ಬೆಂಗಳೂರು: ಅನಾರೋಗ್ಯಗೊಂಡು ಬೇಸರದಲ್ಲಿದ್ದಾಗ ಯಾರಾದರೂ ‘ವಾಟ್ಸಪ್’ ಎಂದು ಯೋಗಕ್ಷೇಮ ವಿಚಾರಿಸಿಕೊಂಡರೆ ಆಗ ಬಹಳ ನಿರಾಳ ಅನಿಸುವುದು ಸಹಜ. ಹೆಚ್ಚೂಕಡಿಮೆ ಅಂಥದ್ದೇ ಒಂದು ನಿರಾಳತೆ ವಾಟ್ಸ್ಆ್ಯಪ್ ಮೂಲಕವೂ ಶೀಘ್ರದಲ್ಲೇ ಲಭಿಸಲಿದೆ. ಹೌದು.. ವಾಟ್ಸ್ಆ್ಯಪ್ ಬಳಕೆದಾರರು ಅನಾರೋಗ್ಯಗೊಂಡಾಗಲೂ ಅದು ನೆರವಿಗೆ ಬರಲಿದೆ.
ಫೇಸ್ಬುಕ್ ಮಾಲೀಕತ್ವದ ಮೆಸೆಜಿಂಗ್ ಆ್ಯಪ್ ಮೊನ್ನೆಮೊನ್ನೆಯವರೆಗೆ ಆಡಿಯೊ-ವಿಡಿಯೋ ಚಾಟ್/ಕಾಲ್ ಹಾಗೂ ಫೈಲ್ ಟ್ರಾನ್ಸ್ಫರ್ಗಳಿಗಷ್ಟೇ ಬಳಕೆ ಆಗುತ್ತಿತ್ತು. ಇನ್ನು ಹಣ ಕಳುಹಿಸಲು ಅನುಕೂಲವಾಗುವಂಥ ವ್ಯವಸ್ಥೆಯನ್ನು ವಾಟ್ಸ್ಆ್ಯಪ್ ಭಾರತದಲ್ಲಿ ಕಳೆದ ತಿಂಗಳಲ್ಲಿ ಅಳವಡಿಸಿತ್ತು. ಇದೀಗ ಬಳಕೆದಾರರ ಅನುಕೂಲದ ದೃಷ್ಟಿಯಿಂದ ವಾಟ್ಸ್ಆ್ಯಪ್ ಮತ್ತೊಂದು ಹೆಜ್ಜೆ ಮುಂದಿಟ್ಟಿದೆ.
ಅದು ತನ್ನ ಬಳಕೆದಾರರಿಗೆ ಆರೋಗ್ಯ ವಿಮೆ ಕೂಡ ನೀಡಲು ಮುಂದಾಗಿದೆ. ಎಸ್ಬಿಐ ಜನರಲ್ ಇನ್ಶೂರೆನ್ಸ್ ಮೂಲಕ ಆರೋಗ್ಯ ವಿಮೆ ಕೊಡುವ ಬಗ್ಗೆ ಕಂಪನಿ ಮಾತುಕತೆ ಆರಂಭಿಸಿದೆ. ಎಲ್ಲ ಅಂದುಕೊಂಡಂತೆಯೇ ನಡೆದರೆ ಈ ವರ್ಷಾಂತ್ಯದ ವೇಳೆಗೆ ವಾಟ್ಸ್ಆ್ಯಪ್ ಮೂಲಕ ಆರೋಗ್ಯ ವಿಮೆ ಕೂಡ ಸಿಗಲಿದೆ. ಅತಿ ಕಡಿಮೆ ಪ್ರೀಮಿಯಮ್ ಮೂಲಕ ಅನಾರೋಗ್ಯ ಪರಿಸ್ಥಿತಿಯಲ್ಲಿ ತುರ್ತು ಆರ್ಥಿಕ ನೆರವು ನೀಡುವ ಹಿನ್ನೆಲೆಯಲ್ಲಿ ವಾಟ್ಸ್ಆ್ಯಪ್ ಇಂಥದ್ದೊಂದು ಯೋಜನೆ ಕೈಗೆತ್ತಿಕೊಂಡಿದೆ. ಹೀಗೆ ಮೈಕ್ರೋ ಹೆಲ್ತ್ ಇನ್ಶೂರೆನ್ಸ್ ಮಾತ್ರವಲ್ಲದೆ ಮೈಕ್ರೋ ಪೆನ್ಷನ್ ಮುಂತಾದ ಸೌಲಭ್ಯಗಳನ್ನೂ ನೀಡಲು ವಾಟ್ಸ್ಆ್ಯಪ್ ಚಿಂತನೆ ನಡೆಸಿದೆ.
ಕೋವಿಡ್ನಿಂದ ಗುಣವಾದ ಅಪ್ಪ, ಕೇಕ್ ಕತ್ತರಿಸಿ ಸಂತಸಪಟ್ಟ ಮಗಳು; ಎಡಿಜಿಪಿ@ಲೋಕಾಭಿರಾಮ!