ನವದೆಹಲಿ: ಭಾರತದಲ್ಲಿ ಈಗ ನಡೆಯುತ್ತಿರುವ ಏಕದಿನ ವಿಶ್ವಕಪ್ ಟೂರ್ನಿ ಕ್ರಿಕೆಟ್ ಪ್ರೇಮಿಗಳಿಗೆ ಮಾತ್ರವಲ್ಲದೆ, ಜೂಜುಗಾರರಿಗೂ ಹಬ್ಬವಾಗಿದೆ. ಪ್ರತಿ ಪಂದ್ಯಕ್ಕೂ ಸಾವಿರಾರು ಕೋಟಿ ರೂ. ಮೊತ್ತದ ಬೆಟ್ಟಿಂಗ್ ದಂಧೆ ನಡೆಯುತ್ತಿದೆ. ಆದರೆ ಭಾರತದಲ್ಲಿ ಇನ್ನೂ ಬೆಟ್ಟಿಂಗ್ ಕಾನೂನುಬದ್ಧ ಆಗದೇ ಇರುವುದರಿಂದ ಕೇಂದ್ರ ಸರ್ಕಾರಕ್ಕೆ ಇದರ ಲಾಭ ಸಿಗುತ್ತಿಲ್ಲ. ಒಂದು ಅಧ್ಯಾಯನದ ಪ್ರಕಾರ, ಬೆಟ್ಟಿಂಗ್ ಕಾನೂನುಬದ್ಧ ಆಗದೆ ಇರುವುದರಿಂದ ಸರ್ಕಾರಕ್ಕೆ ವಾರ್ಷಿಕ 2.29 ಲಕ್ಷ ಕೋಟಿ ರೂ. ತೆರಿಗೆ ಹಣ ನಷ್ಟವಾಗುತ್ತಿದೆ!
ದೇಶದಲ್ಲಿ ಬೆಟ್ಟಿಂಗ್ ಕಾನೂನುಬಾಹಿರ ಎನಿಸಿದ್ದರೂ, ಅದಕ್ಕೆ ಸಂಪೂರ್ಣವಾಗಿ ಕಡಿವಾಣ ಹಾಕುವುದು ಯಾವುದೇ ರಾಜ್ಯದ ಪೊಲೀಸರಿಗೂ ಸಾಧ್ಯವಾಗಿಲ್ಲ. ರಹಸ್ಯವಾಗಿ ಈ ದಂಧೆ ನಡೆಯುತ್ತಲೇ ಬಂದಿದೆ. ಈಗಂತೂ ಸ್ಮಾರ್ಟ್ ಫೋನ್ ಮತ್ತಿತರ ಡಿಜಿಟಲ್ ಸೌಕರ್ಯಗಳಿಂದಾಗಿ ಬೆಟ್ಟಿಂಗ್ ದಂಧೆ ಸರಾಗವಾಗಿ ಬೆಳೆಯುತ್ತಲೇ ಸಾಗುತ್ತಿದೆ. ಥಿಂಕ್ ಚೇಂಜ್ ಫೋರಮ್ (ಟಿಸಿಎಫ್) ವರದಿಯ ಪ್ರಕಾರ, ದೇಶದಲ್ಲಿ ಪ್ರಸಕ್ತ ವಾರ್ಷಿಕ 8.20 ಲಕ್ಷ ಕೋಟಿ ರೂ. ಮೊತ್ತದ ಕ್ರೀಡಾ ಬೆಟ್ಟಿಂಗ್ ವ್ಯವಹಾರ ನಡೆಯುತ್ತಿದೆ. ಇದಕ್ಕೆ ಶೇ. 28 ಜಿಎಸ್ಟಿ ಅನ್ವಯವಾದರೆ ಸರ್ಕಾರ ವಾರ್ಷಿಕ 2.29 ಲಕ್ಷ ಕೋಟಿ ರೂ. ಆದಾಯ ಗಳಿಸಬಹುದು.
ಪ್ರತಿ ವರ್ಷ ಏಪ್ರಿಲ್-ಮೇನಲ್ಲಿ ನಡೆಯುವ ಐಪಿಎಲ್ ಟೂರ್ನಿಯ ವೇಳೆ ಬೆಟ್ಟಿಂಗ್ ದಂಧೆ ಹೆಚ್ಚಿರುತ್ತದೆ. ಅಂದಾಜಿನ ಪ್ರಕಾರ, ಸಾಮಾನ್ಯವಾಗಿ ದೇಶದ 14 ಕೋಟಿ ಜನರು ಈ ಬೆಟ್ಟಿಂಗ್ ಚಟುವಟಿಕೆಯಲ್ಲಿ ಪಾಲ್ಗೊಂಡರೆ, ಐಪಿಎಲ್ ವೇಳೆ ಈ ಸಂಖ್ಯೆ 37 ಕೋಟಿಗೆ ಏರುತ್ತದೆ. ಭಾರತದಲ್ಲಿ ಬೆಟ್ಟಿಂಗ್ಗೆ ನಿಷೇಧವಿರುವ ನಡುವೆ, ಸುಮಾರು 75 ವಿದೇಶಿ ಬೆಟ್ಟಿಂಗ್ ವೆಬ್ಸೈಟ್ಗಳು ಭಾರತೀಯರ ಬೆಟ್ಟಿಂಗ್ ವ್ಯವಹಾರಕ್ಕೆ ಲಭ್ಯವಾಗಿವೆ.
ವಿಶ್ವಕಪ್ನಲ್ಲಿ ಮುಂದಿನ 3 ಪಂದ್ಯಗಳಿಗೆ ಕೇನ್ ವಿಲಿಯಮ್ಸನ್ ಅಲಭ್ಯ; ಭಾರತಕ್ಕೂ ಸಿಹಿಸುದ್ದಿ!