ಲಿ ಓದಲು ಅವಕಾಶ ಮಾಡಿಕೊಡುವ ಈ ಪ್ರಕ್ರಿಯೆಯು ಕರೊನಾ ಸಾಂಕ್ರಾಮಿಕ ರೋಗದ ವಿರುದ್ಧದ ಹೋರಾಟದಲ್ಲಿ ನಿರ್ಣಾಯಕವಾಗಿ ಹೊರಹೊಮ್ಮಿದೆ. ಸದರಿ ತಂತ್ರಜ್ಞಾನವು ಕರೋನವೈರಸ್ನ ಸೀಖ್ವೆಂಸ್ಅನ್ನು ಕಂಡುಹಿಡಿಯಲು ಸಹಾಯ ಮಾಡಿ, ಲಸಿಕೆಗಳ ರಚನೆಗೆ ಅನುವು ಮಾಡಿಕೊಟ್ಟಿದೆ ಮತ್ತು ವೈರಸ್ನ ಹೊಸ ರೂಪಾಂತರಗಳನ್ನು ಗುರುತಿಸಲು ಸಹಾಯ ಮಾಡುತ್ತಿದೆ ಎಂದು ಟಿಎಎಫ್ನ ಪ್ರೊಫೆಸರ್ ಮಾರ್ಜಾ ಮಾಕರೋವ್ ವಿವರಿಸಿದ್ದಾರೆ. (ಏಜೆನ್ಸೀಸ್)
ಕೋವಿಡ್ ಡ್ಯೂಟಿಯಲ್ಲಿದ್ದ ಶಿಕ್ಷಕರ ಸಾವು : ಅವಲಂಬಿತರಿಗೆ ಉದ್ಯೋಗ, ಇತರ ಸವಲತ್ತು
‘ರಾಧೆ ಪೈರೆಸಿಯಲ್ಲಿ ತೊಡಗಬೇಡಿ, ತೊಂದರೆಗೆ ಸಿಲುಕುತ್ತೀರಿ’ ಎಂದ ಸಲ್ಮಾನ್