ಉತ್ತರಪ್ರದೇಶ: ಇನ್ನೊಂದು ಹತ್ತು ದಿನ ಕಳೆದಿದ್ದರೆ ಆಕೆಯ ಮದುವೆ ಜರುಗುವುದಿತ್ತು. ಆ ವಧು ಮನೆಯಲ್ಲಿ ಇಬ್ಬರು ಸೋದರಿಯರ ಜತೆ ಮಲಗಿದ್ದಾಗ, ಮಧ್ಯರಾತ್ರಿ ಆ ಮೂವರನ್ನೂ ಬೆಚ್ಚಿ ಬೀಳಿಸುವಂಥ ಭಯಂಕರ ಘಟನೆ ನಡೆದಿದೆ.
ಹೀಗೆ ಆ ಭೀಕರ ಕೃತ್ಯಕ್ಕೆ ಒಳಗಾದ ಮೂವರೂ ಸೋದರಿಯರು ಅಪ್ರಾಪ್ತ ವಯಸ್ಸಿನ ದಲಿತ ಯುವತಿಯರು. ವಧುವಿಗೆ ಹದಿನೇಳು, ಇನ್ನಿಬ್ಬರಲ್ಲಿ ಒಬ್ಬಳಿಗೆ ವಯಸ್ಸು 12, ಮತ್ತೊಬ್ಬಳಿಗೆ ಎಂಟು. ಅಷ್ಟಕ್ಕೂ ಇವೆಲ್ಲ ನಡೆದಿದ್ದು ಇತ್ತೀಚೆಗಷ್ಟೇ ಹಾಥರಸ್ ಅತ್ಯಾಚಾರ ಘಟನೆ ನಡೆದಿರುವ ಉತ್ತರ ಪ್ರದೇಶದಲ್ಲಿ. ಇಲ್ಲಿನ ಲಕ್ನೋದಿಂದ 150 ಕಿ.ಮೀ. ದೂರದ ಗೊಂಡಾ ಜಿಲ್ಲೆಯಲ್ಲಿ ಸೋಮವಾರ ಈ ಪ್ರಕರಣ ನಡೆದಿದೆ.
ಜಿಲ್ಲೆಯ ಪರಸ್ಪುರ್ ಪ್ರದೇಶದಲ್ಲಿನ ಮನೆಯ ಮಹಡಿಯಲ್ಲಿ ಮೂವರೂ ಸೋದರಿಯರು ಮಲಗಿದ್ದಾಗ ಈ ಘಟನೆ ಜರುಗಿದೆ. ಮಧ್ಯರಾತ್ರಿ ಇವರ ಮೇಲೆ ಯಾರೋ ಆ್ಯಸಿಡ್ ಎರಚಿದ್ದಾರೆ. ಅದು ಮೂವರ ಮೇಲೂ ಬಿದ್ದಿದ್ದು, ಎಲ್ಲರೂ ಒಮ್ಮೆಲೆ ಚೀರಾಡಿದ್ದಾರೆ. ತಕ್ಷಣ ಮೇಲ್ಗಡೆ ಧಾವಿಸಿ ಬಂದ ಪಾಲಕರು, ತಮ್ಮ ಮಕ್ಕಳನ್ನು ಆಸ್ಪತ್ರೆಗೆ ಕರೆದೊಯ್ದಿದ್ದಾರೆ.
ವಧುವಿಗೆ ಕತ್ತು, ಮುಖ, ಎದೆ ಆ್ಯಸಿಡ್ನಿಂದ ಸುಟ್ಟಿದ್ದು ಗಂಭೀರ ಗಾಯಗಳಾಗಿವೆ. ಆಕೆಯ ಸೋದರಿಯರಿಗೂ ಚಿಕ್ಕಪುಟ್ಟ ಗಾಯಗಳಾಗಿವೆ. ಸೋದರಿಯರ ಚೀರಾಟ ಕೇಳಿಸುತ್ತಿದ್ದಂತೆ ಕಿಡಿಗೇಡಿ ಪರಾರಿಯಾಗಿದ್ದ. ಸದ್ಯ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದು, ತನಿಖೆ ನಡೆಯುತ್ತಿದೆ. (ಏಜೆನ್ಸೀಸ್)