ನವದೆಹಲಿ: ಭಾರತದ ಪ್ರಮುಖ ಮೂಲಸೌಕರ್ಯ ಯೋಜನೆಗಳಿಗೆ ಈ ಬ್ಯಾಂಕ್ ಈಗಾಗಲೇ ಸಾಲ ನೀಡಿದೆ. ದೆಹಲಿ- ಮೀರತ್ ರ್ಯಾಪಿಡ್ ರೈಲು ಯೋಜನೆ, ಮುಂಬೈ ಮೆಟ್ರೋ, ಚೆನ್ನೈ ಮೆಟ್ರೋ ಹಾಗೂ ಬೆಂಗಳೂರು ಮೆಟ್ರೋ ಯೋಜನೆಗಳಿಗೂ ಭಾರಿ ಸಾಲ ಒದಗಿಸಲಿದೆ.
ಇದಲ್ಲದೇ, ಆಂಧ್ರಪ್ರದೇಶ, ಗುಜರಾತ್, ತಮಿಳುನಾಡು, ರಾಜಸ್ಥಾನ, ಪಶ್ಚಿಮ ಬಂಗಾಲದ ಯೋಜನೆಗಳಿಗೂ ಈ ಬ್ಯಾಂಕ್ನಿಂದ ಸಾಲ ಪಡೆಯಲಾಗಿದೆ. ಒಟ್ಟಾರೆ ಸಾಲದಲ್ಲಿ ಭಾರತವೇ ಶೇ.25 ಪಾಲು ಗಿಟ್ಟಿಸಿಕೊಂಡಿದೆ.
ಇದನ್ನೂ ಓದಿ; ಕರೊನಾ ಲಸಿಕೆಗೆ ಜಗತ್ತಿನ ಅತಿ ದೊಡ್ಡ ಕ್ಲಿನಿಕಲ್ ಟ್ರಯಲ್; 30 ಸಾವಿರ ಜನರ ಮೇಲೆ ಪ್ರಯೋಗ
ಯಾವುದು ಈ ಬ್ಯಾಂಕ್ ಅಂತೀರಾ..? ಇದೇ ಏಷ್ಯನ್ ಇನ್ಫ್ರಾಸ್ಟ್ರಕ್ಚರ್ ಇನ್ವೆಸ್ಟ್ಮೆಂಟ್ ಬ್ಯಾಂಕ್. ಆರಂಭವಾದಾಗ 57 ರಾಷ್ಟ್ರಗಳು ಇದರ ಸಂಸ್ಥಾಪಕ ಸದಸ್ಯತ್ವ ಹೊಂದಿದ್ದವು. ಸದ್ಯ ಈ ಬ್ಯಾಂಕ್ನ ಸದಸ್ಯರ ಸಂಖ್ಯೆ 102ಕ್ಕೆ ಏರಿದೆ. ಬೀಜಿಂಗ್ಅನ್ನು ಕೇಂದ್ರಸ್ಥಾನವಾಗುಳ್ಳ ಈ ಬ್ಯಾಂಕ್ 2000 ಕೋಟಿ ಡಾಲರ್ಗೂ (ಅಂದಾಜು 1.5 ಲಕ್ಷ ಕೋಟಿ ರೂ.) ಹೆಚ್ಚು ಮೊತ್ತವನ್ನು ಸದಸ್ಯ ರಾಷ್ಟ್ರಗಳಿಗೆ ಸಾಲವಾಗಿ ನೀಡಿದೆ.
ಈ ಪೈಕಿ ಅತಿ ಹೆಚ್ಚು ಸಾಲ ಪಡೆದದ್ದು ಭಾರತ. ಹೌದು… ಈಗಾಗಲೇ 33,750 ಕೋಟಿ ರೂ. ಸಾಲ ಗಿಟ್ಟಿಸಿಕೊಂಡಿದೆ. ಇನ್ನೂ 7500 ಕೋಟಿ ರೂ. ಸಾಲ ಹಂಚಿಕೆಯಾಗಬೇಕಿದೆ.
ಚೀನಾ ನೇತೃತ್ವದ ಈ ಬ್ಯಾಂಕ್ನಲ್ಲಿ ಭಾರತ ಕೂಡ ಸಹ-ಸಂಸ್ಥಾಪಕನ ಸ್ಥಾನ ಹೊಂದಿದೆ. 2013ರಲ್ಲಿ ಇಂಥದ್ದೊಂದು ಬ್ಯಾಂಕ್ ಪ್ರಸ್ತಾವನೆಯನ್ನು ಚೀನಾ ಅಧ್ಯಕ್ಷ ಕ್ಸಿ ಜಿನ್ಪಿಂಗ್ ಮುಂದಿಟ್ಟಿದ್ದರು. 2016ರ ಜನವರಿಯಲ್ಲಿ ಇದು ಕಾರ್ಯಾರಂಭಿಸಿತು.
ಇದನ್ನೂ ಓದಿ; ತಮಿಳುನಾಡಿನ ರಾಜಕೀಯದಲ್ಲಿ ಸಂಚಲನ ಸೃಷ್ಟಿಸಿದ ಅಣ್ಣಾಮಲೈ ಸಂದರ್ಶನ
ಮುಖ್ಯವಾಗಿ ಇದು ಮೂಲಸೌಕರ್ಯಗಳ ಅಭಿವೃದ್ಧಿ ಯೋಜನೆಗಳಿಗೆ ಆರ್ಥಿಕ ನೆರವು ನೀಡುತ್ತದೆ. ಜತೆಗೆ ಕೋವಿಡ್ ಕಾರಣದಿಂದಾಗಿ ಸಂಕಷ್ಟಕ್ಕೊಳಗಾಗಿರುವ ದೇಶಗಳ ಆರ್ಥಿಕತೆ ಪುನಶ್ಚೇತನಕ್ಕೆ ನೆರವನ್ನೂ ನೀಡಿದೆ. ಇದರನ್ವಯ 1250 ಮಿಲಿಯನ್ ಡಾಲರ್ ( 9300 ಕೋಟಿ ರೂ. ಗೂ ಅಧಿಕ) ಮೊತ್ತವನ್ನು ಸಾಲವನ್ನು ಪಡೆದಿದೆ. ಇಂಡೋನೇಷ್ಯಾ, ಫಿಲಿಫೈನ್ಸ್ ( ತಲಾ 750 ಮಿಲಿಯನ್ ಡಾಲರ್), ಪಾಕಿಸ್ತಾನಕ್ಕೆ 500 ಹಾಗೂ ಬಾಂಗ್ಲಾದೇಶಕ್ಕೆ 250 ದಶಲಕ್ಷ ಡಾಲರ್ಗಳನ್ನು ನೀಡಲಾಗಿದೆ.
ಏಷ್ಯಾ ಮಾತ್ರವಲ್ಲ, ಯುರೋಪ್, ಆಫ್ರಿಕಾ, ದಕ್ಷಿಣ ಅಮೆರಿಕ ಉತ್ತರ ಅಮೆರಿಕದ ರಾಷ್ಟ್ರಗಳು ಈ ಬ್ಯಾಂಕ್ನ ಸದಸ್ಯತ್ವ ಪಡೆದಿವೆ. ಆರು ಖಂಡಗಳ ದೇಶಗಳು ಇದರ ಸದಸ್ಯತ್ವ ಪಡೆದಿವೆ. 5ನೇ ವಾರ್ಷಿಕ ಮಹಾಸಭೆಯಲ್ಲಿ ಬ್ಯಾಂಕಿನ ಪ್ರಗತಿ ಬಗ್ಗೆ ಚೀನಾ ಅಧ್ಯಕ್ಷರು ಮಾಹಿತಿ ನೀಡಿದರು.