ನವದೆಹಲಿ: ಭಾರತದ ಕ್ರಿಕೆಟ್ ಲೋಕದಲ್ಲಿ ಸದ್ಯ ಆಳ್ವಿಕೆ ನಡೆಸುತ್ತಿರುವುದು ವಿರಾಟ್ ಕೊಹ್ಲಿ. ದೇಶ ಮಾತ್ರವಲ್ಲದೆ ವಿದೇಶಗಳಲ್ಲಿಯೂ ಸಹ ಅಭಿಮಾನಿ ಬಳಗವನ್ನು ಹೊಂದಿರುವ ವಿರಾಟ್ ಕೊಹ್ಲಿಯಂತಾಗಬೇಕು ಎಂದು ಅನೇಕ ಯುವ ಕ್ರಿಕೆಟಿಗರು ಕನಸು ಕಾಣುತ್ತಾರೆ. ಆದರೆ ಪಾಕಿಸ್ತಾನದ ಪ್ರಸಿದ್ಧ ಆಟಗಾರನೊಬ್ಬನಿಗೆ ಆತ ವಿರಾಟ್ ಕೊಹ್ಲಿಯಂತಾಗುವುದು ಇಷ್ಟವಿಲ್ಲವಂತೆ.
19 ವರ್ಷದೊಳಗಿನವರ ವಿಶ್ವಕಪ್ ಕ್ರಿಕೆಟ್ ಪಂದ್ಯಾವಳಿಯಲ್ಲಿ ಪಾಕಿಸ್ತಾನಕ್ಕೆ ಸಿಕ್ಕಿದ್ದು ಒಬ್ಬ ಅದ್ಭುತ ಆಟಗಾರ. ಹೈದರ್ ಅಲಿ ಹೆಸರಿನ ಆಟಗಾರ ಪಾಕಿಸ್ತಾನದ ಕ್ರಿಕೆಟ್ ತಂಡದ ಮುಂದಿನ ನಾಯಕ ಎಂದು ಅನೇಕರು ಮಾತನಾಡುತ್ತಿದ್ದಾರೆ. ತನ್ನ ಬ್ಯಾಟಿಂಗ್ ಮೂಲಕ ಪೂರ್ತಿ ಪ್ರಪಂಚಕ್ಕೆ ಪರಿಚಿತನಾದ ಈ ಬ್ಯಾಟ್ಸ್ಮೆನ್ಗೆ ತಾನು ವಿರಾಟ್ ಕೊಹ್ಲಿಯಂತಾಗುವುದು ಇಷ್ಟವಿಲ್ಲವಂತೆ, ಬದಲಾಗಿ ತಾನು ಪಾಕಿಸ್ತಾನದ ಕ್ರಿಕೆಟಿಗ ಬಾಬರ್ ಅಜಮ್ನಂತಾಗಬೇಕಂತೆ.
ಒಬ್ಬ ಬ್ಯಾಟ್ಸ್ಮೆನ್ ತನ್ನ ಆದರ್ಶ ವ್ಯಕ್ತಿಯಂತೆ ಆಗುವುದಕ್ಕೆ ಸಾಧ್ಯವೇ ಇಲ್ಲ. ಆದರೆ ಅವರಂತೆ ಆಗುವ ಪ್ರಯತ್ನ ಮಾಡಬಹುದು. ವಿರಾಟ್ ಕೊಹ್ಲಿಗಿಂತ ಬಾಬರ್ ಅಜಮ್ ಉತ್ತಮ ಆಟಗಾರನಾಗಿರುವುದರಿಂದ ನಾನು ಬಾಬರ್ ಅಜಮ್ನಂತಾಗಬೇಕು ಎಂದು ಆತ ಹೇಳಿಕೊಂಡಿದ್ದಾನೆ.
ನಾನು ಪ್ರಥಮ ದರ್ಜೆ ಪಂದ್ಯಾವಳಿಯಲ್ಲಿ ಬಾಬರ್ ಅಜಮ್ರನ್ನು ಭೇಟಿಯಾಗಿದ್ದೆ. ಅವರು ನನಗೆ ಬ್ಯಾಟಿಂಗ್ ಸಲಹೆ ನೀಡಿದ್ದರು. ಲಾಹೋರ್ನ ರಾಷ್ಟ್ರೀಯ ಕ್ರಿಕೆಟ್ ಅಕಾಡೆಮಿಯಲ್ಲಿ ನಾವು ಅವರಿಂದ ಸಾಕಷ್ಟು ಕಲಿತಿದ್ದೇವೆ. ಪಿಎಸ್ಎಲ್ ಸಮಯದಲ್ಲಿ ಅವರು ನನಗೆ ಆತ್ಮಸ್ಥೈರ್ಯ ತುಂಬಿದ್ದರು. ನೀನು ಕೇವಲ ರನ್ ಗಳಿಸುವತ್ತ ಗಮನವಿಡು ಮುಂದಿನದನ್ನು ಅಲ್ಲಾಹ ನೋಡಿಕೊಳ್ಳುತ್ತಾನೆ ಎಂದು ಭರವಸೆ ತುಂಬಿದ್ದರು ಎಂದು ಆತ ಹೇಳಿಕೊಂಡಿದ್ದಾನೆ. (ಏಜೆನ್ಸೀಸ್)
ಮೋದಿಜೀ.. ಕೊಲ್ಕತ್ತಾ ಏರ್ಪೋರ್ಟ್ಗೆ ಬರುವ ಎಲ್ಲಾ ವಿಮಾನಗಳನ್ನು ಸ್ಥಗಿತಗೊಳಿಸಿ; ಪ್ರಧಾನಿಗೆ ಮಮತಾ ಬ್ಯಾನರ್ಜಿ ಮನವಿ