ಬೆಂಗಳೂರು: ಭಾರತ 2011ರಲ್ಲಿ ಕೊನೇ ಬಾರಿ ತವರಿನಲ್ಲೇ ಟೂರ್ನಿ ಆಯೋಜಿಸಿ ವಿಶ್ವಕಪ್ ಗೆದ್ದಾಗ ದಿಗ್ಗಜ ಸಚಿನ್ ತೆಂಡುಲ್ಕರ್ಗೆ ಅದು 6ನೇ ಹಾಗೂ ಕೊನೇ ವಿಶ್ವಕಪ್ ಆಗಿತ್ತು. ಹೀಗಾಗಿ ಅವರಿಗೆ ವಿಶ್ವಕಪ್ ಗೆಲುವಿನ ಸಂಭ್ರಮ ನೀಡುವ ಹಂಬಲ ಟೀಮ್ ಇಂಡಿಯಾಗೆ ಸ್ಫೂರ್ತಿ ತುಂಬಿತ್ತು. ಅದೇ ರೀತಿ ಈ ಸಲ ಸ್ಟಾರ್ ಬ್ಯಾಟರ್ಗಳಾದ ವಿರಾಟ್ ಕೊಹ್ಲಿ ಮತ್ತು ನಾಯಕ ರೋಹಿತ್ ಶರ್ಮಗೆ ಇದು ಬಹುತೇಕ ಕೊನೇ ವಿಶ್ವಕಪ್ ಆಗಿದ್ದು, ಅವರಿಗಾಗಿ ವಿಶ್ವಕಪ್ ಗೆಲ್ಲುವ ಛಲ ತಂಡದಲ್ಲಿದೆ. 2011ರಲ್ಲಿ ಮೊದಲ ವಿಶ್ವಕಪ್ನಲ್ಲಿ ಯುವ ಆಟಗಾರನಾಗಿ ಗೆಲುವು ಕಂಡಿದ್ದ ಕೊಹ್ಲಿ, ಈ ಬಾರಿ 4ನೇ ಹಾಗೂ ಕೊನೇ ವಿಶ್ವಕಪ್ನಲ್ಲೂ ಟ್ರೋಫಿಗೆ ಮುತ್ತಿಡುವ ಅವಕಾಶ ಹೊಂದಿದ್ದರೆ, ರೋಹಿತ್ ತವರಿನಲ್ಲಿ ಮೊದಲ ಬಾರಿ ವಿಶ್ವಕಪ್ ಆಡುವ ಅವಕಾಶ ಪಡೆದಿದ್ದಾರೆ.
ಕಳೆದ 3 ಬಾರಿ ಆತಿಥೇಯರಿಗೆ ಟ್ರೋಫಿ!
ಕಳೆದ 3 ವಿಶ್ವಕಪ್ಗಳ ಫಲಿತಾಂಶ ನೋಡಿದರೆ ಈ ಸಲ ಭಾರತ ಪ್ರಶಸ್ತಿ ಗೆಲ್ಲುವ ನಿರೀಕ್ಷೆ ಹೆಚ್ಚುತ್ತದೆ. 2011ರಲ್ಲಿ ಭಾರತ ತವರಿನಲ್ಲೇ ಪ್ರಶಸ್ತಿ ಗೆದ್ದ ಮೊದಲ ತಂಡವೆನಿಸಿದ್ದರೆ, 2015ರಲ್ಲಿ ಆಸ್ಟ್ರೆಲಿಯಾ ಮತ್ತು 2019ರಲ್ಲಿ ಇಂಗ್ಲೆಂಡ್ ಕೂಡ ಇದೇ ಸಾಧನೆ ಪುನರಾವರ್ತಿಸಿತ್ತು. ಹೀಗಾಗಿ ಭಾರತ ಈ ಬಾರಿ ಆ ಪರಂಪರೆ ಮುಂದುವರಿಸುವ ಸವಾಲು ಹೊಂದಿದೆ.