ಮುಂಬೈ: ‘ಯಾರೋ ಒಬ್ಬಿಬ್ಬರು ಮಾಡಿರುವ ತಪ್ಪಿಗೆ ಇಡೀ ಚಿತ್ರರಂಗಕ್ಕೆ ಡ್ರಗ್ಸ್ ಮಾಫಿಯಾದ ನಂಟಿದೆ ದೂಷಿಸುವುದು ತಪ್ಪು …’ ಎಂದು ಬಾಲಿವುಡ್ನ ಹಿರಿಯ ನಟಿ ಮತ್ತು ಸಮಾಜವಾದಿ ಪಕ್ಷದ ಸಂಸದೆ ಜಯಾ ಬಚ್ಚನ್ ಮಂಗಳವಾರವಷ್ಟೇ ಹೇಳಿದ್ದರು.
ಇದನ್ನೂ ಓದಿ: ನಟಿ ಸಂಜನಾ ಗಲ್ರಾನಿ ಜೈಲು ಪಾಲು!
ಈ ಹೇಳಿಕೆಗೆ ಬಾಲಿವುಡ್ನಲ್ಲಿ ಸಾಕಷ್ಟು ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ಪ್ರಮುಖವಾಗಿ ಬಾಲಿವುಡ್ನ ಹಲವು ಕಲಾವಿದರು ಹಾಗೂ ತಂತ್ರಜ್ಱರು ಈ ವಿಷಯವಾಗಿ ಜಯಾ ಬಚ್ಚನ್ ಅವರ ಬೆನ್ನಿಗೆ ನಿಂತಿದ್ದಾರೆ. ಎಲ್ಲರೂ ಬಾಲಿವುಡ್ ಬಗ್ಗೆ ಕೆಟ್ಟದಾಗಿ ಮಾತನಾಡುತ್ತಿರುವಾಗ, ಜಯಾ ಬಚ್ಚನ್ ಅವರು ಚಿತ್ರರಂಗದ ಪರವಾಗಿ ನಿಂತಿರುವುದು ಹಲವರ ಮೆಚ್ಚುಗೆಗೆ ಕಾರಣವಾಗಿದೆ.
ಈ ಕುರಿತು ಮಾತನಾಡಿರುವ ನಟಿ ಮತ್ತು ಸಂಸದೆ ಹೇಮಾ ಮಾಲಿನಿ, ‘ಬಾಲಿವುಡ್ ಒಂದು ಅದ್ಭುತ ಜಗತ್ತು. ಅದರ ಬಗ್ಗೆ ಯಾರಾದರೂ ಕೆಟ್ಟದಾಗಿ ಮಾತನಾಡಿದಾಗ ಬಹಳ ನೋವಾಗುತ್ತದೆ. ಈ ಡ್ರಗ್ಸ್ ಎಲ್ಲಾ ಕಡೆ ಇರುವಂತದ್ದು ಮತ್ತು ಬಾಲಿವುಡ್ನಲ್ಲೂ ಇರಬಹುದು. ಹಾಗಂತ ಎಲ್ಲರೂ ಡ್ರಗ್ಸ್ ತೆಗೆದುಕೊಳ್ಳುತ್ತಾರೆ ಎಂದು ಬಿಂಬಿಸುವುದು ಸರಿಯಲ್ಲ’ ಎಂದು ಅವರು ಹೇಳಿದ್ದಾರೆ.
ಇದನ್ನೂ ಓದಿ: ಡ್ರಗ್ಸ್ ಕೇಸ್; ಸದ್ಯಕ್ಕೆ ಸ್ಟಾರ್ ದಂಪತಿಗೆ ಬಿಗ್ ರಿಲೀಫ್
‘ಚಿತ್ರರಂಗ ಎನ್ನುವುದು ಬಹಳ ಎತ್ತರದ ಸ್ಥಾನದಲ್ಲಿದೆ. ನೆಪೋಟಿಸಂ (ಸ್ವಜನಪಕ್ಷಪಾತ), ಡ್ರಗ್ಸ್ ಅಂತ ಅದನ್ನು ಕೆಳಗೆ ಎಳೆಯುವುದಕ್ಕೆ ಸಾಧ್ಯವೇ ಇಲ್ಲ. ನನಗೆ ಹೆಸರು, ಜನಪ್ರಿಯತೆ ಎಲ್ಲವೂ ಸಿಕ್ಕಿದ್ದು ಈ ಚಿತ್ರರಂಗದಿಂದಲೇ. ಈ ರಂಗದಿಂದ ಅದೆಷ್ಟೋ ನಟರು ದೊಡ್ಡ ಹೆಸರು ಮಾಡಿದರು. ಜನ ಅವರನ್ನ ಪೂಜಿಸುವಷ್ಟು ದೊಡ್ಡದಾಗಿ ಬೆಳೆದರು. ರಾಜ್ ಕಪೂರ್, ದೇವ್ ಆನಂದ್, ಧರ್ಮೇಂದ್ರ, ಅಮಿತಾಬ್ ಬಚ್ಚನ್ ಇವರೆಲ್ಲಾ ಹಿಂದಿ ಚಿತ್ರರಂಗವನ್ನು ಭಾರತದ ಮನೆಮನೆಗೂ ತಲುಪಿಸಿದರು. ಬಾಲಿವುಡ್ ಎಂದರೆ ಭಾರತ. ಯಾರಾದರೂ ಬಾಲಿವುಡ್ ಬಗ್ಗೆ ಕೆಟ್ಟದಾಗಿ ಮಾತನಾಡಿದರೆ, ನನಗೆ ಸುಮ್ಮನೆ ಇರುವುದಕ್ಕೆ ಸಾಧ್ಯವಿಲ್ಲ’ ಎಂದು ಹೇಮಾ ಮಾಲಿನಿ ಖಾರವಾಗಿ ಹೇಳಿದ್ದಾರೆ.