ನವದೆಹಲಿ: ಕರೊನಾ ವ್ಯಾಪಕವಾಗಿ ಹಬ್ಬುತ್ತಿರುವುದೇಕೆ ಹಾಗೂ ಇದರ ನಿಗ್ರಹಕ್ಕೊಂದು ಮುನ್ಸೂಚನಾ ವ್ಯವಸ್ಥೆಯನ್ನು ರೂಪಿಸುವ ನಿಟ್ಟಿನಲ್ಲಿ ಹಲವು ಸಂಶೋಧನೆಗಳು ನಡೆಯುತ್ತಿವೆ.
ಅಂತೆಯೇ, ಗುಜರಾತ್ನ ಗಾಂಧಿನಗರದ ಇಂಡಿಯನ್ ಇನ್ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿಯ ಸಂಶೋಧಕರು ಕೊಳಚೆ ನೀರಿನಲ್ಲಿ ಕರೊನಾ ವೈರಸ್ ಕುರುಹುಗಳನ್ನು ಪತ್ತೆ ಹಚ್ಚಿದ್ದಾರೆ. ಈ ಮೂಲಕ ದೇಶಾದ್ಯಂತ ಕೊಳಚೆ ನೀರಿನಲ್ಲಿ ಇರಬಹುದಾದ ವೈರಸ್ ಕುರುಹುಗಳ ಪತ್ತೆ, ನಿಗಾ ಹಾಗೂ ನಿಯಂತ್ರಣಕ್ಕೆ ಕೈಗೊಳ್ಳಬೇಕಾದ ಕ್ರಮಗಳ ಅಗತ್ಯದ ಮಹತ್ವವನ್ನು ಇದು ಎತ್ತಿ ತೋರಿಸಿದೆ ಎಂದು ಸಂಶೋಧಕರು ತಿಳಿಸಿದ್ದಾರೆ.
ಇದನ್ನೂ ಓದಿ; ಎರಡು ದಿನ ತಡವಾಗಿದ್ದರೆ ಸಿಮೆಂಟ್ ಕಂಪನಿಯಿಂದಲೇ 17 ಕೋಟಿ ರೂ. ಪಡೀತಿದ್ದ ಉದ್ಯೋಗಿ….!
ಈ ಹಿಂದೆ ಚೆನ್ನೈನಲ್ಲೂ ಕೊಳಚೆ ನೀರಿನಲ್ಲಿ ಕರೊನಾ ವೈರಸ್ ಕುರುಹುಗಳನ್ನು ಪತ್ತೆಹಚ್ಚಲಾಗಿತ್ತು. ಇದಲ್ಲದೇ ಆಸ್ಟ್ರೇಲಿಯಾ, ನೆದರ್ಲೆಂಡ್, ಫ್ರಾನ್ಸ್, ಅಮೆರಿಕದಲ್ಲೂ ಕೊಳಚೆ ನೀರಿನಲ್ಲಿ ಕರೊನಾ ವೈರಸ್ ಪತ್ತೆಯಾಗಿದೆ.
ಜಾಗತಿಕ ಯೋಜನೆ: ಕಳೆದ ಎಪ್ರಿಲ್ನಲ್ಲಿ ಜಗತ್ತಿನ 51 ಪ್ರಮುಖ ಸಂಶೋಧನಾ ಸಂಸ್ಥೆಗಳು ಕೈಗೊಂಡ ಸಂಶೋಧನೆಯ ಭಾಗವಾಗಿ ಗಾಂಧಿನಗರ ಐಐಟಿ ಈ ಅಧ್ಯಯನ ನಡೆಸಿತ್ತು. ಇದರ ಮೂಲಕ ಮುನ್ಸೂಚನಾ ವ್ಯವಸ್ಥೆಯೊಂದನ್ನು ರೂಪಿಸುವ ಗುರಿ ಹೊಂದಲಾಗಿದೆ.
ಲಾಕ್ಡೌನ್ ಅವಧಿಯಲ್ಲಿ ಅಂದರೆ ಮೇ 8 ರಿಂದ 27 ರ ನಡುವೆ ಸಂಗ್ರಹಿಸಲಾದ ಕೊಳಚೆ ನೀರಿನ ಮಾದರಿಯಲ್ಲಿ ವೈರಸ್ನ ಕುರುಹುಗಳು ಪತ್ತೆಯಾಗಿವೆ. ವ್ಯಕ್ತಿಗಳಲ್ಲಿ ಕರೊನಾ ಪತ್ತೆಗೆ ಪೂರಕವಾಗಿ ಈ ಅಧ್ಯಯನ ನಡೆಸಲಾಗಿದೆ. ಕೋವಿಡ್ ಗುಣಲಕ್ಷಣಗಳಿರುವ ವ್ಯಕ್ತಿಯಲ್ಲಿ ಮಾತ್ರವಲ್ಲದೇ, ಯಾವುದೇ ಗುಣಲಕ್ಷಣವಿಲ್ಲದ ವ್ಯಕ್ತಿಯ ದೇಹದ ಮಲ ಅಥವಾ ತ್ಯಾಜ್ಯದಿಂದ ಕರೊನಾ ವೈರಸ್ ಹೊರಬರುತ್ತದೆ. ಈ ಕಾರಣದಿಂದಾಗಿ ಕೊಳಚೆ ನೀರಿನ ಪರೀಕ್ಷೆ ಅತ್ಯಗತ್ಯವಾಗಿದೆ ಎಂದು ಐಐಟಿ ಪ್ರಾಧ್ಯಾಪಕ ಮನೀಷ್ಕುಮಾರ್ ಹೇಳಿದ್ದಾರೆ. ಅಧ್ಯಯನದಲ್ಲಿ ಕಂಡುಬಂದ ಫಲಿತಾಂಶವನ್ನು ಅಂತಾರಾಷ್ಟ್ರೀಯ ತಜ್ಞರಿಗೆ ಕಳುಹಿಸಲಾಗಿದೆ ಎಂದು ತಿಳಿಸಿದ್ದಾರೆ.
ಇದನ್ನೂ ಓದಿ; ಕರೊನಾ ಲಸಿಕೆ ಭಾರತದಲ್ಲಿ ಸೆಪ್ಟೆಂಬರ್ಗೆ ಸಿಗೋದು ಪಕ್ಕಾ; ಜಿದ್ದಿಗೆ ಬಿದ್ದು ಉತ್ಪಾದನೆಯಲ್ಲಿ ತೊಡಗಿವೆ ಕಂಪನಿಗಳು
ಒಂದು ಸಮಾಧಾನದ ವಿಷಯವೆಂದರೆ, ಕರೊನಾ ವೈರಸ್ ಕೊಳಚೆ ನೀರಿನಿಂದ ಹಬ್ಬುತ್ತದೆ ಎಂಬುದು ಎಲ್ಲಿಯೂ ಖಚಿತಪಟ್ಟಿಲ್ಲ. ಜತೆಗೆ ನೀರಿನ ತಾಪಮಾನ ಕೂಡ ಈ ವೈರಸ್ ಜೀವಿತಾವಧಿಯ ಮೇಲೆ ಪ್ರಭಾವ ಬೀರುತ್ತದೆ ಎಂದು ಕುಮಾರ್ ಮಾಹಿತಿ ನೀಡಿದ್ದಾರೆ.