ನವದೆಹಲಿ: ಚೀನಾದ ಎರಡು ಕಂಪನಿಗಳು ಪೂರೈಸಿದ್ದ ರ್ಯಾಪಿಡ್ ಆ್ಯಂಟಿಬಾಡಿ ಟೆಸ್ಟ್ ಕಿಟ್ಗಳನ್ನು ಕಳಪೆಯಾಗಿದ್ದು, ಅವುಗಳನ್ನು ಬಳಸದಂತೆ ತಿರಸ್ಕರಿಸಲಾಗಿದ್ದರೂ ಸರ್ಕಾರಕ್ಕೆ ಒಂದು ರೂಪಾಯಿ ಕೂಡ ನಷ್ಟವಾಗಿಲ್ಲ ಎಂದು ಕೇಂದ್ರ ಸರ್ಕಾರ ಸ್ಪಷ್ಟಪಡಿಸಿದೆ.
ರ್ಯಾಪಿಡ್ ಆ್ಯಂಟಿಬಾಡಿ ಟೆಸ್ಟ್ನ ಚೀನಿ ಮಾಲು ಕಳಪೆಯಾಗಿದ್ದು, ಅವನ್ನು ಬಳಸದಂತೆ ಸರ್ಕಾರ ಎಲ್ಲ ಆಸ್ಪತ್ರೆಗಳಿಗೂ ಸೂಚನೆ ನೀಡಿತ್ತು. ಅಲ್ಲದೆ, ದೆಹಲಿ ಹೈಕೋರ್ಟ್ ಈ ಕಿಟ್ಗಳನ್ನು ದುಪ್ಪಟ್ಟು ಬೆಲೆಗೆ ಖರೀದಿಸಲಾಗುತ್ತಿದೆ ಎಂಬ ಸಂಗತಿಯನ್ನು ಬಹಿರಂಗಪಡಿಸಿದ ಹಿನ್ನೆಲೆಯಲ್ಲಿ ಇವುಗಳ ಖರೀದಿ ಪ್ರಕ್ರಿಯೆ ವಿವಾದಕ್ಕೆ ಒಳಗಾಗಿತ್ತು. ಈ ಹಿನ್ನೆಲೆಯಲ್ಲಿ ಸರ್ಕಾರ ಈ ಸ್ಪಷ್ಟನೆ ನೀಡಿದೆ.
ಚೀನಾದ ಗುವಾಂಗ್ಝೌನ ವೋಂಡ್ಫೋ ಬಯೋಟೆಕ್ ಮತ್ತು ಝುಹಾಯ್ ಲಿವ್ಜಾನ್ ಡಯಾಗ್ನಾಸ್ಟಿಕ್ಸ್ ಎಂಬ ಎರಡು ಕಂಪನಿಗಳಿಂದ ಇವನ್ನು ಖರೀದಿಸಲಾಗಿತ್ತು. ಐಸಿಎಂಆರ್ನಲ್ಲಿ ಇವುಗಳನ್ನು ಪರೀಕ್ಷೆಗೆ ಒಳಪಡಿಸಿದಾಗ, ಇವುಗಳ ಪರೀಕ್ಷಾ ಫಲಿತಾಂಶಗಳಲ್ಲಿ ಸ್ಥಿರತೆ ಇಲ್ಲದಿರುವುದು ಪತ್ತೆಯಾಗಿತ್ತು. ಈ ಹಿನ್ನೆಲೆಯಲ್ಲಿ ಇವುಗಳನ್ನು ಬಳಸದಂತೆ ಸರ್ಕಾರ ಆಸ್ಪತ್ರೆಗಳಿಗೆ ಸೂಚನೆ ನೀಡಿತ್ತು.
ಇವುಗಳ ಖರೀದಿಗೆ ಶೇ.100 ಮುಂಗಡ ನೀಡದಿರಲು ನಿರ್ಧರಿಸಲಾಗಿತ್ತು. ಹೀಗಾಗಿ, ಇವುಗಳ ಖರೀದಿಯಿಂದ ಭಾರತಕ್ಕೆ ಒಂದು ರೂಪಾಯಿ ಕೂಡ ನಷ್ಟವಾಗಿಲ್ಲ ಎಂದು ಕೇಂದ್ರ ಸರ್ಕಾರ ಹೇಳಿದೆ.
ಸರ್ಕಾರ ಐಸಿಎಂಆರ್ ಮೂಲಕ ಮಾ.27ರಂದು 5 ಲಕ್ಷ ರ್ಯಾಪಿಡ್ ಆ್ಯಂಟಿಬಾಡಿ ಟೆಸ್ಟ್ ಕಿಟ್ ಖರೀದಿಗೆ ಮುಂದಾಗಿತ್ತು. ಇವುಗಳ ಖರೀದಿಗಾಗಿ ಐಸಿಎಂಆರ್ ಮತ್ತು ಆರ್ಕ್ ಫಾರ್ಮಸ್ಯುಟಿಕಲ್ಸ್ ನಡುವೆ ಒಪ್ಪಂದ ಏರ್ಪಟ್ಟಿತ್ತು. ಟೆಸ್ಟ್ ಕಿಟ್ಗಳ ಆಮದುದಾರ ಮ್ಯಾಟ್ರಿಕ್ಸ್ ಸಂಸ್ಥೆ ಇವುಗಳನ್ನು 245 ರೂ.ಗೆ ಖರೀದಿಸಿ, ಐಸಿಎಂಆರ್ಗೆ ತಲಾ 600 ರೂ.ನಂತೆ ಮಾರಾಟ ಮಾಡಿತ್ತು. ಇದರ ಮಾರಾಟದ ಬೆಲೆ ಮೂಲಬೆಲೆಗಿಂತ ಶೇ.60 ಹೆಚ್ಚಿಸಲಾಗಿತ್ತು. ಇದು ವಿವಾದಕ್ಕೆ ಕಾರಣವಾಗಿತ್ತು.
ಈ ಬಗ್ಗೆ ವಿಚಾರಣೆ ನಡೆಸಿದ್ದ ದೆಹಲಿ ಹೈಕೋರ್ಟ್ ಪ್ರತಿಯೊಂದು ಕಿಟ್ನ ಬೆಲೆಯನ್ನು ಗರಿಷ್ಠ 400 ರೂ.ಗೆ ನಿಗದಿಗೊಳಿಸಿ ಆದೇಶಿಸಿತ್ತು.
ವಿದೇಶಿ ಪ್ರಯಾಣ ಮಾಡಿಲ್ಲವಾದರೆ ಕೋವಿಡ್ ಪರೀಕ್ಷೆ ಇಲ್ಲ; ತೆಲಂಗಾಣ ವೈದ್ಯರ ಈ ಕ್ರಮಕ್ಕೆ ಭಾರಿ ಟೀಕೆ